第一代既Sendy Audio平板，係中階市場中擁有特別既雙面磁高強度平板單元加持，聲音精神有活力，對推動性要求亦比較親民，輕鬆一部入門耳擴已經有唔錯表現，音質表現亦有返咁上下，得到各方好評。

廠方暫時有既三對耳機，都講求將「人手工藝」加入整個製作過程，最明顯既就係，每一件產品既木腔外殼都打磨得非常光滑、部件密合，質素來講係國內首屈一指。

等左三年，終於迎來今次要介紹既全新旗艦大耳Peacock，由內到外全面昇華，而實際聽感亦反映到呢三年來Sendy Audio係技術同研發力方面既進化，加上一個相對較可口既價錢，絕對係廠方野心之作！

初次觀感，Peacock擁有Sendy Audio傳統既設計語言，木殼、金屬頭樑，不過從外觀上已經能夠睇到構造大有分別，由過去Aiva既鵝蛋型轉為圓型設計，housing空間更大，單元亦升級為88mm平面震膜，結構亦不盡相同；做工方面，所有木頭外腔都係由廠方精心挑選（包括舊代Aiva同Aiya），人手切割打磨上油，所以手感好順滑，仲保留埋木頭既自然紋理，唔會因為加上光油而令觀感顯得太膠。

金工件密合得非常好，尤其睇返鍍金面板同木腔體既交接點，你唔會見到有一絲多餘空隙，呢個亦係人手打磨既其中一個好處，因為可以根據唔同金工件個小小offset來慢慢調整，成品就更加完美。

耳機最搶眼既地方莫過於黑金色相間既單元面板。若果你再細心留意，呢塊面板其實係雙層構造，頂部既黑色金屬片用上尤如孔雀開屏既氣孔設計，底部就加上鍍金色既開孔面板，由少至大梅花間竹既孔洞加工難度極大，除左令觀感更有層次，亦係耳機單元既調聲關鍵，透過多重氣孔既不同進氣量，加強氣流流動，令低音既層次表現得更加出色。

不過講到最尾，個人最鐘意重新設計既頭樑同Earcup。先講頭樑，雖然Peacock唔算係重身既耳機，不過Sendy Audio仍然就呢個頭樑既形狀下左啲苦工。戴上頭後，你會明顯感受到重量分佈由頭中擴散到側邊，用來定位既頭帶鎖定良好穩定，而且無咩壓逼感，整個頭樑構造亦由Aiva既全金屬物料升級為羊皮材質；耳罩用上相同外皮，比較柔軟，內裡既cushion就用上前薄後厚既設計，令耳機上耳後單元微微傾斜，就返聲波既入射角度同耳形，亦避免壓到耳骨，影響舒適度。呢兩日天氣轉涼，呢對耳機我戴耐左，都無話有墜頭呀，頭暈個種感覺，整體既佩戴感係一流既，作為家用耳機呢個真係首要既選購目標來。

重點既單元使用方面，Peacock用左自家研發既QUAD FORMER 88mm平板震膜，單元腔體採用航空鋁經CNC加工而成，震膜物料為求輕巧堅韌，而用左兩份軟硬度不同既複合物料組合而成，特別係震膜正反兩面都同時鍍上正相同反相線路，並輔以雙面磁鐵加強磁場，令震膜係同一頻響下能夠達成更一致既運動方向。震膜既固定方式亦非常新穎，四角都由一束磁路所連接，結構有效增強單元既運動幅度，亦係呢塊平板單元低音特別出色既原因之一。

咁呢份單元既實際聽感又如何呢？

上面點解我有提到低頻呢樣野呢，其實係我印象中既平板單元低音，都係比較平順同圓潤，無咩好特別既軟硬度變化，或者力量上既體現；呢個重播效果當然係表現中高頻方面係有更大優勢，只係有感缺少左應有既attack，令低頻有點平平無奇，聽某啲歌就會有到喉唔到肺既感覺。

Peacock同樣擁有呢種線性平順既效果，量都不算係Bass-head類型，不過低音既質素就來到更加有feel。力度明顯較其他平板耳機大，低音既下潛係未熱身既狀態下已經係毫不費力咁表現出來；鼓類既打擊同收結都非常靈敏，能夠聽到唔同力度大小既鼓聲差別，而主要聽band既我，就特別鍾意佢連bass guitar用pick同用snapping彈奏既音色變化同重量都表現得當，對比更加明顯，固中既聲音速度變化同控制力，真係呢款單元質素方面既體現。

來到中高頻方面，Peacock對前端既音色走向會比較敏感。例如係木結他上既表現，有啲前端會聽到木腔共震特別full，而令撥弦attack唔清晰；或者因為收結太快而無左弦線既延伸。同推力無關，因為兩個走向都真係隻amp既特色，只係Peacock會幫你放大左呢個效果。若果你已經決定左個source，咁係呢個位，或者就要從線材上做調整。Mini-XLR插唔難搵到線換既。

整體既走向維持住寬鬆感、暖度、結像豐滿，尤其中高音方面，穿透力唔係重點，延伸亦係見好就收既類型，不過質感表現就相當流暢。對比Aiva，走向係成熟同高貴左既。

若果以我手上既器材去配搭，我會偏向用近排做完review既Shanling EM5來做配合，一來推力足夠有餘，二來三頻走向均衡，中頻微微突出，補足返Peacock既V型走向。音場既深度會有所加強，場前場後既對比會明顯啲；聲音質感既變化會較多，無論係金屬樂器既鏗鏘定大提琴既厚度都能夠直接反映到，而且控制力加強既情況下，收放會迅速啲，令中低頻過渡更加順暢，個種弦線既彈跳感亦會更加出色。唯一係結像力都係偏向寬鬆厚度型，就算落到EM5個進步都不算係太大，若果你係需要比較實淨既樂器或者人聲形態，Peacock就可能會遜色啲既。

至於便攜類型既Source，試左幾部都係覺得Xudoo XD05 BAL會比較適合。推力唔錯，而且有少少顏色加入左整體既聲音入面，令Peacock表現出更加豐富既同可口既聲音表現，尤其適合聽小品人聲，個種聚焦既感覺同埋口型變化，係呢個組合既強勢之處。同EM5組合最大既分別，就落到低音既表現方式，EM5會比較強橫同迅速，XD05 BAL就反而會有個種一浸浸既包圍感，令到成個聆聽既感覺更加愜意。