已經成功證明自家調音實力同堅係日系精品嘅Clariar，臨聖誕節前就開放左中間價嘅i430 四單元耳機嘅試聽機會，咁自從俾i640驚艷到之後，我已經同自己講若果呢隻品牌再有新機呢，我都要支持下嘅。所以話咁快，i430就到左我手了，開箱個下心情好雀躍嘅，然後一見到個葡萄酒色面板，OMG。

日本品牌一向係俾人感受到一種恰到好處嘅效果，無論係調音、外觀設計、抑或係包裝內外嘅安排，所有野都係不多也不少。所以i430 小左單元之下，會唔會就因為down cost而有野失衡呢？

咁就梗係唔會啦，誠意一樣咁滿瀉呀，再加埋代理嘅跟進，即刻成件事抵玩得來又有實際作用。

一齊去片！

先由i640開個靚頭，跟手就出多對中階價嘅i430，可以見到呢個品牌唔係專注於令個品牌有幾多noise有幾爆，而係好撲實咁想做好一件產品，等多啲人可以接觸到佢地嘅「匠心」。

實際上，當你以為i430 只係將i640 嘅部件降格再合成為一對新型號，咁就真係錯了，事關成對耳機，雖然都係以Clariar嘅自家技術同物料為基礎，但聲學設計同外觀就有好大變化，令佢唔單止係一對四單元耳機，仲係一對表現標清嘅四單元耳機。

首先開箱上手一刻，你就會即刻留意到i430 成功瘦身，比起大哥係的骰啲嘅，用上葡萄酒色加無煙煤色嘅配搭觀感上亦都無咁剛硬，好貼切到佢嘅價位帶。包裝都係細件頭嘅，用一個便攜真皮盒就裝起曬耳機、原裝線、耳膠，個人覺得呢個包裝幾有心思，有時唔洗太過花巧都會感受到個種誠意，感覺亦都更加似日系精品。

外殼接合緊密，金工處理得精細，可以睇得出CNC切割嘅優勢，呢個鋁合金腔體內最薄位置只有 1/1000mm 厚，再加上噴砂同拉絲處理，製作出圓滑有質感嘅外殼。機身嘅形狀，亦因為體積減小而重新設計，重心位置得到改良，更加緊貼耳朵，不過實際配戴同i640 一樣，3都係揀返啲短身耳膠會比較好，原裝膠都OK嘅。

i430 沿用高階型號 Composite Housing Structure 混合式箱體設計，由兩個部份組成耳機結構主幹：鋁合金製嘅腔體內，搭載由醫療級3D 打印機製成嘅抗振矽單元支架，將三粒單元（低音為複合單元）安放係支架上，以此達到最佳發聲位置同抑制諧震，比起傳統動鐵耳機更能發揮單元潛力，當然亦都比起傳統以黏合劑固定單元嘅做法更加穩定。1 高、1 中、2 低嘅 4 動鐵單元配置，由 3D 打印機製造出獨立導管，並將特殊高密度多孔濾波物料High Density Porous Filter (H.D.P.F) 聲學阻尼放置在導管中，形成低通濾波器（LPF）效果，能夠係大音壓之下大幅減低傳統阻尼所造成嘅失真。

面板內藏 Rear Cavity Pressure Optimizer (R.C.P.O) 後腔壓力氣孔設計，同i640 一樣都係一個迷宮型結構，但氣孔大小同迷宮嘅設計就唔相同了，實際作用仍然明顯，無感覺到好強嘅耳內壓力，而且耳機嘅聲音比較開揚，音色上亦比i640 活潑，尤其低音反應敏捷左，調到比較大聲嘅情況下低音依舊表現穩定，相信亦係由呢個R.C.P.O設計嘅主要功用。

今次Clariar亦都特別提到i430 所使用嘅分頻電路設計，我覺得雖然唔係對聲音至關重要嘅一點，但係呢一方面亦都證明Clariar對細部處理嘅執著。電路板嘅電路採用厚銅箔強化傳輸，再加上松下同京瓷電容處理分頻，質素係唔錯嘅。

活潑爽快、精細敏銳

係我對佢嘅第一印象，因為同i640 嘅走向有啲差距，所以聽落成件事會好容易有一見鐘情嘅效果，比較明亮，聲音亦都更乾淨。

最大嘅分別來自低音嘅展現方式。之前係我嘅review入面都講過i640 強係低音嘅混響同分離度嘅還原能力，可以好容易係bass guitar同bass drum之間搵得返佢地嘅表現空間：而係i430 上，低音打擊力度更大，但相對佢嘅質感係偏向薄身，快收快放，所以衝擊力係有所收儉嘅。淺淺地一浸，細節有嘅，但就唔再係主軸了。

中頻得益於呢個安排，表現空間增大，同時維持相同嘅中性走向，明顯延伸性係較為清晰嘅，音場左右有拉闊左嘅效果，對於堂音、木腔聲等等嘅還原比較豐富，例如三弦呢類彈跳感強、延音多嘅樂器，或者ukulele，你會發現i430 係表現得好完整同好靚嘅。人聲主軸都係中性嘅效果，無咩好搶耳嘅地方或者尖刺位，而係維持純粹、樸實。質感唔會特別清，反而要濃嘅時候佢都俾到你，例如重播一啲比較厚聲嘅男聲咁，有喉底，有密度。擺位比較埋身，靠延伸拉返開，實際聽感都無咩壓逼感嘅。

整體就好似一對正統日系耳機嘅玩法，但原來未算最終形態。代理今次為i430 跟多一條D320 原廠升級線，以DTP-OFC線芯同超厚聚氨酯絕緣層製成，音色嘅走向都係以互補嘅方式呈現。配上i430，最大改變就來自低音嘅量感同下潛力，整體質感亦都有所加成，全頻表現更加順暢。呢條線係襯得幾好喎！