近來我既Review都特別有提到耳機既聲音「色彩」，就如執圖調HUE一樣，每對耳機演繹既顏色都有差異，亦係一個能夠用來分辨高階同入門耳機差距既主要因素；高階則色域廣闊豐富，入門則相對平淡同顏色集中，變化較小。

為左增加耳機既功能同本錢，市場上亦不乏可以「調色」既耳機，透過獨立控制調較分頻點或單元輸出，改變耳機既聲音。好處雖多，更可以延長耳機既Life cycle，但就非常考驗一間廠既調音功力。一對做得差既可調音耳機，只係暴露弱點，唔出好過出。

調返轉頭講，做得好既可調音耳機，就能夠成為耳機廠既技術體現。今日就同大家講下qdc Anole系列既新力軍 – 旗艦 V14！

V14，用以取代VX既旗艦位置，用到10粒動鐵單元+ 4粒靜電單元既組合，係qdc首度採用聲揚靜電單元既耳機。而無論內在定外在，V14都擁有濃厚既qdc血脈，係新品之餘，仲可以話係廠方既突破。

靜電單元設計已經唔算係新鮮事，qdc今次既V14後追發力，其實就同佢地過去既開發風格相似：比起追潮流，廠方更追求穩定、務實、中正。所以V14就直接用上聲揚第二代既雙推挽式靜電單元，對比初代既靜電單元，無論聲壓定驅動性都有長足進步。實際聽感上會明顯聆聽到靜電單元既獨特延伸、音尾，程度亦豐富，空氣感充足。

伴隨中高音音壓拉升，qdc亦透過訂制低音單元既方式，來強化低音輸出同質感。呢粒（或者呢對，qdc並無公佈單元分佈）既低音單元體積較常規設計大，內部結構亦相對加強，低音既量感、厚度都會比較豐滿。

或者你會話，咁若果我要低音靚既，點解唔用動圈呢？其實圈鐵設計，qdc一早已經推出左Uranus同Fusion，兩者既口碑都唔錯的。之不過去到比較高價、專業定位既產品，廠方就會用返純動鐵，或者好似V14咁既混合結構。係穩定性，配對精度方面，動鐵都仍然擁有明顯優勢，設計上更可以以多單元結構來提升耳機既動態表現，相對圈鐵配置而言又更容易處理耳機既空間要求。所以對於一眾producer或mixing engineer而言，反而係動鐵設計更適合佢地。

試聽Sam Smith 既 “Dance ('Til You Love Someone Else) “既時候，特別深刻。係Bridge段Sam Smith同各種電子樂器既合奏下，非常要求耳機對低音既力量及收放速度拿捏準確，每一次打擊之間既綬衝段更考驗耳機既整體平衡度，唔係成段就好容易會出現低音在前人聲下陷既感覺，主次變得模糊，更影響節奏感。

V14既低音戲份非常之多，由歌曲第一下打擊開始，已經能夠深深感受到V14對低音既獨到處理：鼓皮擊打有重量感，尾音圍繞中心點慢慢擴散，緊接住第二下，第三下…個人就不由自主咁開始數節拍。有如波浪，有起承，亦有自然既衰退，托底充足，表現出有層次既低音。V14既Mid-Bass令中頻質感更豐滿，頻段過渡順暢，再強力既打擊都無阻主唱既口型表現，爆發力依舊。

外觀及配件

外殼設計方面，沿用VX形狀，神奇既係放入靜電單元變壓器之後，體積同前作差別不大，貼合耳型，重量分佈亦平均，佩戴上無大問題。若果需要更為緊貼既配戴感，可以選擇比平常細半碼或一碼既耳膠，戴感就會更加深入。入手之後，慢慢roll下耳膠，搵返最對自己口味既聲音！

值得留意下V14外殼上既四路調音開關，係qdc特別訂制，可以見到左右兩邊既indication係同一方向，而且同腔體非常密合，手指過處無凹凸感；開關順暢，啪上啪落感覺爽快。

