唔講唔知，睇返資料，原來對上一次Hidizs出新耳機，已經係10個月前嘅MD4…感覺上時間過得咁快嘅？

Hidizs MS5

新品MS5睇到數字，就知道比起前作加多左一粒單元啦，亦係Hidizs產品中第一對用左五粒發聲單元嘅耳機，無論係內在啦、外觀定係功能性方面，都有所不同。接下來，就等我地詳細睇下佢，究竟係賣啲咩啦。

玩得Hidizs嘅，其實心入面都會有個概念，就係「大件夾抵食」，為左貫徹呢個主軸，一直以來佢地嘅產品都做得幾完滿，聲音表現有驚喜，或者擁有一啲同級、同價位產品所無嘅嘢。睇返MS5嘅規格同功能性，個人覺得Hidizs係入門市場浸左咁耐，都開始想一展所長，將過去嘅經驗整合做一件質素更高嘅產品，所以就咁睇對耳機個樣，就會感覺到嗰個野心。

巨型鬼面罩

過去我都主力係呢一段先講產品硬件規格嘅，不過今次唔得，事關呢對耳機個樣，真係幾剎食！

黑色搭金色、玫瑰金，不嬲都係一個型格同埋幾順眼嘅組合，而為左加強層次效果，MS5嘅面板就用上三層結構，上層係一塊過嘅樹脂，透過工具慢慢鏤空中心部份，雕塑出一個天使翼嘅形狀，不過咁，因為個配色嘅關係，我個人覺得似惡魔翼多啲。

中層就係一塊玫瑰金色嘅網板，視角上俾到一個深度感；不過呢對耳機唔係開放式結構嘅，所以呢層網板對聲音上並無實際作用，只係一個外觀嘅點綴來啫。

至於第三層，即係耳機腔體呢個部份，原來都有段故。Hidizs對於輕便呢樣野真係非常執著，所以係MS5嘅腔體度用左一種減重結構，最大限度地將腔體內嘅金屬材料挖空，係維持鋁合金材質嘅剛性之餘，大幅減低機身重量，再經過電鍍工藝形成一層硬質表面。成品集合曬金屬材料嘅優勢，硬得來又輕，質感仲唔錯添。

三者合一，靚仔嘅。

非主流。一圈四鐵架構

主流做法，一圈四鐵通常都會由動圈做低頻，另外四鐵就會負責中頻至高頻，用盡動圈單元嘅低音效果，而MS5嘅一圈四鐵，會由一粒動鐵負責低頻，另外三粒動鐵處理中高頻；咁動圈呢？實際聽感之下，佢係會同低音動鐵一齊處理中低頻嘅，好處當然係個頻段嘅過渡，同埋細節表現都會靚啲啦，亦可以夾到動鐵單元嘅速度感，個低頻可以tune得再豐滿啲！

MS5嘅動圈單元，係一粒Hidizs訂製嘅10mm 液態矽膠震膜動圈，震膜球頂鍍上0.03mm嘅Kevlar纖維做補強，加強返成個震膜嘅彈性同剛性，令佢反應更加敏捷。佢嘅回氣口擺左係耳機腔體嘅頂部，

MD4上嘅調音功能，MS5都有，不過做法就唔同，前者用啪啪制來改變分頻電路嘅設定，從而調整三頻走向，MS5就用左物理方式改變聲音特性，名為 “Hidizs Pneumatic Sound Tuning Filter 氣動音管技術”。

具體方法，就係透過可換式嘅耳導管設計，配搭包裝附送嘅另外兩對filter來調整出唔同性格嘅聲音特性。開箱個一刻，MS5係裝左Balance（玫瑰金色）耳導管，而只要輕輕好似扭樽蓋咁扭個耳導管出來，就可以換啦！呢個設計，比舊時要瞇住眼搵粒啪啪制來調聲，會就手啲嘅。

呢個扭樽蓋調音設計，算係市面上較為少見嘅模式，原因係佢對耳機嘅聲音基礎要求更加高，唔似用啪制調音咁直接對電路做修改，同時對粒filter棉嘅密度都有返啲要求：試想下，粒棉長左、或者密度同另一粒有啲唔同，其實對最終出來嘅聲音都會有所影響。相對地，對於用家來講，呢個設計係更加方便的。

