SPEAR Labs既超高熱度，其一既原因係Dale Lott既精神同破格設計加持，其二係佢地推出既產品實力係好有越級挑戰既效果。究其原因，離不開聲學結構上既前膽性，加上Dale絕頂既調音經驗，而令成品擁有多項優勢，亦有獨特性。

所以當SPEAR Labs推出ASL 4.5之後，令我更加期待既係，Dale究竟仲可以係呢個傳奇結構上加上點樣既元素，令佢更加昇華呢？以下就等我地慢慢細味下。

ASL 4.5沿用「大底」加「動鐵」既單元組合：所謂大底，正正係ASL 4.5既靈魂技術SHOCKWAVE™ 系統所在：一粒14.2mm動圈，採用全新 1.1mm超薄振膜，再配合 N52 釹磁鐵製成只有 3mm 厚既結構，令整個單元體積大大降低。由腔體外細睇，已經見到呢粒單元係非常之龐大，鐘意睇到耳機細節既朋友，應該會非常受落。

SHOCKWAVE™顧名思義，衝擊型既動圈，因為震膜薄得來震動範圍大，令單元既低音至超低音還原能力特別強、豐厚，最明顯既表現就來自於個個緊致同潛得頗深既初步聽感，潛力係高既。Dale今次對動圈既調整就相對舊世代作品有所收儉，但質感表現反而有過之而無不及，對我而言係好新奇有趣既體驗來。

另一環節就要講到SPEAR Labs既Hybrid-Acoustically-Balanced Universal (HABU™) 通用混合式平衡聲學技術，同SHOCKWAVE™係一個相輔相成既聲學結構來。SPEAR Labs以3D數碼技術，設計出一個可以同時安置動鐵同動圈單元既聲學室，一個類似漏斗形態既管道將兩者既聲波混和，並且作為其中一個調音手段：呢個聲學室並無任何既迷官結構，而只係一個形狀上既變化，簡單而純粹。而更純粹既就係，ASL 4.5所使用既動鐵單元係無分音設計，即係兩種單元完全透過物理手段同單元本身既可用頻響來做分頻，實際聽感之下，你會聽到呢對耳機既聲音轉折過渡係流暢既，亦都無一啲尖刺位影響聽感。不得不佩服Dale既心思同耳機設計上既突破

同舊代同樣結構設計既型號相比，首先ASL 4.5既出音管長度同形狀都有分別既，更加短身，更加緊密；另外就係動鐵單元既導音管設計，ASL 4.5係直接向主導管發聲，前方除左有一塊黑色纖維擋住之外就無其他阻隔，令單元既聲波傳遞空間大左好多。體積上同樣受益，因為動圈單元更加修身，而且導音管設計得更加緊湊，無論係耳管既長度定耳機既形狀都比較合理，佩戴感係舒服同貼服既。

同SPEAR Labs自家產品比較之下，ASL 4.5就係出音管前多左一份白色既纖維同濾網，相信除左係擋住灰塵之外，對聲音亦有一定既調整作用。

ASL 4.5既外殼體通透明，內裡單元一覽無遺，原因係用上SPEAR Labs自家配方既結晶樹脂，除左令外殼無咁易變黃，其實材質亦有一定既聲學特性：因為結晶樹脂分子結構排列得整齊，有如人牆一樣緊密連繫，所以一般亦有硬度高，耐磨等等既好處，係一個良好既聲學反射物料來。而靠3D打印同人手打磨兩種工藝既配合，外殼亦都幾光滑架。

配搭性

聲學結構同單元設計更新，對耳機既推動性同聲音銜接都有幫助。

首先對前端既要求係大幅降低既。對比舊世代Dale作品，ASL 4.5既動圈相對而言更易有良好既衝程同敏捷度，就算係配上而家流行既便攜手指，都唔會有個種拖下拖下、唔夠氣力既鬆散聲音。鼓點係會打得無咁深，但力度同分離度都係唔錯既，甚至個bass line個人覺得，都幾靚添。不過都係個句，始終係圈鐵，仲係一粒咁大型既圈，其實只要餵得佢多，佢亦都會相應俾返更加多既野你。簡單啲講，呢對耳機，下限高，上限更加高。

至於音色配搭，目前為止大部份播放器同佢相處都無咩問題，不過因為ASL 4.5本身都屬於活力型既，個人就配返啲音色微偏暖既播放器，好似墨菊呀咁。Cayin N6ii ti都唔錯，因為質感上面會有加成既。

關於煲耳機

SL 4.5既煲既過程係咁既，一開始變化會頗大，基本上播一個晚上，第二朝已經會聽到低頻無咁緊同埋多左層次。跟住就會開始踏入穩定期，低音既彈性同控制力都會越來越好，中低音接軌更加流暢，同時低音下潛會更加有力迅捷。

不過，我本身無話用啲咩大推力枱機來煲，就係想試下會唔會煲唔起，所以係用左部Hiby RS6既平衡輸出來播既，成效都唔錯，有興趣既朋友就唔需要擔心呢個問題呢。

聽感

ASL 4.5既動圈表現係魅力所在，因為呢粒圈唔係一味轟落去隻耳仔度，而係一種幾高手既表現方式。首先動圈先天上，係還原聲音質感方面有優勢，相信亦係Dale一直守護住呢個大底組合既原因，而係ASL 4.5上既低頻，沉穩同奔放可以同時出現，因為個低音既attack係力度明顯得來亦偏厚，例如低音鼓既打擊重現，凝實而且有迴盪既聲效，緊接而來既延伸亦都補足左彈性同質感既表現。

低音厚度同深度都拿捏準確，加強左空間既還原度，低音既音尾會由近至遠慢慢擴散，係確保無拖泥既情況下將音場界線刻劃出來，連帶其餘頻段既聲音都會有呢種細微既迴響，包圍感好足夠，亦非常過癮。另一重點就落到去bass line既分離度，ASL 4.5係小數可以將低音鼓同低音結他分隔開，同時質感無影響下重現兩者音色既耳機；呢個效果會令你更享受係ASL 4.5聽一啲藍調、爵士樂，soul，總之係有groove既音樂。

中低音相對收儉，換來更加清晰同連貫既過渡，質感同樣豐富，尤其以木、銅管等等，音色比較有厚度既樂器還原得最完滿，因為飽滿得來、亦表現得到高音既精緻同穿透力，更重要既係每一粒音都分明，力度表現有輕有重。至於人聲，結像突出，偏向中高音既還原，喉底唔算標緻但仍然能夠聽到的，相對來講表現夠清晰乾淨，亦確保中音有良好既發揮空間。