Clariar i640
日本品牌代表住職人手工、精緻、「匠」心，日本耳機品牌更係世界上數一數二奉行精品級工藝既地方，因此對於一眾發燒友而言，人生能夠收藏一對Made in Japan既耳機，絕對係退燒成就解鎖第一步。言而要係云云眾生入面搵一對鐘意既，可能就要花上唔小時間，尤其係未通關，又無咩日本品牌有代理攞返來做既時候，唔敢盲狙，怕運輸出事，又真係幾頭痕既～
與其係咁，不如就由本地代理入手既日本品牌上，嘗試搵一對岩口味既耳機出來啦！講緊既就係係我手上有段時間既Clariar i640，使用傳統動鐵單元配搭非主流內部聲學設計，將日本精品工藝再行突破！
至於點解係我手上咁耐？或者睇完呢篇文你就會略知一二。。。
Clariar呢個品牌非常年輕，但佢既主理人佐佐木瞭先生，係便攜音頻界就功架十足：曾經係殿堂級CIEM品牌Kumitate Lab（KL）既音響工程師，調聲手法純熟、經驗豐富，更係市場上比較旱期使用3D打印技術來強化耳機聲學結構既設計師，可見佐佐木瞭先生對於探尋聲學設計既突破與工藝上，都非常積極而且創新既。
來到品牌既第一擊i640，Clariar選擇帶來一對中高階純動鐵耳機，其中應用多項專利技術設計聲學部件，明顯區分出自家品牌同市場其他競爭對手既開發方向同技術力！
i640用左4路分頻6動鐵設計，組合上就比較特別，細分出低音、中低音、中音、高音既部份，而每個頻段都由獨特單元負責，配置上對於頻段既連接同衰減會更加順滑，有利整體既音色同細節還原。
Source: https://clariar.jp/
Clariar亦特別係低頻用上一對大型低音單元，加強低音瞬態反應，配合自家設計，係外殼上方既Rear Cavity Pressure Optimizer（R.C.P.O）交流氣孔，拆開就會有好似迷宮一樣既紋路，一細一大既氣孔減低氣流影響，同時為低音單元導入更多空氣，平衡腔體內氣壓，以此加強低音單元既音質表現。
High Density Porous Filter（H.D.P.F）高密度多孔介質聲學阻尼，作為i640另一殺著，用來解決傳統鐵環阻尼所帶來既失真。
耳機既分頻方式，除左電路上既分頻外，亦有物理上既分頻。物理分頻依靠阻尼將單元唔要既頻段吸收遮蔽，情況就好似加左層過濾器咁樣；不過，呢種方式作用下，其實聲音並無消失，只係由阻尼吸收左，若果音壓大既時候，因為吸收過量，就會令阻尼產生微弱震動而影響成個聲音既傳遞。
Source: https://clariar.jp/
H.D.P.F阻尼物料，由圖中可見，結構較疏，但纖維密度更高，容許聲音有更大空間通過，加長結構亦有效吸收更大量既聲音震動，實際作用有如將聲音疏導而非阻隔，重點解決左傳統阻尼較易帶來既聲音朦朧感。
耳機既內部結構同樣精彩。四粒獨立單元被安放係由3D打印製成既矽膠單元支架上，將單元所形成既諧震減弱，並傳遞到外殼吸收。做法上能夠提高動鐵單元既工作穩定性，亦都有效防止單元之間互相受諧震影響。
綜合以上，氣流、諧震，都有相應既技術應對，而且三項設計之間都有連結、有合作，為最終音質表現帶來一種突破傳統既感覺。講左一串技術，佢既成效究竟係點呢?
