Hidizs - Mermaid MD4
Hidizs出手，總有驚喜，由AP80的新版本Pro-X，到近期推出的Mermaid MM2，玩法多左，結構都進化左，開始搵到一啲非常規嘅發展方向。或者應該話，由當年的AP200開始，Hidizs就開始不走尋常路，或者正因為咁，成功取得發燒友注意。
緊接MM2，Hidizs依照產品線發展，推出全新MD4，一對使用四粒動鐵單元嘅耳機，配置看來平凡，不過玩法就多樣嘅。
金屬腔體，牢固結構
對Hidizs最強烈的印象，係嗰份成熟的金屬加工工藝，係AP80 Pro上不論鋁殼銅殼，工藝處理都非常得當，另一樣當然就係設計感方面，因為產品普遍外形的骰，設計效果都俾到人精品的感覺。
來到MD4，都係一個熟悉的4系設計風格：一個鈦金屬色的外殼，位於面板與腔體之間的金屬中框，再配埋一個有紋理的面板設計。MD4的中框、logo、同出音導管都轉為玫瑰金色，面板材質亦轉為一塊帶有漸變效果的賽璐珞。睇返官方資料，除了黑色，MD4仲會有白色及紫色版本推出。CNC而成的一體式鋁合金腔體，觸感順滑，形狀舒適，同時間可減低耳機單元有機會產生的諧波共振，降低失真。
細睇外殼上的組裝開孔，個人注意力會集中在MD4的特別結構 - 調音啪制的位置。因為開孔開得精準，你會睇到制位同外殼開孔的邊緣密合度很一致整齊， CNC出來的凹陷亦加強了外殼的層次效果。
聲學設計部份：3D打印技術加持
3D打印技術，係耳機聲學設計方面建樹越來越大，尤其係複雜的聲學部件、或阻尼結構，都會見到3D打印出現。結構上，只要材質揀得岩，一個3D打印部件可以充當幾種不同的聲學作用。
MD4上以四粒自行研發的訂制動鐵單元組成，用來配合新加入的調音啪制組成多樣音色。一粒高音、一粒中音及兩粒低音單元，透過特別設計的聲學部件組合而成，用以固定單元，吸收諧震，部件內的導音管經過計算，有效減小單元輸出之間的重疊干擾，打好輸出基礎。而因為聲學部件已經充當濾波，管道中並無再加上額外阻尼，直通嘅。
三分頻設計，將能量合理分佈，主要為左配合調音功能而設，確保返調音開啟時頻段過渡銜接順𣈱。有呢個調音啪制，MD4可以提供四種偏向不同的風格表現，玩法由此而來，而無論點啪都好，聲音框架都會保持一致的，唔會話有啪完就變左另一對耳機咁。
啪制設定，有數字的方向為off，寫住on的，當然就係on啦。以下係官方推薦各個模式岩用嘅曲風。
標準模式 (1 on, 2 off)：適合大部份人的風格
氛圍模式 (1 off, 2 on)：流行曲、民謠類
高頻模式 (1 off, 2 off)：搖滾、電子音樂類
低頻模式 (1 on, 2 on)：交響樂、古典樂
跟機附件
MD4跟機有三種不同風格嘅耳膠（人聲、低頻、均衡），SML三個size合共九對耳膠。
另外有一個方型皮質便攜盒，PU皮入面加左鐵片強化，有磁石扣，絨布內襯，安定性同保護性都不錯。
跟機有一條四芯銅銀混編線，彎頭加埋定形耳掛，整體來講戴得舒服的。
仲有一支清潔棒，因為呢支棒同時係用來調嗰啪制。除左呢支棒，你都可以選擇用卡針來調音嘅。
聽感分享
講完嗰樣同結構之後，一對耳機最重要嘅當然係聲啦。聽MD4，講真，第一耳唔會有太令你留戀嘅地方，即係無個種搶耳嘅效果，同埋調聲上因為要就返各個啪制嘅效果。
標準模式
聽感上比較嚴肅，保守，個種打擊感並未好中我，不過個音場闊度其不錯，而且低音的punch感相對其他動鐵而言，平衡到效果與素質上的表現，不會太著重下潛而失去彈性，整體聽感，樣樣都有啲，十分齊整，亦都有動鐵比較強勢嘅細節表現。
氛圍模式
氛圍模式的主要側重點在人聲的部份，中頻的比例會加強，人聲口形較大，較埋身，同時間人聲的細節會更加突出，令你更容易聽到歌手的唱功技巧。不過咁，相對空間表現比較密，樂器較多嘅編曲會有點逼，聽舊時代流行曲會適合嘅。
高頻模式
雖然叫高頻模式，但實際聽感下，低音比例不會減得太小，中高頻會比較突出，兩者配合下空間感闊返一點，人聲的結像維持清晰，口型與標準模式差不多。聲音比較有逼力，中高音Attack加強，係一個偏向刺激一點的聽感。
低頻模式
明顯聽得出低音量與彈性會更好，例如kick drum會有較多迴響的效果，托底會較為豐滿，連帶人聲喉底都會多了一浸厚度。雖然話加強左低音輸出量，但係亦唔會有下下揼心口的感覺，唔會滲到中頻而令結像模糊，整體加強左氣氛同力量感。
總結
綜觀現役市場，眾多入門品牌都轉戰混合式耳機，聲音構成都著重以強烈嘅抑揚頓挫取悅聽眾。MD4就以比較中性的音色獨步市面，看重功能性的、想要點不一樣的聲音取態的，都可以一試。
其實在玩啪制之前，自己還嘗試過不同耳膠的配合，有時選定一個模式，配不同耳膠，反而更加中某一類的歌曲風格，因此配搭上可能性都頗多。配返同廠AP80 Pro、AP80 Pro X，甚至再大力啲嘅DH80，提升方向都適合MD4，亦唔會有推過龍的問題。一個套裝，都好夠聽嘅。
產品規格
型號：MD4
產品名稱：純動鐵四單元HIFI監聽耳機
耳機類型：入耳式類定制耳機
外觀：純鋁合金CNC一體成型，玫瑰金中框，賽璐珞面板，鋁合金音管
可調音開關：4檔選擇（標準，氛圍，靚麗高頻，動感低頻）
單元：Hidizs訂制動鐵單元
單元分佈：高頻 x1，中頻 x1，低頻 x2
內部導音結構：高精度3D打印，直通聲學導音結構
頻率響應：20Hz – 40KHz
輸入靈敏度：102dB（@1KHz）
阻抗：8Ω @1kHz
額定功率：3mW
插座制式：0.78mm 2-Pin
線材：高純度銀線和高純度無氧銅4股混編，線長1.2M，3.5鍍金插頭
配件：耳機線 x1條，皮質耳機收納盒 x1個，耳膠 x9對，說明書 x1本，保養卡 x1張，清潔棒 x1條
Sponsored by Hidizs
[Facebook Group] : [WEM 本地耳機及音響交流區]
[MEWE Group] : [WEM 本地耳機及音響交流區]
[Facebook 專頁] : Facebook WEM Media
[WEM Media 網頁] : WEM Media
