AAW - A3H+ Noir Edition
所有新品，其實都係由舊產品作為基礎，加入新技術新諗法去突破舊有框架，帶來突破，所以佢係新品。若果只係睇有加多幾多粒單元，用左啲咩新單元，條curve有咩改變呀等等，其實就會set左個框架俾自己。
所以，當收到代理交到我手上嘅新AAW耳機，個種興奮嘅心情仍然無變，除左因為參考返過往經驗，呢間新加坡耳機廠有誠意做好耳機之餘，亦都有相應嘅技術去做好一對耳機；加上過往產品品質管理同質素都表現得非常穩定，所以，雖然呢對係A3H+嘅改良版，但我都知道，唔止咁簡單嘅。上手試左一陣，觀賞左佢一段日子，嗯，真係無估錯。
A3H+推出嘅時候，引左唔小入入坑。首先外觀上夠曬搶眼，同時聲音表現係同價位係一對頂班野，所以當時我都有推介俾唔同朋友。一圈兩鐵、NOVA單元、3D打印外殼，都係幾現代化嘅配置來，難得係AAW係當中搵到新意，仲可以將佢發揚光大，生出呢對A3H+ NOIR。
叫做NOIR，係因為純黑機身同經特別鏡面處理嘅面板，因而得名。就咁攞上手都幾有重量感，黑色磨砂機身由鋁合金車成，硬淨、電鍍工藝平均順滑，形狀同原版差不多，戴上耳都貼耳；面板就做左一個鏡面處理，非常光滑，雖然用唔到來照鏡，但對於面板上雕刻上去嘅AAW logo，就份外耀眼突出。成個設計都好中個主題，唔知係整完試作品出來先用呢個名，定係有呢個名之後先設計個耳機外觀呢？
突出之處不止於此，而喺係塊面板嘅底部。用指甲對住個凹槽輕輕挑起，就可以鬆開面板，搵到個突出嘅地方。係呢個位置，係會見到NOIR版本獨有嘅調音構造，每邊都由兩個啪制組成。啪制下嘅數字標示調整頻段，1號制就係調高音，2號制調低音，用原裝包左嘅一條卡針，將啪制調去on，就代表個個頻段嘅輸出會有所加強，用來調整成段頻響。啪制下方係粒磁石，輕輕將面板放上去，對返岩位，就會啜實左，都真係啜得幾實。呢個設計亦都即係代表，來緊會有面板可以額外買，當係裝飾囉。
面板個形狀，其實我第一下就諗到用來做結他pick，夠曬實淨，不過一定好快花曬。
換上金屬外衣，連帶單元表現都有唔同影響。內部用上一圈兩鐵設計，10mm 生物震膜動圈單元負責低音，一粒大型動鐵負責中音，另外就由NOVA單元負責高音部份。三者由AAW特別設計聲學室整合調整，透過唔同導管粗幼控制輸出，達至平順嘅頻響曲線；全名Nozzleless Open Vent Armature（NOVA)單元就放置係近耳道嘅導管位，因為出音口嘅設計獨特，令佢可以擺得好近耳道，消減高頻諧震，降低聲音失真，俾返一個實淨嘅聲音結像。換上金屬外殼後，高音嘅改善係最明顯嘅，個空間感同音場，會明顯深左，闊左，配埋啲啪制，都可以玩半日了。
配件實用，其中跟機嘅黑色Null Audio Epsilon OCC銅線，都已經換上新嘅金工件，插埋條線，成件產品嘅設計語言就更加一致。要換線襯色，都好容易，PWAudio就有好多可以揀。
另外仲包埋一個藍色嘅carrying case，同埋佢嘅原裝耳膠，卡針。
雖然睇結構就係由原本A3H+演變而成，但老實講，一個腔體嘅材質不同，就算AAW維持返同樣嘅分頻設定，其實聲音上都會有明顯分別，加上另一方面佢又加左啪制，可以某程度上調整聲音，無論係音質上又好，可玩性又好，都有好大進步。
為左方便大家閱讀，每個啪制我都分返個段落先。括號內左邊代表1號制，右邊代表二號制，即係咁（1,2）
（off,off）Natural