另外兩款filter，分別係High Frequency（銀色）同Low Frequency （紅色），可以見到銀色耳導管嘅內部係無任何濾棉的，直出架！

跟住就係我扭開左耳導管之後嘅小發現：MS5係用左一個3D打印嘅聲學構造來整合輸出的，其中位於下方較為粗嘅出音管口，仲可以隱約見到入面個粒E50DT高音單元，擺到係出音管道最前面，正對住耳道輸出嘅。官方圖中其實可以見到成聲學構造仲包含機頂嗰個回氣口的，咁樣嘅設計，損耗高、加工難度亦高，係呢個價位嘅耳機上，真係好小會見到呢。

最後，Hidizs仲係MS5身上用左一套新嘅銲錫配方，加入左微量嘅金成份，加強返各個銲點嘅穩定性。

旗艦配件更勝從前

我諗配件呢樣野，係近年新產品中最被關心的一環，唔只耳膠，連帶出街嘅保護盒，都可能有幾個喺個包裝度…

音色舒服，配搭容易

MS5嘅第一印象比較平淡，中庸，無太突出嘅地方，但我幾鐘意佢恰到好處個種感覺，低頻嘅表現亮眼，厚身、一浸浸，有小小彈跳感，有啲似有一個subwoofer托住個底，慢慢包返住你嘅感覺，attack交代得清晰，起伏感都唔錯。聽感上，可能要就返其他filter嘅特性，調聲會比較大包圍，所以聽耐左，都不自覺想合埋眼休息下，係米唔好呢？其實呢隻聲，聽啲小品，純音樂放鬆下，都係一流架，不過大體上唔太適合我。

於是乎，我換左個low frequency filter。

咦，係唔同曬喎，質同量嘅表達都豐富左，超低頻再突出啲，動感強，好爽皮。睇返包裝入面嘅說明書，呢個bass filter係減弱左中高頻嘅一段輸出，令個低音突出返，聽感上會有啲細節小左嘅，但係唔算明顯；另外，呢個filter幾適合聽電音，近排John Wick咁出名，我都忍唔住聽返佢第一集嗰OST，中段係disco嘅槍戰，用呢對機聽，節奏感強烈，會即刻刺激到我想做下運動，推架單車出去踩返轉！

最後，就係換上high frequency filter。呢個直通嘅耳道管，其實除左出多左細節，聽感上亦都會令音場開闊返啲，樂器擺位更加清晰，由動感十足，轉變成較為優雅、開揚嘅聲音表達方式。係三個filter之中，high frequency filter俾返多小小兩端嘅能量我，低音嘅質量都不錯，平均得來，亦不會太過平淡。

總結

MS5呢對耳機嘅好處就係：易推、易夾、易帶出街，一條中階老鼠尾，出來嘅音質都係理想嘅，作為一對圈鐵結構嘅耳機，亦有相當嘅潛力可以發掘，買返部AP80 Pro-X，甚至係Chord Mojo 2，音質同音效表現都有明顯提升架。

不過呢，呢度仲有個重點要同大家講一講，當日我攞MS5返到來試嘅時候，都已經發覺到粒圈比較「硬頸」，聲音唔太放得開，係煲左約係50個鐘左右先開始進入狀態，個bass嘅力度同個起伏都交代得清晰左、實際左，唔會有種拖下拖下嘅感覺；再問返Hidizs嘅調音師，佢地之所以係動圈上用呢個物料配搭，正正係睇中佢越煲越有嘅特性...所以記得，係入左手攞返屋企之後煲一煲先，跟住換filter，個聲先會係準。

佢調聲上比較均衡內斂，所以對唔同曲風同檔案質素嘅包容度都比較高，「雜食」得來，又可以自行用更換耳導管嘅方式調聲，於我而言，都幾適合新手玩嘅，起碼Hidizs係現今便攜市場入面，都係一個有保證嘅品牌來呀。