簡單易用，即插即用，方便性同便攜性已經佔據我地生活既大部份，尤其係當你嘗試到便利既甜頭，就好難返轉頭。綜觀市面上越來越多品牌推USB便攜解碼耳擴（J、手指仔，太多名號，但你懂的），就證明左輕巧方便既便攜音響市場，極具潛力。

而科技日漸進步既好處，就係擁有巨大潛力既市場會衍生出更先進、更多元化既產品，例如今次所介紹既樂彼（Luxury & Precision）W1與W2，無論硬件、功能性、重播質素，都可以視為新型USB便攜解碼耳擴中既指標之一！

回顧過去既便攜手指仔設計，不難發現，要係有限體積內安放不同既音響硬件，必有取捨：可能係插頭既選擇（2.5/ 4.4mm），或者係音質上既妥協（手機用小型DAC vs 完整版DAC），意味住電路結構上同內部空間運用上，其實尚有大量的上調空間。

而與市場普遍品牌對手指仔既定位不同，樂彼對產品品質同音質既專注度，令佢地係開發產品既時候都懷住「一係唔威，一威就要龍咁威」既態度，將W1同W2既設計同空間運用發揮到極致。

Luxury & Precision W2採用左一對CS43198 DAC（W1係一粒CS43198）作為基礎，內部仲擁有兩種針對性設計既微型處理器，USB接收晶片，時鐘晶振，同埋一對高功率耳擴晶片，但體積相對市面上既同類型產品，未見特別大或厚。只看spec sheet，W1、W2接近入門級播放器既硬件設計同數據，確係令人「想入」非非。

輸出界面以手指仔而言比較豐富。兩者都提供4.4mm平衡輸出，特別用上由日本品牌Pentaconn生產既4.4mm母座確保連接穩定；另外3.5mm單端插口亦同時擁有SPDIF同軸輸出功能，能夠將W1/W2既使用層面擴大，例如再外接家用座枱機，咁就可以盡用手機既便利性同大機既音質啦。

輸入方面，使用Type-C介面，附送Type-C OTG線材同IOS用Lightning線材各一：廠方特別提到，因為Apple Lightning系列產品都有限制插口既電流輸出，令以往既手指仔都會遇上供電不足既情況，而令動態表現、音質對比Andriod手機落差太大。W1/W2所附送既Lightning線材，就特別針對呢個問題作出改變，令iOS設備都能夠提供足夠電源推動佢地。

外觀上，W2著重專業、高級既感覺，黑色磨砂機身加埋背面既碳纖維底板設計，比起往時產品個種方方正正既陽剛味，W2比較紳士、優雅，線條無咁銳利，整體既觀感襯得返個小型機身。W1用上銀色既亮眼設計，同佢既音色表現一樣咁亮麗，無W2沈穩既配色，相對音色上都較為活潑。個人比較鐘意W2既配色，作為一個佬，都係黑配黑襯我。

W1/W2既操作，依靠機身上既三個按鍵同個屏幕仔控制。短啲個按鍵係開關屏幕，長按就可以進入MENU：長個邊按鍵負責大細聲，長按可以係MENU入面上下選擇唔同既選單。揀岩選單，再次按短鍵就可以選擇唔同既EQ，on/off切換。就係咁簡單既姐。

根據返機內既說明，選單分別代表：

EQ：7種唔同使用場合既FPGA EQ

GAIN：增益

FLT：DAC既數碼濾波

SDF：耳機專屬調音

Tune：樂調音 01，02

SPDIF：同軸功能開關

DISP：屏幕自動/手動開關切換

HIDKEY：音量調節方式

可玩性

上面提到W1/W2擁有兩種微型處理器，其一係專門用來處理USB 數碼訊號同W1/W2既內部系統，另一種就係呢款產品另一重頭戲 – 專職DSP處理既FPGA晶片。

要解釋FPGA既用途，可以將佢比喻為一幅拼圖：FPGA係一個畫板，外框（處理速度）限制左可以放既圖畫大細。只要作者（工程師）有能力的話，FPGA可以俾你隨意添加不同既拼圖（功能），最終拼湊成一幅圖畫。比起傳統既CPU處理器，FPGA耗電量、體積、發熱量都比較低，而且仲有極大彈性可以加入自己想要既功能。所以，樂彼係近年既產品中都積極開發FPGA唔同既功能，編程能力可以話係經驗十足。

