Lime Ears - ANIMA
波蘭耳機品牌Lime Ears，都幾有萬綠叢中一點經嘅感覺，品牌主理人Emil除左對聲音嘅要求同睇法都同正常品牌不同，仲因為歐美品牌一向對出新品都唔算熾熱，反而好集中係開發產品嘅潛能同價值，所以係耳機市場中，Lime Ears呢個品牌，仲有啲神秘感添。（順帶一提品牌名稱Lime正係Emil倒轉順序來寫）
雖則新品出得較小，但唔代表無研發實力。唔講唔知，因為Emil嘅聲學工程底，Lime Ears係市場中最先對耳機內聲學結構作出針對性設計嘅品牌之一，好耐之前其中一款產品，第一代嘅Aether，就用到VariBore呢個技術，使用不同尺寸嘅導音管來調整聲音時間差同聲波輸出，令平凡動鐵都可以擁有更多色彩。
來到全新旗艦機Anima，唔只VariBore有升級，亦有Lime Ears係聲學上嘅另一重突破。睇Spec好吸引，所以大家一齊來睇睇先。
毫不掩飾的技術翹楚
Emil嘅其中一個身份係建築聲學工程師，主要職責其實就係幫劇院、戲院、音樂廳設計個聲學裝修，對於一個場地嘅聲波反射、混響嘅返應瞭如指掌，加上佢本身對遠場監聽喇叭嘅喜愛，你會發現Anima無論係聲效上定係設計目的上，都好貼近Emil嘅根本。
Anima嘅基本面，就係用左4粒靜電、8粒動鐵、1粒7mm鈦金屬震膜動圈三種發聲單元，合共13單元作為基礎，並用上左幾種特別嘅聲學結構同分頻設計來將佢地溝埋一齊。
Organic Horn Nozzle
Anima唯一一個可以俾你睇得到嘅技術，就係呢個特別設計嘅導管！當然，睇得到，又未必代表睇得曬，事實上呢個管道設計來自舊有嘅VariBore聲學導管，除左管道大少同長度會根據所接駁嘅單元同輸出頻段而有差別，從側面所見，導管係深入到腔體內嘅範圍。重點係，成組導管，都係由純銀鑄造而成！
再睇近啲，三個不同大小嘅窿對應返唔同頻段。最大嗰個窿係專屬俾靜電單元的，可以隱約見到存在於深處嘅靜電單元添：呢個窿係三個之中最淺嗰個，無加入任何聲學阻尼，超高頻係直接對準耳道輸出嘅，損耗極小，換來更加直接，更高效率嘅超高音表現。最細嗰個窿，就係提供俾全組低音發聲單元使用，除左洞口細，佢延伸出來嘅形狀亦都比較修長，令低音打擊力更強，同時亦有更加突出嘅延音表現。
更加意想不到係個工序：先用3D程式設計導管形狀，跟住用超高精度3D打印機打印個模具，倒入純銀定形，再經高壓水槍切割，最後用人手做打磨。就咁睇好簡單，實際上要係一件咁細嘅零件上做精工，要嘅係心機同好長嘅時間。講真，唔係咁多人會有心思去做一啲好細微嘅野，但對Lime Ears而言，或者就係「工藝」嘅應有表現。條管都玩成咁，仲有咩特別野可以做呢？
BADD™ Hybrid Low-End Technology
Emil仲有另一個身份，佢其實仲係一名低音結他手，所以對於耳機嘅低音反應同質感表現方面，你會係佢過去嘅產品上都見到係特別落左苦工。來到Anima，無例外地，低頻嘅設計係好大陣象嘅。經過無數次嘅測試，加上打電話問觀眾，由眾多Lime Ears用家嘅意見所激發嘅技術BADD™就誕生了。
呢個技術係透過兩種單元構成一個低音輸出陣列，取各單元之長來強化低頻音效。係Anima身上，就運用左四粒動鐵單元處理主要低頻輸出，結合另一粒7mm鈦合金震膜動圈嘅超低頻輸出，令到成個低音不單止有好強嘅punch感，亦有明顯嘅延伸同重量感，聽感亦都唔似你平時會係入耳式耳機度聽到嘅表現。
因為呢個特別嘅設計，可想而知，Anima嘅分頻電路係會有幾複雜。好彩嘅係，13粒單元係Emil手上都整合得好順暢下喎。
旗艦的樣子
由外觀到配件，都俾到人一種高貴、華麗嘅旗艦身影。
外觀上，Anima採用左一塊過嘅蛋白石面板，配上一個人手打磨，混有藍錄色系彩片嘅腔體，手工好到，你唔會睇到任何接合嘅縫隙，就算係腔體同導管接合嘅位置都處理得好細緻順滑。面板上最怕上左光油之後，logo旁邊會有氣泡影響觀感，Lime Ears係呢個位上都處理得好好嘅。
本體觀感靚，線材都一樣出色。與Viking weave cables合作嘅原裝線材，中分用上同樣嘅蛋白石鑲嵌同金屬材質，線芯用上銅鍍銀線，外層額外再包覆上一層石墨烯塗層，聲音流暢、細節突出。成條線材嘅觀感同聲音都係行優雅路線，同Anima好合拍，一套咁出街，高調得來，好有精品味道。