為求表現V14既旗艦身份，耳機用上專用夜光面板，以金色binding圈邊，聚焦出黑色既碳纖維紋理；當受太陽照射一段時間，或者以紫外光電筒照射，面板就會慢慢呈現出綠色既螢光光茫，觀感更加高調搶眼。想偷渡耳機入境既朋友，唔好俾V14見到光呀……會露出馬腳架。

另外重中之重，香港版V14係使用正相2-pin插針系統，原裝亦跟埋條12芯銅銀混編線，插頭為可換頭設計，提供埋2.5同4.4插頭，基本上開箱就用得。呢條線既音色效果同大部分調音開關組合都夾到，用家可以選擇沿用呢條線架。

跟住仲有埋圓型皮製耳機盒同6.3MM轉接插。

Anole之最－四路調音開關

成個系列既型號都設計左專用既調音開關，V14當然唔例外。用家可以透過佢直接調整耳機低頻、中頻、高頻，同新增既超高頻輸出，總共提供16種組合。除左可以根據自己既喜好來配置開關，亦可以以播放器音色走向為基礎，加減調整出配合度更高既聲音。

Source:http://music.qdc.com/News/436.html

為左加強四個頻段既契合性，qdc為V14加入左「相鄰頻段串擾抑制」同「相位補償」兩項專利技術，前者可以確保每一個開關都只會作用於自身既頻段範圍，而唔會干涉到其他頻段既輸出曲線；後者則可以移除多單元耳機常有既相位抵消問題，以此保持全頻連貫順暢。

實際使用上，個開關既可玩性極之大，更有甚者係將四個開關都打開，換來一個大結像、豐滿、濃厚而音色走暖既風格，聽結他非常出色，尤其木結他既腔音延伸同共振，完全盡收耳內。再詳細啲既敘述，就留待聽感部份既介紹啦。

聽感

話咁快就來到聽感部分。首先要先講一句，無論V14個開關點調都好，佢既聲音都會維持係一個有規矩既變化內；或者咁講，V14唔會將原本係橙色既野，變成灰色。

但呢個變化，卻係濃度、寬度既變化。當你希望某種顏色特別出彩，透過一個開關就可以令佢加深、加厚；你可以將V14轉化為一對人聲利器，係播放發燒碟既時候，令你輕鬆聆聽到口型變化、口水聲、或者歌手既用氣方式。當需要時，又可以以開關來換取更強力深厚既低音輸出，令場面顯得更深同震撼。

每一次開關都帶來唔同感受，開關組合亦無一個固定公式：於是就會出現十個人有八種唔同既開關組合，用於同一首歌。呢樣就係V14既煞食之處，你總會搵到一個岩自己既配搭。

作為搖滾控既我，對於鼓聲、結他呢一類型既樂器，需要清晰，要延伸，要盡得來唔會有壓逼感，因此係開關制既調較方面，會主用中頻開關為主，令結他聲音既發揮空間更多。開左之後，會明顯聽到結他既聲音結像會更加埋身、放大；中頻會佔據有利位置，結他既solo段落，轉換pedal後既lead音色將會真真正正地拉到前台，而呢個前後感會比起關閉開關時更加明顯。

至於新增既超高音開關，佢既作用主要就係令聲音延伸去到更盡。打開左之後，聲尾會更加明顯，頂端會有一個更加向外擴散既感覺。

聲音質素上，因著qdc既專業背景、老闆既賞樂經驗同埋眾多歌手、樂手、工程師既意見，V14既硬性指標係非常出色，配上靜電既自然延伸同中音、低音單元既配合，你好難會聽到佢出現薄、乾、冷、尖呢啲情況，每一個段落都處理得岩岩好；聲音均衡、空間感實在，而且三頻都比起過往產品表現得更加精細平均。音場縱深呢？聲音深淺層次表現得自然，兩端延伸寬闊，而且結像敏銳清晰，只要聲音一起，你就可以pick出佢發出來既方向同型態。

音色表現，無論係力量上既衰減變化，或者如結他手既演奏手法轉換，V14都能夠以最穩定既姿態表現出來。