貼地三混合 - DUNU EST112
近年越來越多品牌推出混合單元耳機，想跟風玩下，睇睇各品牌嘅混合單元耳機下下過萬，手頭又緊，但又身痕點算好呢？
個標題有著“貼地”兩個字，便會聯想起價錢。呢個因素當要要有啦，動圈、動鐵同靜電單元配搭，很多大廠和品牌每每動輒都要過萬元，而DUNU則只索價$3999。貼地價又等唔等如啲配件跟唔足同偷工減料呢？又唔係播！
足料配件
首先佢跟個靚靚嘅真皮耳機盒，個尺寸可以放到條8絞耳機線加對耳機，仲有位放多對耳膠。講起耳膠，佢地除咗送一set SpinFit之外，仲有多set耳綿同耳膠，係佢地特別俾EST112作調音之用：
灰色係標準耳膠，籠統啲講係雜食偏向。
白色耳膠係俾高音同通透感多啲，啱女毒同樂器向。
黑色耳綿係俾用家想隔多啲外來嘅聲，同埋減低毛剌感之用。
淨係膠都一大堆仲要隻隻有不同用處，完全無馬虎。其他嘅耳機布呀，3.5去6.35嘅轉插呀，清潔棒呀等等就一定有都不用多講了。
特製外殼
用五軸CNC車個鋁殻，而個後腔用半開放式設計，諗過度過去fit隻13.5mm大動圈，等佢有足夠進氣量，令到個下潛同動態更為標青。面板呢？就用鋼材去做個面板，而整隻耳機一啲sharp角都無，配戴感十分之貼服同唔會有一個位係拮到個耳殻。
自家換插頭線材
MMCX插頭，而線基係銅鍍銀，個特性基本上係百搭，有微輕柔嘅快速感鍍銀同有令低頻量加乘嘅銅應該係無走雞嘅匹配，不過我呢手上又有DUNU嘅線，HULK同翡呢兩條線，唔通嘥咗佢地咩？
錯啦，佢地自家製的線係可換插頭嘅設計，你用咩DAP就換咩插，EST112就跟2.5，3.5同4.4嘅插頭，基本上就可以玩曬現今所有DAP，大家留意下佢地自家嘅線材啦。
輕輕的推
貼地不單止講啲配件同線材，仲要加上另一樣野，就係～EST112係一隻易推的耳機。咪以為有個靜電單元你地會覺得下下要用耳擴先得嫁？你估真係咩大力出奇蹟嗎？
用手機都能夠駕馭得到，噤又唔係話100%，話曬都有個圈喺度，但手機都確實係可以出到一個比正常狀態還要好嘅聽感都算係玩得過嫁。
DUNU有此舉無非都係想大家跌入呢個Head Fi坑，無論你係用電話，用DAP，又或者各下串啲用枱機，EST112都能夠俾到同前端同等份量嘅音色同音質過你，好聽啲講係佛心，但小弟覺得。。。。。。
聽感和配搭
iBasso DX300
配DX300用其實Low Gain便可，分析力同高頻個細緻感會更加突顯EST112嘅靜電味道，延伸感會更加好。不過如果大家想聽高動態如Band Soind就較去High Gain個令低頻Punch得再深一啲，包圍感會更加飽滿同音樂感再重味啲。如果聽人聲的話，都係建議用Low Gain吧，個音尾長返啲，聽落去更加甜的。
HiBy New R6
因為New R6屬於分析力微冷的DAP，所以配EST112的話整體三頻會黎得比較平均，中和咗個高頻嘅剌激感。建議用High Gain帶返起低頻個動態，如能推動多啲個13.5mm圈整體會再暖啲同音場再會圓滑啲。基本上New R6同EST112夾埋變了比較中性偏暖，雜食型嘅取向。
Cayin N3 Pro
用個膽Mode就最得我心意，會令個中頻膽味更加濃郁，毛燥感會即時收斂咗更加順滑。高頻會後返啲啲，不過受惠就靜電單元關係，個華麗感依然Keep到。低頻想爆啲都係老規矩用High Gain吧，一係轉用4.4谷一谷佢，會有幾明顯嘅加乘。
Shanling M3X
16X MQA加持下，個分析力真係無話可說，不過音場會呈現楕圖形，中頻都幾闊，比高頻還要闊，所以好睇你聽開邊種類型嘅歌，小品同人聲嘅可以Low Gain細味一下，但一到啲勁歌會有啲吃力，下潛同動態就必定要較High Gain去俾力量佢。不能一個setting用去全部歌。
總結
EST112整體聽感係一款耐聽型的耳機，高頻同超高頻段一點都不剌激，柔和同舒服的音感，沒有誇張嘅分析力同音場，聽得耐也唔會攰。人聲位置正中，結象都唔會太大，同埋個定位恰到好處。至於低頻喺剛收到機的初段係有點緊，應該係13.5mm雙面鍍鈹震膜的關係，煲咗一百個鐘之後動態同下潛會比初開聲有明顯嘅增強。個速度感唔係話十分快速，屬於中度偏有點點慢的類型。耳機屬於比較易推動，用手機都聽能夠有相當唔錯嘅效果（估唔到鍍鈹13.5mm動圈會用電話有呢個效果）。EST112都幾受線材影響嘅一款耳機，試過換手上嘅升級線去聽會有著意想不到嘅提升，用了Beat Audio NewNight、PWAudio 1960s、DUNU HULK和翡都會有明顯嘅不同效果。
EST112 耳機規格
單元： 動圈單元：13.5 mm 雙面鍍鈹振膜動圈單元 x1
動鐵單元：Knowles 訂製獨立高頻動鐵單元 x1
靜電單元：Sonion 訂製極高頻靜電單元 x2
靈敏度： 110dB ± 1dB @ 1kHz
總諧波失真： ＜0.3% @ 1kHz
阻抗： 10Ω @ 1kHz
頻率嚮應： 5Hz - 40kHz
外殼： 航空級鋁合金
EST112 線材規格
線材： 4股高純度單晶銅鍍銀線（DUW 02S）
絞數： 四絞
線長： 1.2m ± 0.1m
插針： 專利膨脹式MMCX插針
插頭： 專利自鎖式快速可換插頭。包裝內附三個插頭
（4.4 mm 平衡、3.5 mm 單端、2.5 mm 平衡）
建議零售價: $3,999
[Facebook Group] : [WEM 本地耳機及音響交流區]
[MEWE Group] : [WEM 本地耳機及音響交流區]
[Facebook 專頁] : Facebook WEM Media
[WEM Media 網頁] : WEM Media
