山靈Shanling近期野心都幾大，而且每每係功能設計上都有莫大既突破，或者新諗法，例如堪稱移動型戰艦既M8，可更換既輸出插座加上幾有現代感既外觀，立即就吸引到眾多眼球；又或者以繞路形式達至16x MQA解碼既M3x，更係入門級既頂端之作。而更不得不提既係，山靈係Hi-Fi市場，原來已經深耕左33年…

接觸佢地既產品，第一下會俾你感受到個種帶點工業風既平實，內在既聲學指標亦維持高水平。到你慢慢再相處一段時間，個種四平八穩樣樣都有既體驗，再加埋個平易近人既Android UI，講真，其實我好buy既，尤其係當有一堆產品需要測試既時候，let say係手上既係M6 Pro，就成為左一部好好既聲音參考，一個中間值。

於是乎，到到今期新到手既EM5，稱得上為座枱版戰艦，都仍然係個種穩重既感覺，熟悉得來，又竟然幾新鮮喎！

紙箱一開，黑色機殼配埋金色旋鈕，與及頂蓋玻璃上既金色電路diagram，係一個高貴同長青既設計點綴，成部機既語言都維持住山靈一貫既高水準。

EM5既機身都有返咁上下，但相對近期推出既座枱機，佢算係中挺既體積，加上配色既關係，實際都唔覺太礙眼，而且為求整體既簡潔同便利性，大部份既控制都交由機頂既4.7寸 touch mon負責，其餘實體鍵就只係剩低背部電源開關同音量旋鈕，所以上手感覺係好簡便同平易近人既，放上枱面都見得下人，觀感唔會話太繁複。

全面既輸入輸出介面，對於一眾要求全能一體機既朋友，相信都中point既。除左正常家用機都會用到既6.35mm單端輸出，亦提供埋4-pin XLR同4.4mm平衡輸出。窩心既係，包裝會附送埋3.5mm female轉6.35mm male轉接插，雖然係有限錢，但一買返來就用得既呢種感覺，絕對係無價。

背板介面亦都非常豐富，先有支持光纖、同軸、USB三種介面既數碼輸入方式，另外仲包括埋：

外接hard disk既USB插頭
RJ45 既網線接口（支援DLNA）
Micro SD卡slot

原則上已經cover到大部份用家既輸入輸出模式，就算你係放出廳再接駁後級來推喇叭，EM5上面既RCA同3-pin XLR輸出都幫到你！再想有更加無線既體驗？佢仲有埋雙頻Wi-Fi同支援LDAC編碼既雙向藍牙，問你服未～

輸入輸出提供左咁多玩法，咁自然操控方面亦都要跟返上啦！EM5用既係同廠M30 既Android介面，使用感覺順暢，特別係仲支援時下熱門既各類型串流apps，同級機入面真係第一個有咁既玩法，而且只需要用個apk安裝就得。個人就揀左Apple Music同Tidal來玩：原因係，一個有MQA，一個有非常齊全既廣東歌曲庫，尤其我呢啲呀叔級別，80年代尾90頭既音樂就岩曬，呢兩個app基本上cover曬所有我要既野，再加上EM5本身係支援MQA 8x解碼，成個感覺就係為呢個串流服務而生。

呢個玩法亦代表住，就算你唔接駁電腦，EM5都可以透過Wi-Fi獨立運作，極之方便。

咁實際操作又如何呢？拿，其實呢，呢個位就好睇到EM5係真係為串流服務而生，因為Shanling為左呢部機（同埋M30）寫左一個專用app叫Eddict Player，裝左係手機，兩部機用埋同一個Wi-Fi之後，就可以透過手機直接操控EM5既介面，非常直觀。呢個功能既好處就係無論你身在屋企既邊個角落，只要你仲收到Wi-Fi，你就可以控制EM5來揀歌、用apps，尤其岩俾以EM5作為一體機輸出喇叭既朋友，

~~ IOS同Android用家都可以係app store度搵到呢個app架～~

講完基本野，係時候去返啲深層次既內在野。EM5既聲音結構有兩個重點我特別想講下，原因係，由呢兩個位你係會睇到間廠設計音響產品既功架同實力，亦都算係一個信心既保證來。

