終極坦克 - FiiO M17
Head-Fi市場產品推陳出新，技術同聲音既進步幅度都越來越大同越來越快，而最明顯既影響，莫過於手提機都開始向住家用方向進發，而因為零組件質素越來越好，再加上唔同廠商之間既良性競爭，品質管理得到重視，「便攜枱機」呢個諗法，亦都終於浮出水面。
過去都有廠商嘗試過做呢一類型既產品，但奈何體積同「便攜」呢個形式都仲係相差甚遠。時間來到2021年尾，Head-Fi市場面對好多挑戰既同時，亦都多左好多，擁有多元發展方向同新型技術既產品出現；老牌子FiiO，亦都選擇係呢個時候推出全新旗艦機 M17，研發目標好清晰，就係「便攜枱機」！
究竟一部枱機點樣達到便攜，或者便攜機如何能夠趕上枱機既性能，自從M17既消息傳出之後，呢啲疑惑就一直有唔同既見解。而無論係過去既產品推出又好，到今日既M17都好，FiiO老闆James都好活躍於網上唔同媒體分享產品既開發理念同設計，有時仲會綜合埋係網上收集到既意見，轉化為數據、回應，同係產品上作出修改；呢樣野係我覺得幾佩服既地方，尤其近年來見到FiiO既每一件新產品由構思到成品，都越來越成熟、合身，聲音既進步就更係不在話下，睇得出佢地係非常尊重市場意見既，同埋，可以直接同老闆對話，都係窩心既舉動來既。
係呢個基礎之上，我地返返來個箱度先。首先因為M17都有咁上下既體積，再加上DK3散熱器，成個盒係非常之龐大，拍得住枱機既。打開外盒，就會見到兩件產品既包裝：M17既盒，打開封套同揭蓋之後，就會見到主機，個mon成5.99寸，開箱個刻已經感到震憾，上面既保護貼就話俾你知佢既硬件配置。專用皮套已經預先裝上，而下層就係跟機既電源線同USB線。
第一感覺，上手有返咁上下重量，不過因為機身側邊設計成斜角，手感都唔錯既。體積方面，我係可以一手揸住的，而個皮套就加強左個grip，無咁易甩手之餘，啲邊角位既保護都做得好好，無咩特別都唔好除左個套來用啦。
成個機身既設計語言硬朗，菱角分明，加上個碳黑色機身，觀感比較重型。鋁合金機殼以CNC製成，配合特制俾M17零件既散熱結構，熱力將會透過成個外殼消散，個DK3散熱風扇就係咁樣既作用…不過日常出街使用，熱量都接受到既；至於放係背囊、手袋度用既朋友，就唔好額外再包多層袋做保護了，會越積越熱架。
講到便攜枱機呢樣野，無枱機配置、輸入輸出既話，又點可以話係枱機呢？所以M17係FiiO有史而來最多輸入輸出選擇既手提機，除左正常既3.5mm單端輸出同4.4mm/2.5mm平衡輸出，仲特設6.35mm俾你插頭戴式耳機。而數碼輸入輸出方面，M17就提供左：
同軸插口，支援輸入訊號解碼，亦支持輸出訊號到其他解碼器
USB 2.0 type-C（USB Host），可以插外接Harddisk，方便輸入解碼；
USB 3.0 type-C（USB 3.0），作為USB DAC或USB Host使用，接駁其他前端如PC、MAC，或者其他USB俾訊號既前端。亦可以經呢兩個插口輸出數碼訊號到其他解碼器
藍牙5.0，支援aptX HD/Adaptive、LDAC既接收同發射。可以用來駁藍牙喇叭
硬件方面，M17採用左雙ESS9038Pro DAC同一對THX AAA-788+既訂製耳擴模組，輸出功率比原版788模組高225%；兩者都屬於需要供電穩定同充足，先可以發揮真正實力既組件，所以係供電電路上FiiO就加入左470mF DMF超級電容同低噪聲LDO，加強供電穩定度；M17更加入左DC直接供電既設計，只要以跟機既火牛插落機體底部既DC電源輸入，就可以大大增強模擬電路既供電電壓，解鎖M17重點功能「超級大耳模式」，加強放大增益，成個聲音既表現都有好大分別！下面我地就會就兩個模式既聲音做個比較。
