入門16X - Shanling M3X

最近收到部山靈嘅M3X後，好多人走過嚟問我咩聲，我就答番佢地：「都真係幾鬼正，你可以去聽下啦！」結果又真係好多人聽完之後中左，乖乖地咁課咗金，仲有師兄連行貨都等唔到，就直接衝咗部水貨番嚟…… 買咗嘅師兄姐可以一齊係到同我一齊分享快樂，未買嘅你……睇完之後應該好快會一齊分享喜悅……

技術簡介

嗱，我覺得M3X最重要的特色有兩個：硬解MQA 16倍同埋單雙DAC模式。

M3X用咗業界最新(同埋第一部)的ESS9219C 雙DAC，呢隻DAC 係新到Google 唔到啲咩出來，只係會有M3X相關嘅資料出來。呢款DAC 最勁就係可以硬解到MQA 16倍展開，用硬解的好處係效率更好之餘，個數據都會性能都好啲㗎。其實一睇見到佢話可以16倍展開我係唔信嘅，因為邊有可能係部入門機到搞啲咁嘅野呀……連大佬M8都只係8倍展開，唔通而家用16倍係唔洗錢？

仲有個單雙DAC模式都幾得意，我就未見過有機可以比我咁揀。呢個選擇可以當單DAC係「省電優先」，雙DAC係「性能優先」，但試落又有少少意料之外喎，後面同大家分享分享………

下面放番個硬件規格：

操作系統：Android 7.1
處理器：Qualcomm Snapdragon 430
解碼晶片：ESS Sabre ES9219C X 2
支援音樂格式：MQA、DSD、DXD、FLAC、WAV、AIFF、ALAC、APE、WMA、MP3、AAC、OGG 等
支援最高取樣率：32bit/384kHz PCM、DSD256
記憶體：2GB（RAM）、32GB（ROM）
卡槽：microSD（最高支援 2TB）
耳機端子：3.5mm（單端）、4.4mm（平衡）
最高輸出功率：240mW＠32Ω（平衡）
其他端子：USB-C
屏幕：4.2 吋觸控式（1280 × 768）
電池：3,200 mAh
使用時間：23 小時（單 DAC 單端）、20 小時（雙 DAC 單端）、19 小時（平衡）
藍牙版本：4.2（支援 LDAC、LHDC、aptX HD、aptX、SBC）、具備接收功能（支援 LDAC、SBC）
Wi-Fi：2.4GHz/5GHz 雙頻
體積：109 × 72 × 15.9mm
重量：168g

外觀

個外觀就基本上係一部縮細左嘅M8，講開又講，其實而家各大品牌播放器都統一晒成個產品線的外觀設計，例如海貝、山靈和Fiio等等，到更換世代嗰陣先將成條產品線的風格轉一次。我個人就幾鍾意呢種「全家福」嘅感覺，尤其是成個產品單擺埋一齊影相嗰陣好有整齊感，亦都非常能夠幫助各個品牌建立自己的形象。

重量方面，我就覺得拎上手出奇地輕。雖然尺寸上佢唔係最細，但都幾肯定應該係同價位之中最輕嘅一部，在接駁多一部amp都完全冇負擔。

聽感

其實我覺得呢部機都幾令人驚喜。雖然話佢嘅整體硬質素未去到好高，仍然係屬於入門價位嘅上級水準，但佢嘅音色調教同埋分析力就可以直逼中階機。一開聲嗰下就已經覺得都幾唔似ESS嘅聲音，反而覺得係似CS混合AKM的聲音，成個聲音嘅質感係屬於柔順，冇咩顆粒感，而且感覺是軟軟的，溫馴得好似一隻綿羊咁樣。

但仔細啲聽，就發現係呢種溫暖的聲音下，個分析力好得出奇，我諗單論分析力，M3X可以同五六千蚊嘅DAP一拼㗎。M3X，三頻都幾平均，中頻的量感比較突出，但又唔會over咗。音場方面就中規中矩，橫向稍為比縱向深，雖然成個音場唔會好大，不過個分離度又做得好好喎，係聽較「混亂」嘅電子樂，都可以分得幾開。另外，M3X個低音做得唔錯，下潛不錯但量感較少，分析力好，唔係話好有包圍感果種，係一個好稱職嘅綠葉，始終安分地配合整個presentation。