加入左FPGA處理之後，W1/W2就提供左唔同既調音選項俾大家配搭，亦係我上手之後覺得最加分既環節：

1）獨門EQ處理：W1/W2都有既模式，同傳統意義上既EQ處理不同之處在於，由專門既FPGA模組獨立處理頻段走向，並且結合其他既DSP處理而得出最終效果，質素與及失真都會保持得更好。內置總共有7種EQ，例如曲風類既 ”Jazz”、”POP”，或者特別場口會用到既 “Game”、”Movie”。故名思義，Movie模式就係俾你用係on the go既Netflix，youtube播放上：實測 Netflix “12 Strong” 中，尾段既一輪空投轟炸片段，對比Normal，低音同槍彈聲清晰有震撼感，定位凝聚但稍遠，人聲對白都交代得清楚！

2）耳機專用調音 – 樂彼官方為耳機特別訂制既專用調音，而家暫時就有Shure SE846，JVC Fw10000，同埋Beyerdynamic Xenlento既專用EQ。

3）W2樂調音模式 – 只有W2有既功能，提供Tune 01及Tune 02兩種選擇。比起耳機專用調音同EQ，樂調音主要透過FPGA算法，將音訊檔案以另一組編碼方式來處理，以此帶來音色上既轉變。Tune 01既聲音從容、暖潤，Tune 02線條感立體感都更加強，不過最終要用邊個調音，都好睇你配邊對耳機。

因為以上三種模式都係係FPGA既DSP層面上並行運作，所以用家可以同時使用三種調音方式，甚至配埋DAC內置既數碼濾波設定，就能夠係更多層面配搭出屬於自己既最終音效。

因為聲音組合實在太多，只能以某幾項我常用既配置，話俾大家知呢對兄弟既表現如何。

先講講W1同W2原裝既聲音分野。其實兩者既調音方向，恰巧就代表左樂彼早期同近期既聲音表現：W1性格活潑、好動，細節清晰豐富，而且擁有較強既線條刻劃，比較硬朗，係一種好年輕同充滿躍動感既聲音。W2第一下聽起上來，細節好似無W1咁多，但其實佢細微位、光澤既表現方式，有強有弱，變化較多，尤其係樂器既表現同厚度既表達上，W2無疑係更加成熟。兩者既音場，W1寬度較強，W2呈現健康既圓形，內容飽滿。深度同結像方面，W2表現得比較凝聚，聽感上亦比較寬鬆。

至於只有W2上有既樂調音模式，兩者既聲音變化都係明顯既。以iPhone XR配搭3DT HK Special+ 測試，Tune 01口型較大，聲音收結平順，有較多既聲尾同泛音，中高音既光澤較圓滑，低音所營造既包圍感，稍微令中頻表現出溫潤、易入口既聲音特點，整體既節奏稍慢，但比Tune 02既聲音係自然啲既。Tune 02收放更快且有力，低音下潛得比較明顯，聲尾較短，但聲音連貫，結像凝聚，樂器既彈奏手法交代得較清晰。轉換兩種Tuning時，未聽到明顯既聲音壓縮感或者有斷層。

背景黑、乾淨，就算將3DT換成更敏感既動鐵耳機，都係聽唔到個種電噪 ”sisi聲”。輸出能力應付入耳式耳機，部份易推既大耳牛都夠力，不過去到平板、氣動式單元等等既耳機，就真係會腳軟既… 不過最難得既係咁細既體積，能夠將手機或者手提電腦本身既干擾隔絕，成個電路既設計同構成就非常令人欣賞。

總結

W2憑住佢既實力、功能同使用體驗，令人印象深刻，尤其係音質表現方面，聽起上來真係可以取代一部入門既DAP，底噪接近零，機上既EQ又帶左唔同既玩法俾用家，優勢甚大。而W1既表現，音質表現可能無W2咁全面，但價錢比較相宜，而且EQ功能一樣存在，用來作為中高階DAP既一個後備亦無不可。兩者都能夠取代你手機或者手提電腦所提供既轉接方案，至於應該選擇邊一隻便攜手指仔，就要睇下，作為音樂愛好者，你對價錢同價值既平衡係點樣衡量啦…

W1建議零售價: $1,588

W2建議零售價: $2,388