屏蔽方面，呢部機一樣落足心思，將數碼同模擬部份分成兩塊PCB，再係重要零件上裝上銅合金屏蔽罩，杜絕機內電磁干擾，呢個設計亦係M17聽落底噪非常少既原因之一。
重點講完，係時候要講下重中之重 – 究竟佢既聲音打唔打動到我呢
電池供電模式
其實FiiO既播放器，有一段時間係市面上音質既一個指標來，不過已經要數返去X5II既時代，當年FiiO對音染同質感既展現能力，係好多人入坑既首選來。
點解會講返佢？因為佢提醒左我一樣FiiO有段時間都唔係太中我既地方：因為音色追求「真」，追求高清，聲音又要做得大包圍，太過直白線性既均衡音色，又缺乏左一啲推動音樂節奏同感情既起伏，有時令聽音樂既樂趣大大減少。
而呢個反應，其實由M11開始已經做得好左好多，而係M17身上就係一個風格既轉變。部機第一耳既效果已經非常討喜，有兩端動態既強勁起伏，有FiiO引以為傲既中高音穿透力同還原度，而更重要既係，個底做得穩定有力，聲線來得緻密，但鬆緊有序，成個聽感更加從容，更有餘裕。最正既係當我去試聽一啲人聲為主既流行曲時，歌手唔再係頂住喉嚨地唱，因為中低厚度增加，能量大小對比清晰，人聲既肉感表現得當，有高低，有喉嚨處既深沉，亦都表現到女聲既高亢，成個效果係更加令人想聽落去，聽下究竟呢部機係米個個人聲都還原得咁自然。
延音清晰，而且個延音量係豐富既，但衰減得輕柔，聽感自然，染色染得舒服，人工味不重，亦有令成個音場拉深既效果；闊度並未有因推力增大而有所加減，反而係隨住能量感明顯比同級機表現得有力，而做就左好多微細節既出現，例如現場演唱既觀眾歡呼，或者鼓棍唔小心打到mic，呢啲咁小既事情就令到成個景象豐富好玩左好多。用呢部機聽歌真係一個樂趣來。
DC供電模式（超級大耳模式）
接上DC電源，放上個散熱座度，機身側啪返個制，你就會進入M17既另一個境界。
當你仲未明白咩係推力再大左既效果，你只要比較下M17既高增益同超級大耳模式既聲音表現就會明白。呢個模式並無想像中將音壓加大一級既效果，音壓只係加左小小，聲音好似光亮左：咁你就會開始慢慢入到去個狀態度了。咩狀態？係享受，係更加吸引既還原力。
音色走向沒甚變化，但最明顯既變化來自音場既表現，所有聲音都顯得更加精緻，因為光暗對比度去得更盡，樂器既光暗過渡更加豐富，令到成件事更加立體。而以DUO為首既一類遇強越強既耳機，係M17推動下連位於邊界既聲音都會變得清晰，造就出一個更加橢圓實在既空間表現。
總結
M17係一部無論功能同性能都好豐富既機體。
當枱式機一直提倡一體機既好處，手提機就已經向住呢個「一體機」既方向步步進逼，今次M17無論係軟硬件上都突破左佢既現行產品線，例如供電設計，例如對耳機特性既調整同寬容度，都係歷來之最。尤其係當佢仲用埋Android 10，支援唔同既現代連接方式同8x MQA解碼，仲有一堆輸入輸出界面，實在搵唔到一個位去挑剔佢。
實際上，適合用佢既人羣係非常闊既，皆因有邊個唔想一件價錢，有三種享受呀？出街用可以，返到屋企插喇叭又好、耳牛又好，甚至你話用來打機都好，M17都總有功能你係會用得著。另外一個point係當DUO出現既時候我先諗到：既然佢都可以做到開放式耳機既效果，仲有個種舒適度既時候，咁我配埋部M17，米可以取代曬我屋企既枱式Head-Fi配置囉。慳位之餘，仲唔會嘈到隔離添。
M17規格
顏色：黑色
機身材質：鋁合金
顯示屏幕：5.99寸 in-cell 全貼合螢幕，1080*2160 解析度，
支援音訊格式： MQA、DSD、DXD、DST、WAV、WMA、FLAC、ACC、ALAC、AIFF、OGG、MP3
USB連接方式：Type-C USB 3.0（高速資料傳輸和快充）
WiFi：2.4Ghz/5Ghz（支援DLNA、AirPlay、WIFI傳歌）
藍牙：V5.0
存儲：4G RAM、64G ROM，可拓展Mirco SD（TF）卡槽
