玩過MS5，就知道佢個filter換左之後可以有幾大分別。新品MS3，亦都承繼左”Hidizs Pneumatic Sound Turning Filter”氣動音管技術，一樣都係圈鐵混合架構，對比返兩者個價錢，咦，仲抵玩喎！質素會唔會有太大差異呀？

Hidizs MS3

嗱，音質上可能因為定位問題會做啲犧牲，但係喺金工、配件上，你真係一啲都唔需要擔心。

Hidizs獨特的金屬元素

Hidizs可以話由第一日開始已經好著重外觀同金工處理，好似播放器上面制位同收口位呀，邊角位呢啲都執得好正嘅。

開箱一刻，就會見到MS3嗰但光滑嘅磨砂面板，雖然由MS5嘅鬼面罩變成類似Batman logo嘅波浪紋，不過原本黑金色系嘅元素就得以保留，反而更加有嗰種低調奢華嘅觀感。

配件方面，耳機線無論插頭同線材嘅顏色，都同耳機本體襯返一套；我收到嘅呢套係用左4.4插頭嘅，Hidizs官網上就見到佢仲有3.5mm插頭嘅版本，香港入邊款就要睇代理安排了。

而因為沿用MS5嘅”Hidizs Pneumatic Sound Turning Filter”氣動音管技術，係包裝嘅第二層層就會見到另外兩款filter，分別係high frequency（銀色）及low frequency（紅色），同埋三套結構不同嘅耳膠。最底層仲有個盒仔，係一個黑色嘅便攜袋仔來。

「穩陣」的發聲架構

MS3 嘅規格我會形容為係「適當」、「恰到好處」。一圈兩鐵設計已經有好多對耳機證明係一個行得通嘅架構，不過MS3就特別啲，個兩粒鐵其實係一粒SWFK 31736複合高音單元，分頻上動圈負責中低頻，動鐵負責中高至超高頻。呢個設計令我諗起一對舊式圈鐵耳機，但以調音嘅成熟度而言，MS3平衡度高好多，起伏亦都保持得不錯，陣間會講到。

聲學設計方面，MS3亦非常簡單直接。動圈單元會放置係腔體內一個尺寸剛剛好嘅窿度，當粒單元一啪入去，就會獨立分離出前同後兩個腔室。前腔連接住動鐵單元所在嘅導管，與及用作釋放氣壓嘅回氣口；後腔就會係動圈單元嘅背面，亦都設有一個回氣口，係個外殼嘅頂部，用來導入新鮮空氣，俾動圈單元震膜工作時使用。

而粒動鐵呢，就放左喺導管最前最前嘅位置，正對住出口發聲；當動圈嘅聲波來到導管，就會同動鐵單元嘅聲波溝埋一齊。

閣下嘅耳道同粒高音動鐵，其實中間只係隔左層濾網。扭開濾網，就可以直接同粒動鐵say hi，你話性感唔性感。

差不多價位來講，呢個高音單元擺位設計，非常之罕見，好處當然多，其中就包括細節會突出啲，中高音能量感更充足，係素質方面贏在個起跑線，亦都成為MS3能夠達成Harman Curve曲線設定嘅基礎:

咩係Harman Curve（哈曼曲線）？

成日見到耳機產品用哈曼曲線來作為賣點，鐘意睇technical data嘅朋友相信會立即被吸引。事實上，哈曼曲線喺耳機界甚或音響界，都係一個幾有參考性嘅曲線來，因為呢條curve係Harman International嘅研究人員根據多位受試者嘅實際聽感整合而成。測試過程中會包含受控盲測，並且係有對照組嘅情況下（有受聲學訓練同無受聲學訓練嘅受試者），透過聆聽不同耳機，比較哈曼曲線與其他曲線嘅聽感並作出微調，最終集合世界各地多個樣本，得出一條「大多數」人都喜歡嘅頻響曲線。

哈曼曲線又有分兩種，一種係房間曲線，另一種就係耳機曲線，並且分為頭戴式耳機及入耳式耳機曲線，會隔一段時間做一次更新。而MS3參考嘅，就係2019年嘅改良版曲線。

當然啦，有跟曲線不代表啱你聽的，正如揀工揀著高人工，但工作內容唔一定適合自己；耳機，都係要實際試過先知鐘唔鐘意嘅。