先由最basic嘅設定開始講起，兩個啪制設定為off，聽感第一耳已經聽得出整體表現嘅提升。音色去得更加中性，同時間頻段嘅質感變化幅度小幅提升，但轉折位更加豐富，亦有更明顯嘅聲音attack，因此係樂器表現方面，佢比起原版會更加全面，有出色嘅樂器還原之餘，不同樂器之間嘅音色差異都會更大。頻寬更闊，兩端延伸加強，去得較盡，連帶推起左一個更加闊嘅場面：頭頂位置因為NOVA單元嘅優勢，又出奇地smooth，唔係奶油感，但就維持到中性之餘，係就到刺耳位嘅時候有一個慢慢下降嘅聲音衰減，好聽得出AAW係呢個位落左幾多心機。始終用左金屬殼，能夠修正到呢個自然衰減，都厲害嘅。
結像表現亦都無俾中高嘅自然衰減搞到矇矓，因為三頻attack都夠強，令結像都表現得鮮明，而且維持到一定嘅光澤感，個種光澤未去到亮嘅地步，有啲似個外殼嘅個種反光，好平滑，又勾到輪廓。低音嘅打擊感更強，偏向結實肌肉型嘅質感，收放有力，尾音可長亦可短，聽live 嘅錄音時個種由近至遠嘅擴散感，下潛比起原版去得更深，不過都唔會係無底洞個種，我個人感覺算係適中，即係唔會過份，但有時又想要多小小個種效果。
（off,on）Bass
正因如此我就即刻嘗試佢個bass模式，低音量感有所增加，但主要嘅提升部份正正係個下潛，由低音到sub-bass呢一段更加可聞，聽kick drum個時多左迴盪嘅音效，但又無因為呢個調整而令層次或者分離度減弱，bass line依然分得開。人聲有小小退後，聽感仍然突出，不過用得呢個模式，都係想好好爽下嘅姐，正因如此，呢但模式我係長用嘅，人聲個部份，就由部播放器嘅走向幫手啦。
（on,off）Vocal
人聲更加埋身，比起上一個模式會有一個更加突出嘅人聲口型，不過實際嘅強化依然係女聲部份，因為喉底嘅能量同個種沉重嘅感覺，係呢個模式度無咁重身。所以我個人就小用啲，但有次聽Mariah Carey，又幾過癮喎。
（on,on）Vocal+
Vocal+就係將喉底個段推返出來，同時三頻嘅能量同對比都會有加強，整個空間更埋身，更有逼力。呢個模式好岩聽啲爽勁多technique嘅吉他album，例如Jimi Hendrix，或者近代啲嘅Gun & Roses，會好有動感同吸引力。不過個空間感就令我轉返做Bass mode來聽嘅。
總結
若果要為呢一對耳機訂個價錢，我希望係…
講真一句，而家入門價錢嘅耳機，都真係好打得，無論係細廠好，大廠好，因為舊世代嘅耳機技術已經流通，其實要一對耳機出來門檻相對舊時容易，亦因為咁，其實更易中伏…話返轉頭，入門級耳機界，亦都踏入左「要試過先買」呢個情況，因為選擇實在太多。而憑住做工同口碑，AAW絕對有突圍而出嘅本錢同埋決心，而A3H+ NOIR更代表AAW對於聲音嘅追求，唔會話將貨就價，就因為佢價錢平而表現疲弱：係上面嘅分享已經可以睇到，其實我好enjoy玩呢對耳機。
希望係不久嘅將來，會有更加好玩嘅offer啦。
產品規格
單元：NOVA單元 x1，中頻動鐵單元x1，10mm生物震膜動圈單元x1
阻抗：12Ω
靈敏度：105dB
頻率範圍：10Hz～40KHz
建議零售價：$2,299
Sponsored by: IDealism World
[Facebook Group] : [WEM 本地耳機及音響交流區]
[MEWE Group] : [WEM 本地耳機及音響交流區]
[Facebook 專頁] : Facebook WEM Media
[WEM Media 網頁] : WEM Media
