眨下眼又來到年尾，以為今年終於可以俾個荷包休息下，點知，原來唔係既，原來仲有一堆殺手澗未出既。當刻個危機意識大幅減弱，於是乎又擰一野。

64 Audio每次出新品都有人追捧，我諗除左係因為呢隻品牌有相當口碑，仲因為佢已經係一個音質同功能性上既保證；而往往亦都需要呢一類型既品牌出手，先可以係一個成熟同選擇越來越多既市場入面，尋求突破，改變生態。

而有住非常豐富既創新經驗同資源既64 Audio，就直接將一個全新既結構同技術帶上枱面。究竟呢對新出既DUO，有幾新奇有趣，聲音表現又點？我地就一齊來探討下。

開箱！

對上一次做64 Audio既文章，就係旗艦級既U18s，咁開箱既效果又會有咩唔同呢？

首先箱一開，左邊就係品牌既介紹，盒右邊既上半部就放住對DUO，下半部就係個純黑色既64 Audio皮盒，無任何花巧野，直入主題，不過就仍然有個種豪華既效果：始終一開就見到DUO個搶眼到一個點既faceplate，係成個黑色既盒同配件入面非常突出，已經唔太需要再做更多既鋪墊了。

皮盒入面放住同U18s一樣既耳膠架，用左蛛網狀既結構來分類唔同耳膠既擺放位置，唔單只係有型，我自己亦覺得幾實用既，因為延伸使用既情況下，你可以用呢個架來裝其他品牌既耳膠，收納的話都只需要搵返個差唔多尺寸既圓型盒，裝起成份野之後，就唁洗驚唔見幾粒啦。

腔體同樣用上6063鋁金屬CNC而成，因為單元數量少左既關係，形狀比Trio更加扁身，整體既重量分佈更加合理。因為更加貼耳既關係，只要配返合適尺寸既耳膠，個種舒適度係會無形中令你有耳機唔存在既感覺。

今次既跟機線材用返新出既黑色New Premium Cable，銅鍍銀線芯，四芯配置，配合度非常高。唔知買左好多64 Audio耳機既朋友，有無發覺換左線聽左一段時間，再換返原裝線來聽，反而出來既效果更加順耳呢？由試NOIR，到U6t、U18s，到呢對DUO，雖然原裝線既素質表現同高價啲既升級線比較之下，都會有啲差距，但原裝線既風格表現，就更加均衡，更有個種64 Audio標誌性既聲音。聽住呢條跟機既New Premium Cable，或多或少，都令我有種唔需要換線既感覺。

聲學設定

DUO用上一圈一鐵既設計，秉承住complete tia system系列既優良傳統，以獨特結構配合氣流效果輔助，令常見既發聲單元表現出唔同既色彩。係呢個系列中，每件產品都有住自己既獨門秘技，例如Trio既FXC氣室、Fourte既開放式中頻單元。而來到DUO呢對耳機上，64 Audio就加入左名為apex Core既氣流設計，唔單止融合左傳統開放式大耳牛既概念，亦都加入左64 Audio對呢個構造既新思維。

apex Core既主要部件，就係呢塊咁型棍既面板。面板既底層留有幾條長型既氣孔，開放式構造容許空氣進入到耳機內部，為發聲單元提供順暢既氣流。同時間呢個部件亦作為tia聲學窒同外界環境既連接媒界，達成開揚帶空氣感既聲音效果。

而呢個氣流既實際操作，就要講到DUO既單元配置了。

若果我地去睇返動圈單元既工作原理，上面講到既apex Core構造就成為左DUO聲音表現既一個關鍵元素：因為動圈單元係透過磁力帶動震膜前後運動來傳遞聲波，而擺動幅度越大，就越會加強聲波傳遞既效率同質素，因此就會有用大電流來推動圈耳機，表現會更加好既說法。言而，運動幅度加強，隨之而來就會推動更多空氣，形成壓力。係佩戴入耳式耳機既情況下，耳道係屬於密閉空間，呢道壓力就會不停衝擊耳膜，除左令中耳既工作量大幅增加，亦因為空氣無法有效流動，而令聲波既傳遞效率大打折扣。於是乎，64 Audio就設計左apex 洩壓結構，理順耳道內既氣流，解決上述所講既影響。

因為DUO既聲音構成，係由動圈單元支撐成個超低音到中高音既輸出，再由tia高音單元接手過渡到高音至超高音輸出，所以粒動圈既表現係會直接影響到成個聲音效果，而apex Core呢個升級版技術，就係為左輔助粒動圈既聲波傳遞而設；原理同apex相似，但對流既效果就更加優秀，以補償9mm動圈既輸出能量。要動圈單元運行得好，少不免就會出現更密集同大幅度既震膜運動。呢道咁強既氣壓同能量，就會經由apex Core特設既導流孔，由tia聲學室引到外界；亦因為空氣既對流效果，tia 聲學室內亦可以長期擁有充足順暢既空氣傳遞聲音。所以點解第一耳聽DUO既時候，你會明顯地感受到個種無壓逼感，而且聲音又非常開揚，好有開放式耳機聽感既效果，呢個位就係apex Core既主要功能。

實際聽感亦都反映出動圈單元同apex Core既關係。當你將DUO放落大推力既枱機推動，同你係一部細力啲既便攜播放器上聽，兩者比較之下其實都好有空間感，聲音亦都無壓逼感，但就明顯聽到DUO既表現係好唔同既。呢樣野等我係下面既篇章同大定分享下。

另一個主要技術Wave sync，就負責DUO動圈單元同tia高音單元既音色過渡。需知道tia單元主要係負責高音至超高音輸出，所以同動圈單元既分頻點亦設定得比較高。為左令兩者音色同輸出既過渡能夠更加順滑，廠方就設計左一款「全通型」既分頻電路來解決兩種單元聲音既時間相位差異，最終就帶來連貫，具深度，而且更為一體既聲音表現。

基礎聽感

DUO 第一耳最深刻既部份，係佢充滿能量感、力度、但同時又有衝擊感同敏捷反應既低音，令DUO既低音取向能夠同時兼顧多個方面。因為空間範圍表達得比較廣闊，每一下既擊鼓都能夠有個種向外擴散既效果，營造出一個穩定既托底，亦提供左更多元素令音樂推進得更加豐富。

下潛有力，延伸理想，密集打擊下鮮有疲態，而且對鼓聲既還原亦非常穩定，雖然能量感維持高水平，但唔會導致音色表現出偏向過冷或者暖，而係維持住一個中正既狀態，還原得準確。

低頻厚度十足，同高音一樣稍微傾前，配合apex Core既開放結構，營造出寬闊、場前場後感明顯、並且呈健康橢圓狀既音場。處於場中既聲音有明顯既聚焦感，尤其以人聲既表現最優秀，個人就算聽返比較老派小小既錄音，例如Deep Purple - Highway Star中既人聲演繹，DUO就好似將佢輕輕咁係不同樂器之中拉返出來，結像凝聚得來，亦提供左足夠空間俾唔同樂器表現。