PWAudio，當年就係一條1960，令我意識到，除左唔同既銀線呀、金線呀之外，只要有心，其實純銅都可以好靚聲，好有feel。之後開始試多左，擁有得多左head-fi 架生之後，就更加明白到1960嘅個種獨特性同味道，講真，都幾令人回味架。

過去幾年，Peter開始更新旗下嘅線材，我都有跟隊入左幾條，例如no.5、Monile、Mercer等等，每條都有自己嘅個性同質感，就咁PWAudio嘅自家線材來講，其實已經可以對應到市場上大部份耳機嘅配搭，加上線材嘅樣子慢慢轉形至布網包覆嘅線身，呢個外觀我就好中嘅。

繼新旗艦Orpheus貴到我聽完都唔敢出手之後，PWAudio就好低調咁出左條Orpheus嘅細路 – First TimeS，用上銅線作為基底，號稱能夠令你重拾第一次聆聽音樂時嘅感動，加上價錢相對易入口，咁我就好放心去試聽啦。

一試，咦，掂喎。

係公開我嘅個人聽感之前，都係要講解下小小First TimeS嘅設計先。

唔知大家有無留意到，近呢一兩年，市面上出現左好多以呢種尼龍網做外觀嘅升級線材呢？係米有個網包住，就代表佢係一個實質有功能性嘅結構呢？

其實呢個尼龍網，代表嘅只係佢對線芯嘅保護會更加好。更影響線材聲音，或者傳導質素嘅因素，反而就係係線芯本身最外層嘅結構上。簡單啲講，即係佢笠左件咩外套，係會影響個聲嘅。呢個位置亦係First TimeS同Orpherus最特別嘅地方，因為佢地兩者嘅線芯都笠左唔同物料，唔同層數嘅「外套」。

呢層「外套」嘅材質，其實能夠改變電子流動嘅方式，並且影響到條線嘅聲音發展方向。所以PWAudio係First TimeS上面用嘅絕緣同漆包物料組合，係經過兩年嘅時間研發而成，以對應返First TimeS所使用嘅純銅線芯。係呢個位你就會明白Peter點解會咁多人留意同入手，個種專注，個份心機，唔係間間線材品牌俾得起架。

結構同Orpheus相似，不過Peter就無公佈到佢地兩者嘅關鍵資料。據官方所示，First TimeS呢條4絞線，所使用嘅銅絲結構同Orpheus唔同，每絞線嘅內部都有7組以獨立絕緣體覆蓋加上一層或者多層漆包製成嘅線芯；每絞線最外層亦都會再額外加上TRP 絕緣，除左全方位對應外界干擾，亦能夠改變電子流動嘅方式，尤其係解決左各線芯之間嘅相互干擾。層層保護加上PWAudio嘅獨特純銅配方，令First TimeS有住非常順滑同乾淨嘅中高音表現。

有幾順呢？大家都知我係好鬼鐘意聽Pink Floyd，係情懷，亦都係因為某啲歌嘅玩法係好試到器材嘅表現。就以The Dark Side of the Moon入面嘅一首”Time”來試，就好試到First TimeS對中高音個種渲染方式，因為隻歌一開場已經有好複雜同量多嘅鐘聲、金屬聲，呢條線能夠將呢團逼埋身嘅聲音分返開，每一下鐘聲都係分明，唔會一舊舊，鐘聲之間其實有好多迴響嘅細節係可以留意到嘅；另外，亦因為呢啲微細節出現，加上聲音嘅亮度過渡得更加圓滑同線性，就做就左呢個咁順嘅中高音啦。

無關你對耳機係咩配置。配First TimeS，都會有呢個效果。

外觀我覺得幾低調，因為用嘅係暗莫蘭迪藍色（Morandi dark blue），色深接近黑色但隱約會睇到個種藍嘅，係陽光下會更易睇到。所以，係無咁易俾家中嘅海關截到。

包裝就有一個PWAudio特地為First TimeS訂製嘅藍色大皮盒，入面有個方型嘅黑色金屬盒，呢個金屬盒都成為左PW中高階線嘅標準配置了。個大皮盒攞來放返自己嘅器材都係一個用法。

聲音走向

1960係俾到人豐潤、暖聲底、質感好正好有肉地等等嘅感覺，總之係當時聽起上來係一條極之有銅線特色嘅線材來，更神奇嘅係佢中高頻嘅表現都係圓滑又多細節嘅。係質感呢方面，First TimeS嘅表現係幾貼近1960的。

但First TimeS嘅性格就比較活潑，染色較小，動態表現極強，而且對微細節亦有好強嘅還原能力，比較1960以味道同厚度為主要調聲方向，First TimeS就係比較均衡，質素提升明顯；同時間又能夠確保中高能量更多而不會刺耳，或者衍生出壓逼感，仍然係保留左純銅線係舒適感方面嘅優勢。

不過，其他方面嘅表現，我覺得就更加全面，對應到嘅耳機係更加廣同深嘅。因為插上First TimeS之後，聲音各方面都會有好大提升，無1960咁濃厚，但又可以係低音上搵到個種豐厚有力得來又非常具層次嘅效果：低音鼓回彈更加清晰，延音更多，明顯比1960聽得多，又因為延音向場後擴展，亦會有更加強嘅空間感，整體塑造出來嘅效果就好似由酒吧聽live，轉到去麥花臣聽live咁，個低音打得深、豐滿，但自然，而且好有規矩，大場面下唔會話爆到好狠，而係係一個控制好嘅範圍內表現，明顯加強左低音嘅控制力。

中高音嘅細節保持得更多，尤其係金屬樂器，有小小顆粒感，又唔會刺耳，還原得更加均衡中正。配合埋銅線底嘅個種穩定順暢、又帶點昏黃感嘅人聲表現，同埋整體嘅擺位配置，結像大小交代得清晰，成件事係好立體嘅。

咁同並他同價位線材又點樣比較呢？事實上，以純銅做基礎，First TimeS對於成個音樂嘅推進係更加線性嘅，可以話係比較自然，而且無左其他線材材料嘅加入下，你會聽得到樂器音色嘅還原來得比較中正，唔會特別光、特別暗、特別重身、特別飄逸，而係全方位都有適當嘅方式去還原，重播俾你聽。我諗正正因為咁，佢能夠配合嘅耳機亦都特別多。