上面我之所以覺得M3X咁鬼神奇係因為我一開聲嗰下我覺得咁暖嘅話，應該個分離度都會麻麻地。但M3X就過癮在佢係將「軟聲」的「分析力」好好咁結合咗一齊，個聽感就非常舒服之餘，又仍然可以享受到越級嘅分析力。佢個高音唔係話好出，但你會feel 到佢係中音到好順滑咁延伸上去，加埋佢本身個推力又大，背景安靜，所以成個聲音出到嚟就好自然，好容易同唔同嘅耳機夾到。

跟住就講下個MQA功能。M3X可以做到16倍放大，係目前市面上最平的支援MQA 16倍放大的DAP(上一級就去到海貝The New R6了)，呢件事其實仲稀有過見到超夢夢，因為佢大哥M8都只係得8倍咋。根據官方的說明，首先粒CPU會兩倍展開（軟解），再把信號(88.4/96Hz)傳輸到DAC做八倍展開（硬解），最後播放原本的(768Hz)的MQA檔案。

如果要播放本地MQA 檔案，用Shanling本身個Apps當然可以16X，而第三方Apps就好似Tidal 同埋USB Audio Player Pro（下稱UAPP）呢兩個Apps都得；不過而串流的話，Tidal 只能做到2X 展開，而UAPP先可以16X 展開，所以大家要留意了。

我就用UAPP去測試個MQA。係實際的聽感中，開咗16倍放大之後，最明顯可以聽到個音場大咗好多，尤其是縱向的音場前後距離感拉開咗，低音嘅下潛深咗之餘，個結像大咗；高音變得凌厲咗，所以原本的暖聲係一高一低的加強下係中性咗，個聲音嘅線條硬返咗啲，成個聽感真係全方位逼近中階機！

另一個好得意功能就係比人可以自己切換單雙DAC模式。咁大家要留意番「只係得單端先可以切換DAC模式」，平衡就只可以用到雙DAC。雙DAC模式下個立體感同線條感會出番啲，整體的方向會沖少少，但都係係好暖聲溫柔的框架下的；而單DAC的硬質素就會差少少，有個人聲同埋低音會「化」少少，不過山靈個味道就出好多，好順滑清甜，聽胡琳真係正到呢……

咁到底點揀好呢？我就話：「小朋友先會揀，大人係全都要……」所以我就發明咗一個兩全其美的方法：係單DAC模式下用MQA 16倍放大，咁就可以一次過滿足曬三個願望：續航、女毒、分析力通通都有啦……

最後，我見M3X個聲音應該都幾啱加大個力水去谷一谷個聲，所以就去插咗HUM 的MA-1S啦。用隻MA1S推到 Project 4+2 個低頻下潛深咗，動態都大咗。而TAWA帶返個高同中高頻個華麗感，人聲補返個甜度同潤澤感，音場又突顯舒服度同闊咗。整體黎講我覺得係華麗雜食系嘅取向，係聽好耐都無問題嘅配搭。原本偏軟的聲音係MA-1S的力水加持下，除咗將線條實番同低音下潛深咗之外，個動態表達得比較活潑，有返啲肉地噤啦。

總結

其實呢部機真係好鬼overvalued㗎，機身好揸又輕，聲音雖然唔會話好大力，但都可以feel到底氣十足，軟軟的聲音係好容易夾到唔同的耳機。最緊要嘅係，佢可以玩到MQA 16倍呀！！！而家只係比少少錢，就可以玩到咁高階的功能，真係好鬼殺食。今次我都真係好推介M3X，係入門機之中佢絕對可以借咗唔同玩法，攞到越級的表現。如果我地見到一部，啫係話可能未來好快又會普及MQA 16倍，好似我成日咁話，最後都係我地玩家得益…… hehe……

建議零售價: $2,680