似喇叭聲音夠立體，動態反應好吸引！
開聲第一下好開揚，音場好闊身，唔似係聽一對入耳式耳機，因為佢闊得來，每一個結像都交代得到，每一件樂器都有佢自己嘅空間同位置，佢地之間仲有都幾清晰嘅距離感，而要營造到呢種效果，本身呢對耳機嘅強聲同弱聲對比都比較大，不論係樂器，定係錄音入面嘅細微支節，都有良好嘅還原：就好似收細光圈嘅中幅機，畫像之大，嗰個立體度，再加上極大嘅動態範圍，就算你係第一次睇呢部機出嘅相，都會覺得「嘩，好清，好密，好多野睇」，甚至仲會見到平時肉眼睇唔到嘅紋理添。
呢個就係多單元耳機融合得較好嘅情況下，應有的水準。
低頻雖然用到幾粒單元同時發聲，但實際上佢都收放得好自如。佢可以有一個好狂野、充滿力量嘅高強度音壓表現，亦可以成為一個舖墊，一浸浸咁，輕巧而靈動，主角當然就係個下潛力啦，由7mm動圈所帶動嘅極低頻，起伏感強烈，令到個場面嘅托底好穩定，低音鼓聲、弦樂，彈下彈下，最得意係聲尾有出現，都無話會阻到其他低頻效果，分得好清楚，塑造左一個好完滿嘅低音質感。
中頻唔散，修得比較順暢，無咩沙石，不過唔屬於厚度型嘅聲線來，以線條、銳利度為主，所以出來嘅效果較為凌厲實在，之前聽過Lime Ears其他型號嘅朋友，對呢個中頻表現應該唔會陌生，而結合左其他頻段嘅反應後，呢個組合可以令空間感更顯得立體，層次感豐富。
中高音過渡順暢，堂音充足，延伸非常足夠，靜電單元係呢方面都係強項來。Organic Horn Nozzle令高音中可能會刺耳嘅位置磨滑左，唔只聽感舒適啲，音色有亮度之餘，亦帶來左顯住嘅深度同微微顆粒感，鐘意聽鈸聲、銅管樂器嘅朋友，會好enjoy呢。
後記：旗艦級的注意事項
Anima配唔同耳膠，個轉變大到意想不到。原裝跟左Symbio W同SpinFit，個人係選擇用SpinFit為主，因為Symbio會令到個中高頻陷得比較厲害，聲亦較薄；Spinfit就尚算可以，三頻會均衡返，但結像力都未到最想要嘅地步。試左之後發現，其實最影響佢聲音嘅地方，會係耳膠嘅開孔大小，：開口太窄，會令聲音更集中，頻寬會窄左，會較適合小品靜態野，開口闊啲，三頻會逐漸去返均衡分佈。音色方面，硬膠同軟膠亦有影響，最開頭我仲試埋Final Type E黑膠，不過出來聲線比較疲軟。最終我係用左FAudio Premium+中碼，得出個整體表現最良好嘅聽感。
另外，輸出功率亦係一個要點，要令個低音表現得最好，同時三頻均衡，係需要一部比較有力、聲音實淨嘅播放器，音色上嘅走向反而不太重要，因為可以透過耳膠同升級線去配搭返，而且唔需要係旗艦身價嘅機，表現都可以好好。我就用左上次提到嘅山靈M6 Ultra，因為中增益加音量30，就已經可以去到理想嘅聲音形態，個人亦都好buy山靈咩都有嘅調音，兩者夾起上來係互補不足嘅反應來。
總結
Anima嘅聲學設計同單元結構，都係好有溍力同特質嘅，出來嘅聲音效果多玩法，但實際嘅音效就唔屬於係平常會聽到嘅入耳式耳機，不論係空間感定低頻嘅動感，你好難會搵得返同一類型嘅效果。個人覺得係現今市場中一個特別嘅存在，亦係一隻黑馬，只要有心，佢可以應付好廣泛嘅音樂類型呢。
唯一有樣野比較可惜，佢嘅單元分佈同聲學設計，令到腔體比較大隻，大部份朋友戴呢對耳機都會突出耳窩，小部份朋友戴耐左會開始有不適感。好彩嘅係，就算配唔同耳膠，佢嘅隔音能力都係非常好嘅。
Lime Ears Anima 規格：
- 純銀導管 “Organic Horn Nozzle™” 結構
- 混合式低音陣列BADD™ Hybrid Low-End Technology
- 13單元, 三混合配置, 6路分音
1x 7mm 鈦合金震膜極低頻
2x 超低頻動鐵單元
2x 低音動鐵單元
2x BA 開孔中頻動鐵單
2x 高音單元
4x 超高音靜電單元
- 手工製作腔體及 Bello Opal™ 完美蛋白石面板
- 石墨烯銅鍍銀線 (0.05mm*144strands), 對稱結構 (4.4mm)
- 手工真皮便攜盒
[Facebook Group] : [WEM 本地耳機及音響交流區]
[MEWE Group] : [WEM 本地耳機及音響交流區]
[Facebook 專頁] : Facebook WEM Media
[WEM Media 網頁] : WEM Media