首先，EM5既內部電源係分開左兩份獨立既供電路線，來連接analog同digital既部份，其一係為左減低機內干擾，其二係令供電更加穩定，設計上亦都令負載能力大大通高。雖然EM5用既只係單粒AK4493EQ DAC，但因為電源做得好既關係，質感同清晰度同你聽開既4493有好大差距；輸出級既輸出功率同配搭彈性亦都非常高，由低阻高敏入耳式到好似Meze Empyrean呢類平板大耳牛都能夠推得均衡大氣有動態。整體既佈局唔會話有「順得哥情失嫂意」個種感覺，而係面面俱到，係有諗過度過先做既。

跟住就要講到EM5既自家編程技術，呢方面就係睇廠實力既地方。EM5既FPGA擁有山靈編寫既時鐘信號算法，同埋自家CPAF（Constant Phase in All Frequency）濾波來處理音樂訊號，兩者都需要相當豐厚既FPGA編程經驗同資源先可以研發得到：直接啲講，燒錢野來，其實out source係最經濟最直接既做法，不過相對自家研發，配合度就比較低，亦都唔會有人肯同你挫個可以配合成部機其他電子零件參數既code出來。山靈肯咁做，都相信係對品質有堅持既做法來，大家亦都可以係佢個宣傳文件睇到，呢兩個技術同聲音部份既結構都係環環相扣既，真係有活用到架。
好啦，壓軸出場，係時候來到實際聲音部份。

與Massdrop T-X0的配合

點解會玩呢隻先？因為佢夠敏感，對前端控制力亦都有非常高既要求，唔係一味大力就得，更係係我手上第一對能夠聽到完整bass line既平板耳機，用來測試EM5既輸出級最好不過。

當年用到Mytek一部一體機，都要開到8成音量先夠聲，今次用EM5只需係高增益開到四成就夠。Bass有力，bass line分明，整體既線條感強烈，亦係小有地係呢對耳機上聽到一個結像係咁實在同清楚。而其中一個重點，竟然係個中頻終於唔係朦，有返曬分離度同對比，就以Martin Miller & Paul Gilbert - Hey Jude (The Beatles Cover) - Live in Studio為例，個支木結他既弦線感、腔體共振終於出返來。

與Austrian Audio Hi-X15的配合

呢對耳機原先係非常之咁mon底、乾淨、冷、密度唔算高，配上EM5就加添左小小暖意，每件樂器既質感會更加豐滿自然，同埋個Bass有返延伸同彈性。

呢個組合屬於互補既狀態，一來EM5本身個高音唔係去得盡既類型，佢係見好就收既，所以第一耳效果唔會好驚艷，但音場既結構規整，內裡空間既資訊量同層次係做得好均衡穩定，而且有一定既暖厚感，所以配合Hi-X15之下，成個聽感就有返聽歌個種感覺，而唔係執歌咁所有野分開曬。

呢個組合最好用中增益來聽，柔和好多，無咁刺激

與Acoustune HS2000MX的配合

上面講到EM5對耳機既寬容性特別好，當然就要加插埋入耳式耳機既配搭啦！

有枱機支援，HS2000MX當然就表現得更加從容啦！結像清晰，樂器既形態同顏色都維持正確。言而有一樣野都幾神奇，同手上既便攜播放器比較之下，低頻既量感、下潛力差不多，但聲音收放明顯更加有力，展現出爽朗，輕盈既一面；音場規模有因延伸更多既情況下而拉闊，每件樂器既聲音更加鮮明同凝聚，總體維持相同調音走向，但質量更高！

總結

EM5聲音基礎質素極高，均衡中正，而且同各種耳機既配合都非常良好，有感佢既個性其實唔算強烈，維持住山靈一貫既中性作風。尤其係係配搭唔同性格既耳機時，能夠顯著提升質量既同時，又唔會有影響到耳機原先風格既情況，推力、聲音質素亦有保證。

實際上，面面俱圓既風格係一件好難得既事情來，要求廠方有返咁上下經驗、歷練、設計同選材上既多方配合，先能夠係咁多件產品推出後，音質都維持住高水平。加上EM5既豐富功能同便利性，若果要搵一部多功能一體機，由各種豐富既輸入輸出界面，到支援LDAC、aptX、Airplay等等既無線連接，EM5既成個package都真係特別吸引。