NG Audio - Heracles 大力神
係市場上屬於比較低調既品牌，而且相當年輕，但對於部份Head-fi友來講，佢或者係一班後起之秀。此前品牌屬於比較進取既類型，推出左兩對使用聲揚全新靜電單元作為主軸製成既 KHAOS同 EURUS，旗艦級配置，嚴格來講係品牌打響名號既產品來，自此之後係Head-fi界就開始熱門了。
喜聞樂見既就係，幾年前係會展既AV Show親身把玩過佢地舊一代既產品NG10同NG12，除左俾佢全金屬導管既內部結構驚訝之外，耳機所表現出既能量感同厚度仲特別厚重，加上一個完全唔似動鐵既低頻，當刻係對呢隻品牌特別有印像。
今次NG Audio推出既新品大力神Heracles，補完整個中高端產品線，更用上罕見既動鐵、平板、靜電單元三混合設計，話俾你知，中階都可以有好野！
Heracles 大力神
Heracles推出之前，市面上亦有幾款使用平板單元技術既入耳式耳機，因為獨特既音色表現，普遍開放式既設計，加上幾受力既關係，係玩味上就吸引左為數不小既朋友入手。不過，伴隨住平板單元體積同震膜縮小後，物理上既限制仍令單元頻寬過窄，兩端延伸度不足，低音量不足，難以抗衡外界噪音而不適合外出，亦無法發揮平板單元既先天優勢。因此應用既廠商終究不多。
NG Audio既做法稍有不同，外殼設計、輔助單元的技術、分頻方式都以平板單元作為主軸，令呢粒單元能夠係佢最擅長既地方發揮功用。
Heracles既平板單元只負責中高頻輸出，而高頻同低頻，則分別由靜電單元及動鐵負責，以此來減小平板單元震膜負荷；將低音轉移至動鐵負責，可以確保以較小推動力就能換來足夠低頻頻響，而平板單元既震幅則有效降低，發揮更為明顯既中高頻渲染力，帶來更加清晰、明亮既結像。而為左令中低音過渡順暢，NG Audio特別為Heracles搜羅專用動鐵單元，以此令動鐵轉換到平板既音色更加自然。
聆聽Sam Smith “HIM”，簡單配樂與綿密人聲，係Heracles既表現得最強勢既曲風，係平板單元既還原下，Sam Smith一貫濃厚、音域廣闊既唱腔得到非常優秀既重現。中頻主次排列整齊，係中段由Sam Smith帶入，鋼琴、和唱既合奏，更顯得呢粒單元既調整成熟，唔會將主和唱既聲音重疊，兩者中間有一小段距離。至於由喉音到中高音既主唱收結，亦能夠聽得出銜接沒有大問題，顫音延伸交足貨。
Heracles既外殼設計，亦同時應用左名為I.P.R.V（Integrated pressure relief valves）既綜合洩壓技術，係機身下方留有回氣口，連接腔內結構，提供充足空氣予平板單元及低音單元使用；內部洩壓構造結合低音單元設計，將耳道內既過量氣壓排出，理順氣流，協助音訊傳遞。外殼沿用旗艦型號既公模形狀，3D打印而成，貼合耳型唔在講，連我呢種直角耳道細耳型都得戴得好fit，呢個模既設計真係非常優秀。
呢個藍色雲母面板，睇來會毒暈唔小人
換線方式照樣採用平頭2-pin系統，原裝線既設定就直接用上4.4mm平衡插頭。線身偏硬，未必個個都會接受到，個人使用上雖然未有聽診器效應，但收納方面就要落D心機來繞啦。跟機仲會有一個金屬圓形收納盒：再提多一次，繞好條線先放落去。
播放器配搭
用上平板單元，數據上亦唔屬於難推既類型。但實際使用上，推力會比起音色更能夠發揮Heracles既實力，係比較Cayin N6ii Ti同埋IBASSO DX220 MAX兩部機既配搭下，大力神，都真係要啲力架。
兩者既最大差異會係中頻密度同結像力上，N6ii Ti雖然音色會更加可口，不過220 MAX就可以呈現比較健康既三頻比例同低音量感，收放速度亦更加靈敏。實際測試埋Hidizs AP80 Pro加上DH80，結果相似，但當然聲會粗身小小。
至於插電話既便攜手指，暫時都係L&P W2既配搭最出色。
聽感
平板單元既先天優勢，在於瞬態變化直接敏銳，獨有既厚潤度同彈性，更係表現中頻樂器、人聲既能手，而以此作為主軸既Heracles亦唔例外。
播放AGA既”CityPop”，全段音樂結合電子樂器、電結他與套鼓，節奏輕快，資訊量頗多，考驗耳機既聲音分離度同收放速度。係電子樂器呢part，Heracles既低頻反應迅速，力度感亦明顯，量感相對其他同價位耳機而言就稍為疲弱。中高頻表現仍然係主軸，平板單元能夠將AGA中高音既獨有唱腔呈現，線條感有微微圍邊，結像力就向著比較自然既方向，無話太過份地突出延音。
Karen Mok既”呼吸有害”用來測試人聲最好不過，但同時亦留意到Heracles對樂器既還原能力亦上乘。鼓皮既彈跳、金屬樂器既光澤，要能分辨鼓既種類亦都清晰容易。同時Heracles對於場前場後既距離感拿捏準確，能夠將音場表現得立體，又唔會有太強烈既山洞感，聲音質量都係比較實在既。人聲仍然係Heracles既強項，同AGA試聽時對比，更顯得中頻處理恰到好處，能夠還原返應有既厚度同質感，唔會話變得年輕、妖艷，忠於原著；顆粒感仲幾明顯添。
音色變化既豐富度，亦偏向於中高頻較多，泛音、空氣感等等直逼當年既NG12。兩者都屬於凌厲、緊緻既類型，金屬樂器表現尤其精彩。不過，Heracles係擊打既大小力度差異上會表現得比較明顯，亦因為洩壓口既存在，佢既延伸係清晰得來，唔會覺得煩厭，耳仔可以一直處於放鬆既狀態來聽歌。
低音能量感唔算強勁，但勝在收放迅速，力度適中，因此仍然能夠帶動音樂節奏。兩粒中低音單元既作用當以補強中低音質感居多。
總結
Heracles雖然屬於中階產品，但產品既表現同特性，其實都幾特別，幾有玩味，潛力亦都有絕對保證。只要搵返有咁上下力水既入門至中階播放器，已經可以伺候得好好：當然，若果你能夠投放到更加高階既播放器，甚至枱機，你得到既提升會非常之大。
技術規格
單元: 5 單元 3 分頻
單元分布: 2 中低頻 (BA)，1 中高頻 (PM)，2 高頻 (EST) 3 路分音設計
頻率響應: 5 Hz – 70 kHz
靈敏度: 100db SPL@1mW
阻抗: 14Ω1Khz
隔音效果: 26db(CM)
耳機線: 0.78 2pin 8 芯銅鍍銀
建議零售價 $6,999
Sponsored by DIGIBRAVE