三系同堂，FiiO終於都更新埋圈鐵系列嘅旗艦。可以話係集純動鐵同純動圈設計之大成嘅FH9，就咁睇spec，都見到FiiO落左啲功夫，將咁多優勢集合埋一齊。成效係點？我地慢慢研究下。

FiiO近期動作都多，由播放器到到枱機，到今日要講嘅FH9，無疑係想組成一個屬於FiiO嘅西裝組合。雖然對用家而言，買唔買曬一套都係自已選擇，不過亦都好誠實嘅一句，FiiO每件新產品其實都好打得，有時唔覺意，就真係會買齊左一套…身邊都有唔少師兄係成套入手嘅。

相信大家睇得、玩得FiiO嘅耳機，無非都係為左嗰個強勁嘅性價比，來到FH9，雖然價錢踏入五千中嘅環境，但比例一樣令人驚奇。先由硬件講起，FH9嘅外殼採用純鈦合金材質，由五軸CNC加工而成，確保腔體剛性之餘，亦可以保持每一對成品耳機嘅一致性。耳機形狀設計得比較薄，符合耳型，基本上戴上耳後都唔會有墜返出去嘅感覺，亦都感受到呢對耳機係貼耳嘅。提供左兩種顏色「鈦空灰」與「鈦晶黑」finishing，前者係磨砂質地，黑色就係拋光左嘅金屬色，我自己就鐘意黑色個反光質感多啲。

呢個外殼亦擔當起耳機聲學結構嘅其中一環。面板上嘅開孔其實就係FH9比較特別嘅半開放式設計，俾內裡嘅單元一個大型回氣口，作出更順暢嘅聲音傳導效果，當然亦都有助你耳道內嘅密閉氣流釋放返出來啦，聽得來就唔會有個種聽覺疲勞嘅感覺。亦都因為呢個結構嘅關係，建議大家係試聽時用返你平時用開嘅耳膠，去確保返你係無漏音嘅，咁先會聽得到FH9嘅真正實力。呢個半開放式結構亦都俾到聲音上嘅實際好處，係一啲比較複雜同刺激嘅音樂上，佢聽感唔會有好強壓逼感，而且相對同價位耳機而言，亦都多一份自然度，會出得返應有嘅延伸。

整個內部聲學構造，由六粒複合動鐵單元，加上13.6mm DLC震膜動圈單元組成，透過兩組單元支架將所有單元安放係腔體內，其中高音單元就放左係比較近耳導管嘅位置，俾粒單元直接向耳導管方向傳遞聲波，保持更多中高頻細節；同時，FiiO為13.6mm動圈加入S.Turbo聲學渦輪增壓式結構，利用聲波導向特性，通過渦輪形狀嘅聲學導管，加強低音傳遞效果，令低頻下潛可以去得更加深。用比較易明嘅方法解釋的話，呢個構造就好似單車打氣筒咁，由動圈單元作為壓力源，將聲波直接推出聲學管道，令聲波傳遞速度大幅增強。同時又因為呢條管道比較長，佢同時仲可以充當一個filter，將多餘嘅中高頻資訊過濾，令三款單元嘅音色銜接更加順滑。

透過以上嘅聲學結構，FH9嘅內部構造係無用到額外嘅聲學阻尼去做分頻嘅，而係俾FiiO用左來做一個額外嘅調音手段，俾用家可以以更換管嘴嘅方式來微調聲音，分別有三種唔同管嘴，以顏色區分：加強低音嘅紅色、均衡型嘅黑色、同偏高頻嘅綠色，再加埋耳膠同耳機線嘅組合，可玩性好高。而因為無左聲學阻尼吸震而出現嘅齒音，FiiO就設計左一個額外嘅陷波裝置，濾除腔體、音管與及耳道所產生嘅諧波共振，抑制齒音，所以可以放心FH9同尖聲係完全無關係嘅。

配件方面，FH9跟左一條里茲結構純銀線，每條線芯單支獨立漆包絕緣，另外亦採用左膨脹式MMCX插頭同可更換插頭構造，只要將插頭外殼轉鬆，然後拔除插頭，再跟返除呆設插返落去扭緊，就完成左嗰換插程序，呢個設計嘅好處，當然就係俾返一班手持幾部播放器，又有唔同插頭配置嘅朋友啦，不過好似我咁一部機玩曬咁多個插，試下唔同音色效果，亦都係一個玩法來。2.5/3.5/4.4mm插頭原裝都已經跟埋俾你。

另外仲有包括Spinfit在內嘅一大埋耳膠，我就覺得係送附件方面FiiO係做得幾好，基本上你一買返去，已經唔需要擔心仲有啲咩額外野要買。附件清單請留意文章最尾。

因為一對耳機最重要嘅都係音質表現姐！

FH9唔係一對難推嘅耳機，只要俾到一部正常播放器嘅推力，就已經可以有差不多八成嘅功力，甚至插落老鼠尾都係無問題嘅。所以我係測試FH9嘅時候，除左用上左比較大力嘅M17之外，亦都有嘗試係唔同嘅增益之下佢會有咩效果出到來，而事實證明，呢對耳機需要嘅唔係推力要幾咁突破天際，亦同時講究播放器對聲音細微位嘅處理，呢個位置亦都係一部入門機同中高階機嘅分水領。

先講返整體嘅表現，FH9嘅主軸仍然係來自中頻，人聲嘅口型維持於場中，件頭比較大，但因為延音足夠，所以貼面嘅感覺唔強烈，中頻細節同細緻度都非常好，做就左FH9對於人聲歌唱技巧還原得幾詳盡，質感偏向清晰，男聲會有小小顆粒感但比較乾身，女聲的話例如Mariah Carey會有個種高亢嘅感覺，亦都因為動鐵單元涵蓋範圍夠闊，由喉底到高音嘅過渡順暢，但就來去到刺耳嘅位置時會有一個明顯嘅衰減。雖然係令聽感舒適度大大提高，不過對於例如ACG音樂嘅還原就會有啲意猶未盡啦，呢個時候，就好突顯到可更換filter嘅作用：換返個綠色filter，即係高音嗰個，就會俾得返一啲搶耳小小嘅效果。

低音嘅表現幾有臨場感，呢粒DLC單元層次效果，係可以聽得返一隻鼓嘅彈跳感同震盪嘅迴響，例如聽kick drum嘅密集打擊，佢一樣可以捉得住個好少好少嘅混響細節重現返俾你聽，唔係個種「啪啪聲」好平面嘅聽感，速度仍然跟得返上，唔會有拖尾感，營造左一個好清晰分明嘅效果，呢個重播方式亦都令中頻人聲更加突出。不過可以聽得出DLC動圈係音色方面都係偏向直白同素質感，其他頻段嘅音色都有向住呢邊傾斜，所以我覺得與其係夾原裝線，可能用返銀合金線，或者好似Monile呢一類有適當暖度但又唔會大幅改變聲底嘅線材，會更為妥當。