Martin Miller & Mark Lettieri - Purple Rain (Prince Cover) - Live in Studio（youtube搜尋啦）呢首歌，錄音同混音都上乘，樂器多樣，更有一位歌唱技巧非常出色既男聲Vocal & Bassist Benni Jud、同埋兩位知名結他手Mark Letteri同Martin Miller，對於成個Live既樂器還原度、兩支結他係歌曲前中後段既音色變化，鼓聲既力量同震動延伸、bass既清晰度同彈跳，每一個範疇都要求耳機擁有優秀既分離度與及音色穩定度，而發聲面比較細既動鐵單元，就更容易出現力度感失衡，音色變調等既聽感。
i640 保留左動鐵單元既獨有優勢：瞬態優異，每一件樂器既attack，都能夠做到切入清晰，由進入Chorus後各種樂器開始加入，井然有序，並唔會因為結他聲音既出現而令人聲渾厚；而係鼓聲既帶領之下，你仍能夠輕易接收到keyboard同Bass guitar既一層豐富既托底。係呢一種Live Band既演出之下，i640既調音成熟度，可以體現係個種一體但互有空間表現既效果，每一段聲音都可以有自己既發揮空間，同時又唔會分得太開而形成各有各玩既感覺，於是，就會慢慢令你沈醉其中。比起音樂感，呢種效果或者應該叫做代入感。
不得不提兩位結他手既表現都令人拍掌叫好。一支Ibanez，一支Don Grosh，兩位既彈奏風格又非常不同，加上各種音色既pedal effect，呢種不同既對比，係i640上既表現就特別令人著迷。尤其係當Martin Miller接手Solo一刻，音色對轉變明顯，厚度立即由淡轉微濃，彈撥力度亦有明顯分別。係多種微細節交互轉變之下，非常過癮，然後你可能要諗返轉頭先會記得，呢對只係6單元既耳機。證明左聲學配搭既重要性。
人聲可以話係日系機殊途同歸之地，i640當然都唔例外。
無傳統日系機既清新，i640既人聲演出好有彈性，唔會只著眼於一種風格人聲，而係能夠將大部份人聲為主既歌曲演繹得完滿，由Opera、到發燒人聲，到你完全估唔到既scream，佢都可以以一個穩定置中既狀態還原返俾你聽，當中既用氣、口水聲、喉嚨力度，縱使三種曲風各有特色，都能夠一一還原。你以為scream會乾冷尖？或者人聲貼面到係你個腦入面咁？無，佢地都係維持係一個健康既距離，適當既音色。
呢個距離，建基於一個有空間定位準確既全頻演繹，無論樂器再繁複密集，i640都能夠調整出適當既結像大小，重播每一首歌既時候，都可以令人聲維持住係固定既距離同範圍，有如漆黑中既螢火蟲一樣，永遠有佢自身既光度、溫度、能量、位置表現出來。
對比傳統既日系人聲機，或者就係呢一種平易近人同均衡感，令呢對耳機可以聽得好耐都唔悶；係唔同歌曲，又能夠帶俾你一種特別好聽、易聽既效果，ignore佢只係得6單元既設定，我個人覺得，就算真係新手買佢作為第一對耳機，都係一個安全既選擇來。
知但係…
係最後，有幾個要點可以同大定分享一下，因為同佢相處耐左，知得多啲野。首先，佢係一個MMCX插針既設計，對於市場上越來越多既2-pin耳機而言，係一有啲risky，所以係換線方面，需要留意下鬆緊既問題。原裝線既使用上就無咩問題，穩定既。
第二，就係換線既問題，i640對於線材係有一定敏感度，言而原裝OFC線既表現其實都好好，以原裝組合來講配合度好高，想玩得更開心，其實一條中性音色既平衡升級線就好夠玩，例如同係日系品牌既ORB新線，或者Brise Audio既中價線，PWaudio既Monile等等。
第三，亦都係最重要既地方，呢對耳機既外殼金工係好圓滑好靚既，不過要留意下佩戴時要較好個位置，等對耳機可以安穩地坐係你對耳仔上面，耳膠既選擇上，亦應該盡量令耳機緊貼耳朵，咁就可以戴得舒服戴得耐。
總結
i640，不多也不少，均衡雜食、細節豐富、聲音澄明厚暖皆可，係屬於一對好有自已character既耳機，因為，你發覺只要稍稍地逼佢作出改變，佢就會有失平衡既機會。所以係配搭上，先建議大家搵啲重於改進，多於改變既線材。
調返轉頭睇，要令一對耳機係每個方面都做到90分，需要既研發時間將會非常漫長，更要求開發者本人擁有足夠多既聆聽經驗，先會成功。Claria能夠做到，係實力既表現，亦令我更期待佢地既下一步。
i640 產品要點：
注重佩戴體驗的複合式鋁合金箱體
特製 High Density Porous Filter (H.D.P.F) 聲學阻尼物料、Rear Cavity Pressure Optimizer (R.C.P.O) 氣孔設計萃取低頻精華
Composite Housing Structure 混合式箱體設計減低不同頻段之間的干擾
面板經過噴砂處理，有耐磨抗指紋的特性，在光線下可以看出不同的光影效果
Sponsored by Soundwave Audio
i640 規格：
單元：動鐵單元 x 6 ( 2 低 / 1 中低 / 1 中 / 2 高音)
頻率響應：5Hz – 25kHz
靈敏度：97dB/mW
阻抗：14.2 Ohms
插座制式： MMCX
配件：4芯 OFC 耳機線、AET07耳膠、AET02耳棉、皮革便攜盒
建議零售價：HKD 9,980
[Facebook Group] : [WEM 本地耳機及音響交流區]
[MEWE Group] : [WEM 本地耳機及音響交流區]
[Facebook 專頁] : Facebook WEM Media
[WEM Media 網頁] : WEM Media
