市場需要新意，而新意講求實驗，實驗又需要突破框架，而呢一切，更係需要勇氣同對市場嘅觸覺，可以話係要集天時地理人和。但當我上手呢對新耳機嘅時候，我都幾肯定，呢個型號，甚至呢個品牌，必定會繼續有殺著會推出。

呢對新耳機，來自一個新品牌MADOO，以平板單元做為品牌主軸，實行以一個更加新穎同突破既開發方式，帶來能夠歷久彌新既耳機產品。首發，就係呢對Typ711了。

Head-fi市場都靜左一排，呢兩個月終於都叫做有啲新型野推返上來。繼微型化靜電單元，由開初嘅gimmick，到而家實用性同音質上都能夠為耳機帶來明顯嘅音質表現，到今年第一對耳機應用微型平板單元技術，唔知會唔會又係另一個熱潮嘅冒起？

未來係點，我地都唔會知，但手握住MADOO Typ711，我就好似握緊左未來嘅某啲野咁，因為對耳機個設計，真係非常之獨特，由開箱一刻已經感覺到係一對非凡之物：第一眼真係會以為係錶來，之後再細心啲睇，原來係錶咁嘅樣嘅耳機。若果係以一個外觀設計上嘅點來睇，呢對耳機就行得幾前下嘅。

呢個咁有美感嘅外殼，係由具有豐富金屬加工經驗嘅工程師團隊負責，佢地都曾經為瑞士、日本嘅豪華手錶品牌，與及德國汽車公司，擔任開發刀具及相關生產等工作。通過高精度CNC工藝原塊不鏽鋼切割，加上後期噴砂處理，表面工藝極之幼細，邊角位車得好順暢，無吉手𠝹手之餘，睇返面板同腔體嘅接合位，都係緊密無凸起嘅，呢個金工真係無得輸，亦真係耳機界產品中嘅頂班質感來！戴上耳朵，壓力分佈平均，揀返岩耳膠就好容易有一個穩定舒適嘅佩戴感。

至於開箱一刻就會見到嘅透視結構，亦都大有來頭。鑲嵌係面板上面個塊，其實係一塊藍寶石水晶來，由專職生產豪華手錶同高階音頻配件嘅公司Adamant Namiki Precision係日本製作，除左係外觀上嘅考量，亦係體現到MADOO追求極致音質嘅其中一環；由於藍寶石水晶嘅高剛性，MADOO用左佢來作為控制單元排壓嘅一部份，所以唔只係觀感靚咁簡單架。

外在講完，就來到內在嘅部份了。Typ711採用嘅單元組合比較特別，用左三款全新設計嘅Micro Square Planar Magnetic （PM）平板單元負責低頻、中低頻同高頻，分別係PSM30101、PCM90202、PAM80303，三者單元體積、內部設計亦有分別，以針對不同頻段作出強化。除此之外，MADOO亦額外加入兩個訂製動鐵單元SBA50201，透過動鐵來加強中高音細節同速度感。

一體切割而成嘅腔體內部，亦時設計左用以放置單元嘅聲學室，稱為MIAA（MADOO In-Acoustic Architecture），集固定單元、聲學導管、降低諧震嘅作用於一身。係呢個大框架之下，MADOO 就透過使用高精度3D打印技術，製作出單元嘅支架同傳遞聲音嘅聲學管道，同MIAA嘅構造互相配合，從而令每粒單元係腔體內都可以處於最穩固嘅狀態；呢個聲學部件亦同時負責分配頻段輸出，透過唔同嘅管道孔徑大小同長度，解決單元嘅相位問題，更係兩款單元嘅音色可以完美融合嘅功臣。

另一個特點，就係Typ711嘅耳導管呈長橢圓狀，隱約仲可以見到3D打印而成嘅聲學導管。腔體近耳導管處仲有個額外嘅回氣口添。

採用Pentaconn Ear制式，跟機係會有兩條線嘅，一條銀色嘅3.5mm，另一條黑色4.4mm線，都係訂製嘅4芯銅鍍銀線。包裝亦都跟左一個藍色皮耳機盒、大中細碼三對跟耳導管形狀嘅橢圓耳膠、同一對耳棉。配件實用。

聽感

聲音表現方面，3平板+2動鐵嘅配置其實都已經註定左佢嘅命運，係需要同比較有力水嘅播放器捆綁埋一齊。我有嘗過用Hiby RS6來玩，係米就唔得呢？出來嘅效果其實比預期中好，只係若果去到編曲較為複雜，樂器比較多嘅場面，出來嘅效果就會令到你放棄呢個念頭。

播放器有穩定輸出下，Typ711係會有令人眼前一亮嘅效果。平板單元嘅優勢，或者音色上嘅表現，其實係正好處於靜電單元同動圈單元之間，高還原度之下亦有動圈對低音嘅加成，呢兩樣野係Typ711身上都存在，因此聲音素質係完全無問題。但更令人興奮嘅係，佢唔會有傳統平板單元個種「削」嘅感覺，即係好似無乜光澤，好平順無乜起伏嘅效果，而係係一個下潛好強而且豐滿嘅低音托底下，營造出鮮明，音色效果多變嘅表現。由弦樂到金屬樂器，每樣樂器嘅個種質感同光澤，都係好鮮艷嘅，最過癮莫過於聽交響樂，大鼓嘅深沉同震動、鋼琴嘅凌厲、小提琴嘅拉弦感同彈跳，仲有金屬樂器嘅鏗鏘，Typ711都好似將呢堆聲音加強處理後重播俾你聽，係好令人驚訝一對中高階耳機，可以有一個咁令立體同鮮艷嘅效果。

三頻有小小W嘅走向，連貫性都唔錯，無特別嘅凹陷位或者過份突出埋身嘅頻段，仍然維持到好似大型平板單元嘅個種深度。講起深度，Typ711嘅音場深度同結像表現，好睇播放器嘅推力，高電流可以令平板單元表現得更好，而呢個深度嘅變化可以由正常推力嘅live house尺寸，進化到大會堂嘅尺寸；主要係聲音大細對比都會有所加強，同時結像都會更加銳利，以此來構成一個幾優秀嘅空間感。好多人一直想搵返聽兩聲道嘅效果，呢一對就可能適合你了。

中頻，尤其人聲嘅喉底，還原得好仔細，帶有些微顆粒感，最正嘅位係聽男女聲合唱，或者音域比較廣嘅男歌手，由喉底到高音呢一段，Typ711還原得好順暢，好線性，就算係爆發性嘅衝高音，都唔會拉得太薄或顯得生硬，成個效果毫不費力，好從容，好有大師嘅氣派。

其實我最滿意嘅，係聽返Daft Punk，聲音收放好迅速，都係俾到同一種效果我，好順暢，好爆得！呢個位置亦都值得留意，好多曲風係Typ711上嘅效果都好岩feel