最近就同大家玩咗幾隻混合單元耳機，突然之間手痕想玩番啲傳統啲概耳機，而家市場上仲有咩的旗艦仲做緊動鐡呢？

64Audio 一直都係大家嘅信心保證，諗返起當年隻Noir真係引死我。呢隻U18S係U18T的後續型號，每邊用咗18粒動鐵單元。64Audio就講明呢隻後繼機會係外觀同聲音全方位超越舊作，皆因呢幾年間(U18T於2018登場)，64Audio 佢地搞咗新技術，下面同大家講下。

心思配件配套

首先同大家講下配件。當我打開盒就發現有驚喜喎，個耳膠架好特別，咁佢就唔係好傳統果種長方型嘅盒仔，而係用咗好似個蜘蛛網嘅的支架上放曬啲耳膠，中間就係黑色高密度耳棉，外圍係兩款耳膠。我覺得個設計幾有型，插齊耳膠好似個陣法咁，可以比我召喚番我個腎番嚟咁。

特色立體面板

跟住到個機身。U18S 塊面板由原塊航太鋁合金 CNC 切割而成，摸上手都幾高級，但係又唔會凍冰冰，而且唔會係好重身的金屬。個紋理係似一個網咁，有啲群友話睇到好有密集恐懼症，但我又唔覺喎。因為面板閃銀色，而係唔同角度下會變色，由深灰變到黑色，同個機身個tone係好match。

特别定訂制單元

第一個比較有趣嘅係今次64Audio今次為 U18S 特別定制了動鐵單元。個單元內部特別做得緊湊，而且驅動個單元的磁石都有大幅加強。咁做嘅目的係播放大音量或者大動態時，個單元可以易推，唔洗大上大落，穩定運作，又落amp或者high gain又唔會過推，大大增加個可玩性。

元祖APEX模組

第二個當然係64Audio招牌嘅APEX模組啦！唔知係咩嚟嘅朋友仔，我就簡介一下，其實就係耳機放氣的位，等長期聽果陣唔會覺得耳壓大而攰啦，呢個模組亦能調節低頻音量，等大家揀自己鐘意嘅聲。今次計埋原本個模組總共有成3個模組。一陣就講下有咩各自個聽感係點樣。

聽感

U18S用的全新單元非常有特色，開聲果下就覺得好有「鐵味」，成個聲音第一下就覺得有非常充滿無可比擬的聲音密度同聲壓。我一開始插M15果陣覺得啲聲都幾aggressive，三頻都好凌厲，歌手嘅每下呼吸同埋啲低音都展現出強大的細節同聲壓。

U18S的音場中規中矩，係一個幾圓的音場，而且係縱向方面突出少少。不過我覺得成件事嘅重點係U18S的聲音相同飽滿，可以填滿曬成個空間，高中低三把聲都好緊緻，線條感強，加埋個分析力令到個聲音結像好立體，口型係集中。

用咗原本個APEX模組(M15)(灰色)嚟試，個聲音好平衡，收放速度又好快。雖然係冷聲，但就係一種好舒服嘅冷聲，你會feel到個厚度同埋順滑度好好咁平衡。高頻延伸能力好到好盡，但係冇開曬叉，而且中氣十足，好穩定，線條粗中帶細。為整個U18S的聲音鍍上一層閃亮的質地。M15整體平衡得來，聽發燒人聲真係好有加乘，由於個中音的密度好大，又好集中，所以個人聲好有穿透力，聽番玉置浩二把聲，原本佢把聲係聲壓其實唔大(比起專sell低音砲個啲大叔)，係個溫柔大叔，但M15下把聲唔洗低音都好似按摩緊個耳膜咁。

跟住就用M20(銀色)去試下其他的歌。咁呢對M20嘅聲就偏向V聲，個低音潛深咗，同埋個高音的延伸響度都有所增加，而個中頻就後退番少少，唔會好似係M15下將個人聲推到好前。個音場就會向前後推一格，左右就收番啲。我就覺得m20個聲比較傳統少少，整體比M15再重身少少(唔係厚身)。因為個人聲唔會話好突出，成個音色比起M15乾身，加埋個低音打得再狠，個tuning係強調動態同埋大開大合嘅線條感，咁攞嚟聽電子音樂比較啱少少。我加埋條TAWA去再谷下個高音，真係華麗到呢。。。好似官方咁講，個聲音充滿微細節，個高音去到高之餘又冇拆聲，係正嘅。

最後就試埋mX。呢個聲音就同m20完全相反，係完全專注係中高音上，因為個聲壓減得少(-10dB)，所以聽感上就傾向open-back 咁。具體個聲音就係開揚清晰，音場同空間感係3 set APEX入面做得最好，個人聲比起M15都仲係後少少，但又比M20前番啲，口型集中。個高音唔洗講，一定係最好，響得來線條又分明，速度會偏快得來有啲空氣感，用原裝線已經可以做到個用TAWA時的高音咁；個低音就仍有一定下潛同量感，不過就比起其他兩set冇咁強存在感。我就試咗落Cayin C9 試下個class A mode 來調味，就會令個聲音開揚舒服耐聽，冇其他兩set咁大信息量。

我下面再講下係三部DAP下的表現

配搭篇

歌曲：米津玄師 Flamingo, Anne Sophie Mutter Ray's Theme, Billie Ellish Bad Guy

耳膠：原裝灰色耳膠

Lotoo PAW GOLD Touch 墨菊

墨菊把聲係好重分析力，而且個結像好凝聚，夾落U18S就令佢收起了鋒芒，修飾佢比較銳利嘅邊邊，高音個毛刺感可以話磨到冇咗，而保留個分析力之餘又可以令成個音色好結實，增加咗肉感。墨菊用Low Gain就較順滑，動態較小，可能會有朋友仔覺得悶咗小小；用High Gain會比較好，開揚得來又唔會過推，亦都可以令個穿透力強啲。

iBasso DX300

DX300就唔洗話好大力。因為DX300個高音比較突出，加埋本身個聲底偏清，配合U18S可以話係可以做到個好開闊嘅高音，線條感會比起鈦菊纖細，空氣感充足又活潑啲。Low Gain 個聲音自然舒服，音場係大圓型，配合U18S本身個銳利度，聽小提琴solo一流。

樂彼 P6 Pro

夾P6 Pro個感覺其實都幾得意，佢原全將U18S個動鐵味原全消除，取而代之就係有啲靜電單元果種中頻的味道。樂彼主要係U18S個中頻加番個潤澤度，高音收咗好多，中頻的層次感打開咗好多，低音個punch淺咗但就有彈性咗，個音色變化比起其他兩部DAP明顯。

總結

其實係呢個年代好少廠會出純動鐵耳機啦，大家都鐘意玩多款單元混合。當初估唔到64 嘅最新作係回歸「傳統」設計，等大家再次認識到佢功力之深厚…… U18S就好好咁展現動鐵單元的優勢：係中高音有好強的聲壓，扎實線條刻畫得入木三分，結像立體清晰，個低音雖然同動圈的自然度冇得比，但都潛得深同埋收放快。官方講嘅定製動鐵單元果然有料到，試好咁耐都係好實淨的聲音。同埋U18S表現好穩定，換線同上擴都可以保留到自己嘅聲音，屬於易夾一族，唔洗用好多心機去就隻耳機，當然落下心機玩都有唔同風味。