上年，來自美國的新晉耳機品牌 SPEAR Labs 的處女作 Triton 1一鳴驚人，除了令人讚嘆的造工之外，其非常進取的定價令當時在發佈會的我留下深刻印象，真係無番咁上下自信都唔會揀咁樣的產品定位。

其實本身「金屬外殼」呢樣野都唔係咩新搞作，係10年前都已經有大牌子用緊「金屬外殼」做selling point，大家又估唔估到係邊隻呢？……

冇錯！就係外號「銅獸」的 Monster Turbine Cropper Pro 同埋佢兄弟 Gold Pro！不過當時都只係以金屬來展示廠家工藝水平，並未強調其對聲音的影響。事實上，當時Monster 二作的外殼的一樣材質，只係表面電鍍咗唔同顏色，同埋個調音唔同。

當然SPEAR Labs就好唔同啦。創辦人Dale Lott對耳機開發、物料應用，甚至單元運用，都有擁有豐富經驗。佢今次就係之前的Triton 1再推進一大步，就有呢隻Triton ZERO啦！！！(話說點解個型號係數番轉頭？！)

今次ZERO就繼續番之前的沿用「3 stage – 3 driver」設計概念，務求係視覺、聽覺甚至係觸覺都可以係最奢華的享受。ZERO外殼頂層用上Sterling Silver 925 純銀，配以拉絲花紋製作的面板。銀／銅合金中層、3 顆螺絲及 SPEAR Labs 標誌，用上玫瑰金色外層，湊出更華麗的外表。至於貼耳的底層部分，就以 Rhodium 鍍銠白金處理，更顯矜貴。

根性官方介紹，Triton ZERO 三層外殼的用料不只單純為外表而考慮，面板所用的 Sterling Silver 亦稱為 925 銀，多數用於貼身的首飾，抗菌亦不易引起敏感， SPEAR Labs 所選用的 925 銀來自古典樂器，擁有最高的品質，令音色更純正。

每一種金屬本身都有自己的特質， Triton ZERO 的入耳部分及中層部分均採用銀／銅合金製作，這種 SPEAR Labs 稱為「完美合金」的物料以獨特的配方調製，擁有極高的密度，其共鳴特性可以準確地反映單元的音色，讓 Triton ZERO 有著自然細膩的音色。

底層的銠白金屬一種非常名貴的金屬，由於提煉銠白金的工序繁複而且昂貴，其產量甚至比黃金更少，通常只會在高級消費品上見到。比起其他金屬塗層有著更閃爍的視覺效果，其光線反射率高達 80%，令耳機看起來閃閃生輝，用於金屬外殼上更可防止表面氧化，時刻散發出高貴大方的氣質，以往銠白金亦常見於名貴音響器材，可以為音色加添一份光澤。

我見到真身果刻真係「嘩」咗一聲，真係好！鬼！靚！呀！……隻金色真係好有氣質，一啲都唔土豪，呢啲先叫玫瑰金嘛！iPhone嗰隻死人Hello Kitty粉紅色真係令好多人誤會咗呢隻咁好的金色。隻925銀又好閃令令，同隻玫瑰金非常之夾，共同做咗個好似宮廷的高貴感出來。唔係話上代的黑耀石唔好，不過呢個配搭真係襯太多了，即刻有高級首飾的質感同細膩。下面比大家睇多啲J圖：

單元技術再改進

根據官方資料，ZERO 沿用3種單元混合並加以改良，7mm 的 ACT Magneto-Static 靜磁單元擁有跟靜電單元相似特性，不過就由靜電電場變成磁場，靠一塊極輕薄的 3 層震膜發聲，擁有平衡結構，對訊號非常靈敏，可播出 5Hz – 42kHz 廣闊音頻，而且失真極低，細節豐富，音色自然。

配合 5 層三文治式震膜 10mm 動圈單元及 2 個訂製動鐵單元， Triton ZERO 所著重的是完美還原音樂本色，與能量充沛、音色刺激的 Triton 1 截然不同， Triton ZERO 三頻平均度更高，每一件樂器細微的質感、強弱都一一呈現。

配件

ZERO 個包裝都仲係好誇張。耳機由名貴木製錶盒包裝，媲美高級腕錶，而日常攜帶的話就可以使用另一個牛皮製保護盒，仿照火槍子彈盒設計，型格得來亦提供極佳保護性能。咪話我唔教精你地，只要用memo紙將個LOGO遮住，就可以成個盒載住啲禮物送比女朋友/老婆啦！

作為入耳式耳機最貼身的部分，SPEAR Labs開發了全新專利耳棉 nFORM ，以「Nano Cellular」納米蜂巢結構製作，具有抗菌效能，比起一般耳棉更加耐用，而且在高溫下不易溶化、變形，低溫環境下亦不會變硬，任何時候戴上都舒適、穩固。nFORM 是為享受音樂而研發，有著出色的隔音效能，亦能保持音樂的原有味道，將 Triton ZERO 清晰瑰麗的音色盡情發揮。

聽感

比上代易推
暖啲
包圍感好啲
人聲後啲
音樂感好啲
雜食啲
用大力DAP都OK

總體來說，ZERO跟上代一樣，整體較冷聲，高頻分析力好，人聲較遠及薄，而低頻打得好大力，而量又多，填滿成個空間，為整體音樂提供一個好好的基礎。而且我幾鐘意個bass 收放好俐落，唔會拖泥帶水，又唔會搶過咗個人聲，使得係流行音樂下可以同時聽到清楚的人聲同埋享受到好狠勁的低音。

同上代比較，我覺得呢隻野易服待咗好多。之前用普通DAP係完全推唔郁，要用上枱amp先可以推得順隻野，基本上係前端有限的條件下好難去適應除了器樂的歌。而家，我只係用大力的DAP開大聲少少已經cover到佢的需要。呢件事係好加分，因為唔係個個都好似我咁，得閒就成部QLS QA390孭出街……

雖然上面話ZERO都係冷聲，但就比上一代暖咗啲，包圍感好啲，整體音樂感都好咗好好多，唔再係好cool了。由於中音變得暖咗，令到佢雜食啲。

另一方面，我仲等登搵咗條 Brise Audio 的 ASUHA Ref.2 線去搭配，立即把低頻收得更加緊同加快收放速度，而且音場仲大咗好多添！成件事係一個好好的昇華，令到ZERO質素再提升。

總結

ZERO 真係一隻好精緻的耳機，在工藝上可以和大廠一戰，擺脫獨立品牌就只能夠做CM的印象。在聲音及設計上都可以睇到佢的審美同埋調音都形成自己的風格；ZERO係保留到SPEAR Labs自家調音風格的同時，同時也不停進步，更加適應咗市場需要。

Triton ZERO 規格

單元：10mm 動圈單元 + 7mm 靜磁單元x1 + 動鐵單元x2
耳機端：Pentaconn Ear
訊源端：Pentaconn 5-pin 4.4mm
頻率響應：5Hz – 42kHz
靈敏度：110 dB/mW
阻抗： 16 Ohms
T.H.D：<0.02%/mW
建議零售價：$ 24,800

首批預訂尊享高達 $3,000 升級線材折扣

為了給用家最個人化的體驗，首批預訂購買 Triton ZERO 的用家，同時選購 Soundwave Audio Limited 代理品牌的 PE 插頭耳機線，即可享受高達 $3,000 升級耳機線折扣，以優惠價錢玩出心水音色！