影之虎 - qdc Tiger (香港特別版)
qdc繼旗艦級作品變色龍Anole V14（香港版）大概一年之後，近期推出新品，次旗艦作，有著旗艦影子之虎：
Tiger（香港特別版）
同一血脈，不同個性
其配置仿如變色龍（龍兄）Anole細佬，都係靜電單元加動鐵單元混合耳機，但單元數目比V14少，2個靜電單元加6動鐵的配置。雖然係少咗單元數目，不過卻又承繼大佬V14嘅分頻技術，4分頻4聲管專利技術，仲好似比大佬更易應付，Tiger（虎弟）阻抗只有15Ω，細佬顯得比較平易近人，人見人愛多啲。
外表、物料，“鈦”大不同
除咗內裏有唔同之外，外觀上更加同大佬有天淵之別。單單看耳機外殻物料，Tiger用上鈦合金一體成形而成，再加上qdc有著對做公模經驗，佢地公模產品出名係好fit大眾耳形，不容置疑。
再加上採用qdc超旗艦“藍龍王”嘅雕鏤空工藝，鏤空下層仲採用金色金屬托底，令到老虎紋更加立體同有層次感，盡顯qdc金工嘅功力！
香港獨家正相插座
qdc無論在國內和國外都係用反相插座，如果用家手上升級線係兩針正相的就要反轉插。如線材沒有耳掛還好，不過大部份升級線都有耳掛，反轉插反相插座的耳機外觀和配戴都有問題。 qdc特別為香港做了個正相特别版，益曬香港用家，此舉真係十分之窩心！
比旗艦更旗艦的配件
包裝外盒同龍兄V14一樣，都係金光閃閃。而入面佈局簡約而又隆重。耳機盒源用V14真皮圓形硬盒，仲跟多條可換插頭（2.5mm /3.5mm / 4.4mm）嘅升級線，唔理你有咩DAP都一樣可以嘆到虎弟Tiger
聽感與配搭
外觀講完，當然係要講下聽感。 Tiger對從數據上同親身試都一樣感覺，就係好易推。就算用老鼠尾去應付都游刃有餘，唔會覺得聲音同層次感不到位嘅情況。 不過認真mode去試當然不能馬虎啦，就測試用了三部DAP去了解一下由大力至細力嘅情況下會有什麼結果。第一set就係：
iBasso DX320 加 AMP13
喺只能用3.5mm輸出嘅情況下，仍然發揮到老虎的威力。靜電單元所帶來不單止係高頻開揚感，超高頻段更加顯得自然和更加立體。
Tiger令AMP13的Nutube 6P1真空管發揮得淋漓盡致！ 唔好以為動鐵就不能有高動態嘅低頻，就算只有3.5mm輸出嘅AMP13開到Mid Gain就已經有足夠嘅下潛能量感，如果用High Gain的話個低頻能hit得更加深，動鐵完全能夠carry到，不過整體低頻唔係狠勁嗰隻，而係斯文但又帶點勁度嘅方向。
人聲定位屬於適中至較前感覺，中性取向，深信如果換了條全銅線一定令人聲温潤度加强。口形適中，整體音場屬於橫向微橢圓形。分析力屬高至超高的級數，如果DX320加AMP13的用家，強烈建議選用Mid Gain去享用Tiger仔！
Lotoo PAW Gold Touch（墨菊）
墨菊出咗名聲音霸道，有好多耳機未必能夠駕馭到佢，不過Tiger總算同佢可以力爭到底！
喺配搭墨菊之下，建議用High Gain，因為實在十分之剌激。高頻段沒有俾墨菊反咬，反而Tiger個控制力可以夾到墨菊，高同超高頻段去到好盡，但又不會過火，又不會出現Over而拆聲或惡聲情況，個伸延度keep得十分之好，尾音可以last好耐同自然，聽結他聲Solo特別有投入感。
人聲定位同DX320有明顯分別，墨菊狀態下人聲正正中中的在整個結象嘅正中心，十分之正正中中，而口形屬正正的圓形，但不會好大大個的，屬於正常的人聲音場。性格係屬於中性又帶一點點點點乾性，聽Rap /Hip Hop歌會十分之入味同夾風格。
低頻屬快放快收型，速度感十足，不會拖泥帶水，完全唔臃腫，剛剛好到位。分析力同DX320類同，不過有啲細位墨菊處理得更加好，就連彈結他細微卒弦聲，結他pick彈嗰吓“啪”嘅弱音到能夠清晰聽得到。
Cayin N8II
我分兩部份講：電子管和晶體管
電子管：
Low Gain - Class A – P mode
用以上嘅選項，低頻包圍感有非一般的表現！完全唔似係動鐵出的低頻狠度同結象。無錯，係Low Gain，如果用Mid/High Gain中頻和高頻會過出，令到整體聽感失去平衡。温潤度係三部DAP之中最高的，因此會令人聲更加甜美和耐聽，高頻因而無顯得突出，修得特别圓，聽古典同交響樂會有加乘。
晶體管：
Low Gain – Class AB – P+ mode
呢一個mode係完完全全徹底剌激型，高頻去到剌激新高點，高至中高頻音場特別闊特別盡，享受電音就可以High到一個新高點！喺呢段嘅分析力特別高。中頻人聲屬中性偏冷嘅取向，低頻段速度感同收放嘅程度比電子管mode還要快，比較較輕盈，不過亦都有到位的下潛同能量感。
總結
無懼有一個旗艦級嘅大佬Anole V14嘅存在，Tiger擁有一個更親民嘅聲音。不但處理不同種類音樂都能夠有出色表現，在不同DAP下，都能夠發揮佢嘅獨特性。 雜食系耳機喺Tiger面世之後又多一個新的注腳，就係除咗能駕馭多種類型音樂之外，亦到能夠配會多種類型的DAP，在不同DAP配搭之下有不同的獨特表現，令到入耳式耳機的可塑性大大擴大同提高，一對耳機聲音上也可以有多種變化。
Tiger，絕對係雜食系的新指標！
Tiger規格參數
輸入靈敏度：105dB SPL/mW
頻響範圍：10 赫茲 - 50000赫茲
阻抗：15歐姆
驅動單元：單邊8個微型單元 (6個動鐵單元+2個EST靜電單元)
降噪： 26dB
耳機插頭：DM3合1可換插頭
耳機線：VX DM1.2M
殼體顏色：定制可選
技術特點：Multitube分頻專利技術
分類：定制型、標準型
Sponsored by Thinking Group
[Facebook Group] : [WEM 本地耳機及音響交流區]
[MEWE Group] : [WEM 本地耳機及音響交流區]
[Facebook 專頁] : Facebook WEM Media
[WEM Media 網頁] : WEM Media
