一部可攜式的播放器但又重3kg；可以換模組的方式更換DAC同埋內置電但尺寸係比部枱機細少少；有2個KORG電子管輸出但仲有多兩組吉咗出黎俾大家有個想像嘅空間去諗下佢地下一步會係點做。。。。。以上種種加埋就結合而成了:

Shanling M30

第一眼望去M30就係個音量控制旋鈕，唔好以為淨係得個“大”字，其實佢個功能係有開機同關機功能，仲有按一下就係鎖屏。喺個旋鈕隔黎就係耳機輸出口，有單端：6.35mm、3.5mm，平衡：2.5mm、3.5 Pro、4.4mm、4Pin XLR，基本上有齊耳機所有制式嘅插頭！正正中間仲有個顯示音量嘅LCD顯示，唔洗估估下。

再睇機背有咩玄機？？同一部枱式前級無誤，有AUX RCA 左右輸入同輸出、3 Pin XLR-L同R輸出、Ethernet插頭、Coxial 輸入、光纖輸入、USB Type C的充電口、獨立USB Type A嘅數據傳輸插口、獨立USB Type A嘅音頻插口、獨立USB Type B嘅音頻插口，最後係用DC12V3.5A嘅獨立供電插口。全部分開齊齊整整，USB都有獨立供電/傳輸數據/音頻之分，可以令到電流盡量做到互不干擾，細心之處可見一班！

機頂分開上下兩部份，上面係觸控屏，6吋嘅1920X1080屏幕，造工十分精美，係目前所見到最滑溜嘅玻璃屏幕。下面就有兩個圓型透明玻璃嘅天窗，見到DAC同線路結構，好不過癮。

豪華鋁箱作為包裝，内有安裝組件嘅工具，特別在無啦啦有個吸盤？原來係方便大家將啲組件吸住掹出黎而又唔會整花。

主題係模組先鋒，點會少得有關模組組裝部份？機底有兩個大部件，電源同埋耳放部份，而各由兩粒六螺絲鑲嵌著。機身側面和機頂都可以組裝，好似砌Lego一樣，十分之特別。

組裝非常之方便，幾分鐘內就可以了。

電源部份由5粒18650電所組成，系統入面可以檢查到電量之外，仲可以詳細噤見到每粒18650嘅電量，可以令用家因應電池損耗率作適當嘅更換，十分之細心！

雖則M30係用Android，但不能自行安裝apps入去。唔緊要，因為佢地內置咗啲apps，聽歌之餘仲內置有串流apps：Amazon Music、Spotify、酷狗音樂、Qobuz同埋Tidal。我選擇其中一個Tidal去試下。用Tidal播放完全無問題之餘，唔講唔知原來M30有8X MQA加乘，一部枱機類嘅前級有8X嘅MQA，即係如果你自己有MQA檔案的話，都可以受惠到呢個加乘。

機側兩邊各有兩粒綠色燈仔，正正是Korg 6P1電子管，左右兩邊都有，要由系統入面去選擇的，選擇咗先會著。除此之外，仲預留咗兩個吉位，暫時未知Shanling有咩計劃，但可升級感滿滿。

講開要著個電子管個Pull Down Menu入面仲有好多功能玩！除咗可以選擇電子管之外，仲有晶體管同直通呢兩個選項。WiFi同藍牙就一定有啦，又有AirPlay。M30有個得意功能係可以選擇單DAC/雙DAC去聽歌，除可改變小小音色之外，仲可以慳電。增益同M8一樣，有個超高嘅過你揀，睇官方公佈個最高輸出係喺平衡輸出嘅超高增益，最大輸出有1530mW@32Ω，夠曬推坊間大部份嘅大耳牛了。

佢其他嘅功能都十分之強勁，用家可以當佢做一個播放器又得，當佢做一個USB DAC又得，又有同軸輸入，又可以用Ethernet攞NAS入面嘅歌，又可以光纖輸入等等。。。同一部多功能前級枱機無誤。

頭戴耳機聽感

Kennerton Thror

首先用Kennerton Thror頭戴式耳機做測試，呢隻耳牛一啲都唔難推，數據上得42Ω的阻抗，不過數據同真實聽感不一定有關。

在電子管模式下整體感覺是順滑流暢的聲音，空間感十足，分析力和控制好力亦表現出色。可能受惠於大推力下，動態和低頻的下潛也有雄渾感之餘但又不用出現過推的情況，這是M30優秀控制力的表現。

Sennheiser HD540 reference gold (600ohm version)

一對古老的頭戴耳機，600ohm的阻抗在M30的表現如何呢？用了XLR的插加上超高增益的狀態之下，音量調較至68之下到了足夠音壓了。看似好像很吃力，不過試完之後又無呢個感覺。音場同結象表現非常自然，高頻沒有毛燥感，仲有温潤感。開放式的頭戴耳機在低頻表現比想像中有適當的彈性，收放的速度感比較快，下潛同包圍感亦會比較屬於一般至淺。人聲甜美突出，沒半點齒音，和諧感滿滿的，一點都不覺得吃力。

Sennheiser HD414X (2000ohm version)

試呢對頭戴只不過是有點玩野，不過既然手上有，何不試試呢？

個設定同HD540 reference gold一樣，音量調較到6X已經有足夠的音壓。當然面對極端的例子各位不用太認真，只不過M30是我在試過所有DAP/可攜式播放器之中表達HD414X最為理想的一部。不要以為沒有低頻，反而表現得十分恰當，而最最出色的是音場，極之廣闊，定位也很準確，基本上每個樂器能夠聽得出獨立的定位。不過立體感欠奉，算吧，2000ohm。。。

總結

現在的DAP真的多如天上繁星，什麼類型都會有，各廠方想奇兵突出的設計一些市場上獨有而不千篇一律的機種。“可攜式”的方案可算是走較為發燒級的路向，對於一些燒友為求對聲音質素和音色會不顧一切地去追求，達致終極的狀態。M30估計是走終極路線的方向，音質和音色已經是沒有什麼可挑剔，多用途性如串流、8X MQA、Ethernet讀NAS內的檔案、仲有藍牙的LDAC和aptX HD、電子管和晶體管選擇等等，仲有齊市面上無論係單端同平衡輸出的大部份耳機制式插頭，可攜式的功能已經做足有餘。枱式功能也應有盡有：光纖/同軸/USB/XLR制式並存，還有一個最最好玩的就是模組式的結構，差不多全部機的部件：數碼部份/放大部份/電子管/解碼部份等等都可用官方出品的組件去升級/更換，一部差不多萬能的可攜式怪獸就此誔生。如果各位可以接受其重量（3kg），M30可以說是退燒之選。

建議零售價: $28,000