講起Chord呢個品牌，相信大家最記得嘅，莫過於當年所推出嘅便攜神器Mojo、Hugo同Hugo 2，個時我都有幸玩過兩手，好有料，好好玩。不過熱潮過後，Chord重心轉移返去大Hi-Fi產品，便攜產品更新速度慢左，連帶其他品牌開始發力之下，呢間廠係有淡出舞台嘅感覺嘅…

只但係，我相信係咁多位發燒友嘅心目中，都有Chord嘅位置！尤其當廠方出一啲teaser，或者有新嘅產品推出，大家都好踴躍地係個Group度分享，我知你地都好期待Chord嘅新產品架～

所以呢，今日就為大家帶來Chord Qutest三部曲暫時嘅最終章，作為純耳擴擔當嘅Anni，睇下呢兩隻野唔同組合嘅情況下，會係咩效果！

表面上，Qutest加Anni呢個組合，就好似將Hugo 2嘅內部結構分拆成數碼同模擬兩部份。但呢個操作其實對好多人來講都更加友好，若果以家用環境來講，就更係一絕。

首先由體積同外觀講起，雖然外觀上係由Hugo 2嘅扁身外型轉變為真正嘅長方體，但因為QSS系統支架向高空發展，兩者實際所佔有嘅空間不算多，加上體型長身但維持Chord一貫具時代感、精品感嘅風格，黑色機身觀感一致，唔礙眼之餘亦非常大氣，作為客廳擺設嘅一環都仲得。

兩者嘅「觀景窗」都有啲唔同，Qutest個窗口可以睇到內部嘅電路結構，而Anni就只有散熱嘅網格位可以偷窺下，我就覺得Anni個設計陽剛味會重小小。

有返咁上下資歷嘅玩家，應該都知道Chord最出名嘅就係佢份解碼，完全使用自家FPGA編程技術來達成數碼訊號處理。而係Qutest身上，呢個部份就用上Xilinx Artix 7作為基礎，同時用上Pulse Array DAC離散元件設計，高tap數效能令音訊還原能力大大增強。FPGA帶領下，Qutest仲擁有多個輸入輸出界面，其中RCA輸出就可以直接連接Anni，組成標準嘅桌上音響組合。至於點解只係得單端輸出呢，其實呢度就體現左Chord嘅功架：因為單端已經做到同平衡電路嘅性能不相伯仲，做咩要整多組線路，多隻香爐多隻鬼呢？

至於新推出嘅Anni，同過去產品嘅最大分別，就係用上由同廠新型Mono Block Ultima系列中用到嘅電路設計Next-generation Dual Feed Forward amp topology（雙前饋糾錯電路拓撲）嘅精簡版，詳細資料可以係官方網站望一望，但呢個電路設計最主要嘅優勢，就係可以令Anni配搭任何嘅耳機或者喇叭負載，都能夠將佢地嘅應有性能發揮出來。

雖然佢係一部純耳擴，輸入輸出界面都幾夠做嘅。首先有常見嘅6.35mm同3.5mm嘅耳機輸出，而最正嘅就係，Anni亦都有提供4mm蕉插（Banana Plug）喇叭輸出嘅設計，你係可以插被動式喇叭來做一個小型嘅桌上影音組合，不過就唔好買咁大對啦，始終Anni嘅主軸係個耳機輸出度。

雖然佢係一部純耳擴，輸入輸出界面都幾夠做嘅。首先有常見嘅6.35mm同3.5mm嘅耳機輸出，而最正嘅就係，Anni亦都有提供4mm蕉插（Banana Plug）喇叭輸出嘅設計，你係可以插被動式喇叭來做一個小型嘅桌上影音組合，不過就唔好買咁大對啦，始終Anni嘅主軸係個耳機輸出度。

背板仲有兩種插座嘅。一個就係DC插座，可以見到Anni所用嘅電源接頭制式係一個四針嘅DC接頭，若果想另外配一組線性電嘅就要留意啦；延伸到另一邊，標住DC OUT嘅插座其實係俾你連去Qutest嘅電源輸入，若果你已經配左線性電俾Anni，咁用返呢個位俾電Qutest就最好。

Anni亦都俾左個位大家去外接地盒做額外接地嘅，就係SPEAKER R蕉插上面。近排見小型地盒越來越多，買隻無壞，音質嘅提升都正面嘅。

機身上只有三個控制鍵。兩粒燈仔，一個係開關，一個就係喇叭輸出嘅增益控制，另外音量制按壓就可以揀返用邊組RCA輸入，亦都有唔同嘅燈光效果話你知用緊邊組input，INPUT 1會顯示藍燈、INPUT 2會顯示紅燈。

組合玩法介紹

兩者明顯係一個西裝組合，但只要以手上嘅資源配合一下，其實兩部機，係可以分拆使用架。以下就等我分享下我喜歡嘅組合：

IBasso DX240 + Chord Qutest + HUM MA-1S

第一個組合就用到Android系統嘅便利性同便攜系統嘅配搭。咁樣嘅組合除左可以用DX240同HUM MA-1S應付便攜環節，返到屋企亦都可以以一部解碼能力更強嘅Qutest來加強整體音質表現。

因為Qutest有著比較強嘅Chord音色，全頻密度高而且聲音紮實有力，MA-1S就為整個重播帶來一點寬鬆度同暖感，兩端延伸清晰又迅速，而呢個咁強力嘅過渡加上Chord對音色嘅還原能力，中高頻樂器都會有一種好似聖誕樹啲波波擺設咁嘅精緻感，亦令原先比較嚴僅嘅聲線顯得比較圓滑，音樂感相對上更加好。

Cayin N6ii ti + A02 + Chord Anni

Anni音色表現相對Qutest無咁aggressive，能夠保持前端音色表現，所以配上A02，成個表現可以用細緻均衡來形容。中高音能量感明顯增強，加上音色還原兩個設備都有加成，帶出左一個好寬闊華麗嘅空間表現，亦有比較明顯嘅大細結像與能量對比，整體更加開揚有深度，而且低音無論力度同attack所帶來嘅聲尾都明顯左，係一個偏向Hi-Fi感嘅組合。

Chord Qutest + Chord Anni

西裝當然有西裝嘅好。兩者走向相似，所以配合度高，而Anni就好似將Chord嘅聲音精粹加強加大，聲音紮實穩定，密度極高而且音場嘅資訊同微細節都係三組中最多。聆聽Daft Punk “Give Life Back to Music”嘅時候，呢個組合會表現出四平八穩、精細，加埋係主次穩定，聲尾充足嘅效果，完全就係上面兩個組合嘅加強合體版。音樂感亦都非常出色，因為低音打得夠廣夠深，而且無一刻嘅拖泥感，而令節奏表現得更加明顯同深入，節奏嘅感染力好強，聽下聽下就會跟住歌曲鼓點而點頭。電子野得，交響樂都唔錯，落返pop野一樣得，係好萬能嘅表現！