Hidizs AP80 Pro X
Hidizs一向都係迷你型headfi產嘅代表品牌，好似上次同大家講過嘅S9 pro同埋好耐之前玩過嘅DH80 dacamp ，相信大家都仲有啲記憶。咁今次咁快又出個文，原因係早幾日收到Hidizs嘅最新offer，算係係一個良好嘅產品線基礎下，改良而成嘅新機體。就係好多朋友手上持有嘅AP80 Pro升級版 - Pro X了。
以往我地對便攜播放器總會有越大就越好嘅錯覺；的確，體積大，可以容納嘅電子零件就更加多，亦有更多空間去處理濾波、電源供應等等嘅環節，理論上聲音表現係會更好。不過，早係Hidizs起家嘅時候，佢地就已經以微型作為主要賣點，連有一定年齡仲停埋產嘅AP200，都係一部好緊湊嘅播放器來，當時仲係為數不多原生使用雙DAC設計嘅Android機來添。
來到近年，Hidizs可以話係掌握左微型播放器嘅主要市場，原因係透過一系列唔同嘅外殼物料配合、專屬配件嘅強化，令一部外觀好細部嘅播放器都出到好聲音，仲充滿住好多唔同玩法：講緊嘅就係AP80，一部掌心大細嘅播放器，功能齊全，又夠曬緊湊的骰，就咁望個樣都吸引好多人去嘗試去玩。之後推出嘅升級版AP80 Pro，更係令一班尋求便攜好聲嘅朋友一個出手嘅理由。人手一部唔係假架，認真，我都有三部AP80 Pro係手，太好玩了。
時間來到今年，Hidizs就推出左小改版AP80 Pro X，繼續延續呢個微型機熱潮。
首先係外觀上，Pro X外殼就表現出Hidizs嘅強項，個殼嘅接合位好緊密，細節設計同Pro版亦有差別，機側兩邊型狀都唔同左，音量制位置仲加上額外嘅切割位，構成X嘅形狀！誠意夠嘅，因為要重新調整過CNC嘅切割路徑，而且工藝維持高水平，好順滑的。
Pro同Pro X最主要嘅區別，在於原先Pro版嘅兩粒ES9218P，升級為Pro X版嘅兩粒ES9219C，架構上沿用FPGA+雙DAC設計，透過重新擇寫FPGA編碼，令新機能夠維持高水準嘅+130dB 訊噪比，而聲道分離度亦比舊代提升30%，實際聽感亦反映出一個更加寬闊嘅場面。而AP80 Pro X能夠維持住一個咁緊湊嘅身型，亦都可以話係ES9219C嘅原生優勢，除左係因為呢粒DAC用電量會較其他DAC為低之外，亦因為結構上已經包含LDO設計，大幅縮減電路板所需空間，同時係根源杜絕訊噪！咁之後作為配合嘅電路就唔洗搞得太複雜啦。
解碼支援DSD256、PCM 32/384kHz呢啲基本野，不過新DAC能夠做到MQA 8x嘅展開，上代只有4x，一個小升級，若果係播MQA檔案的話，係會有分別的。
機體同時提供3.5mm單端輸出同2.5mm平衡輸出，相信都有不少人已經諗緊4.4mm呢個部份。其實唔洗擔心嘅，因為Hidizs仲有推出左專用配件DH80，係一個解碼耳擴來的，同AP80 Pro X簡直係一拍即合，仲有4.4輸出添。不過呢個玩法，力水係大左嘅，但就用唔到Pro X嘅新DAC設計，可以算係另一種玩法啦。有興趣可以搵下我嘅舊文章，有介紹過架。另外當然仲有PWAudio出嘅接地轉插啦。
連接界面方面，AP80 Pro X就幾齊全嘅。一個雙向藍牙，支援apt-X、LDAC、Apple Music Lossless呢啲比較新同熱門嘅協定。另外亦可以經USB令AP80 Pro X作為你其他設備嘅解碼器，用來插電腦呀、電話咁。
最後，就都要提一提AP80 Pro X嘅OS系統。因為運算能力嘅關係，呢部機用唔到Android系統，取而代之係用由Hiby提供嘅Hiby OS，使用上極之簡便，有MSEB呢個EQ功能，更有Hiby Link可以俾你用手機控制部機添。
跟住，就來到最重要嘅聽感部份啦。以推出時間來計嘅話，最早出嘅AP80，跟住嘅AP80 Pro，到近期岩岩出嘅AP80 Pro X，究竟三者有何分別呢？係呢度，等我用同一對耳機，同一首Daft Punk嘅Giorgio by Moroder，來試下佢地嘅表現啦。
先以AP80鋼版同AP80 Pro比較，其實單DAC同雙DAC設計出來嘅音質已經有分別。
Pro版會明顯地有一個更加精細嘅場面，所有野都交代得較為清晰，音場都表現得闊左同深左，令整體感覺更加分明細緻，亦無咁埋身。不過鋼版有個優勢，低音會厚重同打得深啲，中高音聽感都會暖身左，適合返啲發燒人聲嘅。講返Giorgio by Moroder嘅表現，AP80 Pro係前奏部分會表現得立體啲，俾到一個更加現場訪談咁嘅感覺，亦係呢首歌想表達嘅效果！所以由AP80升上AP80 Pro，你會感受到一個更高還原度嘅聽感，音色質感亦表現得比較全面。
來到Pro版同Pro X版嘅比較，呢個位就interesting啲了。主要嘅分別來自聽感嘅流暢度同寬鬆度。首先Pro X版嘅三頻之間，係會有更多細節連結住，當你夾一啲圈鐵耳機，或者好似我咁係落Spear Labs ASL 4.5嘅話，個互相協作效果會更加明顯。好似話首歌中段當Giorgio獨白緊接嘅段落，呢個位置Pro X會過渡得好順，個起承轉合連貫啲嘅；而Pro版係呢個位置，就會顯得兩個段落分拆左咁。當然咁細節嘅位唔會有太多人留意啦，但就好似坐過山車一樣，係因為個種連綿不斷嘅衝擊同回氣位嘅出現，先營造到個種咁大嘅刺激感，你唔連貫，中間停低左嘅，咁米無個種效果囉。以一個音樂感嘅考量點而言，Pro X係開心啲嘅。
另一樣就係寬鬆感，Pro版聲音線條同attack凌厲啲，收放都比較迅速；Pro X就鬆返啲，從容啲，係高潮位無咁大壓逼感，出得返唔同聲音嘅定位、細節，相對上調音會配合到多啲耳機，聽感亦比較舒適。咁我覺得呢個位就好見人見智，無話邊個出色啲嘅。
所以，到最後嘅總結，就出現一個好大嘅命題。作為現役AP80/ AP80 Pro用家，應唔應該升級呢？
答案係，若果你手持AP80的話，升級感係明顯嘅，你會聽得多左、完整啲、音樂感同個節奏感會更加出。如果你係AP80 Pro，甚至係特別版嘅用家，咁我又覺得無咩所謂嘅，係會多左音色上嘅豐富度同細微變化，但整體嘅聲音質感同結像係相近嘅，可能要試聽下先會知係米值得。
而未入過手嘅用家，其實考慮嘅點係零，基本上AP80 Pro X集輕便、易用、均衡好聲於一身，試問又有咩好挑剔呀～出左就好入手啦。
Sponsored by Hidizs
[Facebook Group] : [WEM 本地耳機及音響交流區]
[MEWE Group] : [WEM 本地耳機及音響交流區]
[Facebook 專頁] : Facebook WEM Media
[WEM Media 網頁] : WEM Media
