便攜播放器，我地就真係玩得多啦，但近年來老鼠尾風氣越來越盛行，間間廠都開始密鑼緊鼓，準備推新野，可望年底前就會有一片老鼠尾海，而且個個都身懷絕技添！

除左全新電路設計或者係內在結構既各種神仙打架之外，亦有好似Hidizs一派既廠家咁：既然個設計已經做到夠好，不如就直接係呢個基礎上再行改進啦。講緊既就係岩岩新出既超改良版—S9 Pro Red Copper，全球限量500隻既銅殼特別版，相信已經有唔少朋友想知究竟換左個殼之後有咩分別，就等我來同大家分享下啦！

Hidizs既出品，近年來都圍繞住輕巧萬能機體既方向發展，其中就有好出名既AP80系列，大玩不同金屬物料，與及之後推出既西裝DH80，成為迷你一體機先河，可以話係踩正市場極致便攜既潮流。今次係名作S9 Pro身上再次推出red copper版，相信都係為左一班期望聲音同便攜性達到更佳平衡既朋友，一部手機，配合唔同串流服務，就能夠得到足夠好聽既組合。

S9 Pro Red Copper既外觀維持同同類產品相似既長方型，不過就瘦啲薄身啲，稍微墜手，不過用得紅銅殼都早有預料。講到外殼，由CNC一體成型製成，再經打磨拉絲，上埋coating，質感非常優秀，帶點華麗同高貴感，成個外殼都非常順滑無凹陷：Hidizs既金工方面的同設計確係強勢之處，空隙誤差等等亦都控制得宜，加上機身無按鈕既設計，成個package更加緊湊，相信都唔需要太擔心耐久性既問題。

採用Type-C作為輸入界面，支援PC、MAC OS、iPad OS、iOS、Android系統，跟機包裝有齊接駁電腦同Android手機既Type-C線，而iPhone使用既Lightning線就要另外購買；另外仲有個背夾，用來將S9 Pro Red Cooper夾係衫袋、褲袋，或者夾係電腦機箱既邊角位？

S9 Pro Red Copper採用ESS9038Q2M解碼，支援最高32/768kHz同Native DSD512。除此之外，對比舊代S9，推力有小幅提升，失真亦都控制係平衡<0.0012%@32ohms既水準。小巧體積同時提供2.5mm平衡輸出同3.5mm單端輸出，聽電台得，推力亦足夠作為小小既悠閒head-fi配置，應該cover左大部份人既便攜需要了。

應用操作上都極之方便，iPhone或Andoird機既話只需用返對應線材就能夠識別，PC既話可能就要係聲音設定度揀返輸出裝置，都唔算太難。裝置認到之後S9 Pro Red Copper機身上既Hidizs logo就會著LED燈，同時係播放唔同sampling rate既檔案時，會有唔同既顏色顯示，咁用家就可以根據燈光，確保輸出既取樣率係咪正確呢；個功能亦非常適合砌左RGB光害電腦既朋友使用，不過佢就無得做其他燈光effect既～

燈光代表既取樣率：

黃： DSD64/128

紫： DSD256/512

藍： PCM176.4/192(Khz)

紅： PCM 352.8/384(Khz)

白： PCM 705.6/768(Khz)

綠： PCM 44.1/48/88.2/96(Khz)

比較S9 Pro普通版

先講下作為baseline既S9 Pro既聲音特性。其實以聲而言，S9 Pro既質素已經唔錯，原因係第一下聽感已經有一種好平衡既感覺，無誇張既分析力，但亦都無個種空洞感，聲音形態實在，音色微微偏暖，三頻均衡，樂器細節有、結像較大而清晰，邊緣位置亦交代得當，唔會過份谷大件頭而令音場偏向平面，呢堆優點已經令S9 Pro更值回票價。由普通插頭轉為S9 Pro，低頻既提升會係最為明顯，尤其當遇上圈鐵混合型既耳機，兩種單元的連貫性會更加好，同時低音都唔再有聲無力，俾得返punch感同attack，整體係朝住流行曲方向去做調聲既。

而成個結構都同S9 Pro一樣既Red Copper版，三頻走向當然都係相似啦，但實際上你聽既時候就會發覺到個差別。

銅殼既好處，可能大家唔太清楚原理為何，只知道「真係有分別」。其實外殼材質對於接地既性能有相當影響，而不同材質既屏蔽能力亦都有差異；銅呢種材質正正係屏蔽性同傳導效能方面更加強既物質，因此有為數不小既Head-Fi到Hi-Fi廠商，都會選擇用銅片、銅殼等等既構造來做機內重要零件既屏蔽。

實際落到S9 Pro Red Copper上面，你會明顯聆聽到個種特別既效果。結像呈現幼細凝聚，你會聽到佢地有各自既空間去發揮，而且結像穩定清晰，就好似對岩左focus咁樣，力度亦表現得更強更豐滿。

大部份既聲音都會得到呢種昇華，變相整個空間既營造更加自然同合理，聽返近排成日聽既Adele 30 – Easy On Me，琴鍵鏗鏘有力，延音更加豐富，Adele既聲音置中而聚焦，邊緣收得順滑，琴音同人聲做到小小分隔，有如打左spot light既效果，有一種華麗小舞台既感覺。呢樣係普通版上既表現就會遜色啲。