電池：9200mAh
充電時長：約4.5小時
播放時長：約8小時（受不同操作方式及音源影響，可能有所增加或減少）
尺寸：約156.4mm*88.5mm*28mm
重量：約610克
標準配件：主機/ Type-C資料線/ 真皮保護套/ 鋼化膜及PET膜/ TF卡針/ DK3
M17售價：$15,888
音訊參數
聲音輸出：3.5 mm單端插座+2.5mm平衡插座+4.4mm平衡插座+6.35mm單端插座；
數碼輸出：同軸RCA插座、USB
PO輸出部分性能參數（大耳模式）
輸出功率1 ≥740mW（16Ω / THD+N＜1%) 輸出阻抗 ≤1Ω（32Ω）
輸出功率2 ≥500mW（32Ω /THD+N＜1%) 聲道分離度 ≥75dB（1kHz/32Ω）
輸出功率3 ≥63mW（300Ω / THD+N＜1%) 失真加噪聲 ≤0.0007%（1kHz/32Ω）
底噪 ≤3.5μV（A計權） 信噪比 ≥120dB（A計權）
頻率響應 5Hz~80kHz（-3dB） 峰值輸出電壓 11.3 Vp-p
PO輸出部分性能參數（超級大耳模式）
輸出功率1 ≥1.4W（16Ω / THD+N＜1%) 輸出阻抗 ≤1Ω（32Ω）
輸出功率2 ≥1.1W（32Ω /THD+N＜1%) 聲道分離度 ≥75dB（1kHz/32Ω）
輸出功率3 ≥126mW（300Ω / THD+N＜1%) 失真加噪聲 ≤0.0009%（1kHz/32Ω）
底噪 ≤3.5μV（A計權） 信噪比 ≥122dB（A計權）
頻率響應 5Hz~80kHz（-3dB） 峰值輸出電壓 16.9 Vp-p
線路輸出部分性能參數
失真加噪聲 ≤0.0006%（1kHz/10kΩ） 信噪比 ≥120dB（A計權）
聲道分離度 ≥103dB（1kHz/10kΩ） 底噪 ≤2μV（A計權）
頻率響應 5Hz~80kHz（-3dB） 線路輸出電平 1.9V（1kHz/10kΩ）
平衡耳機輸出部分性能參數（大耳模式）
輸出功率1 ≥1.5W（16Ω / THD+N＜1%) 輸出阻抗 ≤2Ω（32Ω）
輸出功率2 ≥1.5W（32Ω /THD+N＜1%） 失真加噪聲 ≤0.0007%（1kHz/32Ω）
輸出功率3 ≥250mW（300Ω /THD+N＜1%) 分離度 ≥108dB（1kHz/32Ω）
底噪 ≤7μV（A計權） 信噪比 ≥121dB（A計權）
頻率響應 5Hz~80kHz（-3dB） 峰值輸出電壓 19.7 Vp-p
平衡耳機輸出部分性能參數（超級大耳模式）
輸出功率1 ≥1.5W（16Ω / THD+N＜1%) 輸出阻抗 ≤2Ω（32Ω）
輸出功率2 ≥3W（32Ω /THD+N＜1%） 失真加噪聲 ≤0.0009%（1kHz/32Ω）
輸出功率3 ≥500mW（300Ω /THD+N＜1%) 分離度 ≥108dB（1kHz/32Ω）
底噪 ≤7μV（A計權） 信噪比 ≥123dB（A計權）
頻率響應 5Hz~80kHz（-3dB） 峰值輸出電壓 27.7 Vp-p
平衡線路輸出部分性能參數（A計權）
失真加噪聲 ≤0.0006%（1kHz/10kΩ） 信噪比 ≥122dB（A計權）
聲道分離度 ≥105dB（1kHz/10kΩ） 底噪 ≤3μV（A計權）
頻率響應 5Hz~80kHz（-3dB） 線路輸出電平 3.9V（1kHz/10kΩ）
Sponsored by CarveLink
[Facebook Group] : [WEM 本地耳機及音響交流區]
[MEWE Group] : [WEM 本地耳機及音響交流區]
[Facebook 專頁] : Facebook WEM Media
[WEM Media 網頁] : WEM Media
