Luxury & Precision W2-131
上回講完Hidizs嘅改良版新機，今篇文，就要講另一件都係改良版，但更加細小嘅DAP - 都唔係叫DAP嘅，應該係老鼠尾至岩，就係Luxury & Precision樂彼新上架嘅W2-131（下稱W2-131）了。咁大家可能都記得，其實不久之前我就review另一隻W2嘅，黑色嘅呢，記唔記得呀？
可能大家就即刻有好多問題啦。相信最多人諗緊嘅就係，點解會咁快出一隻改良版嘅老鼠尾呢？其實廠方係網上都有做左個解釋嘅，相信亦都係好多生產商係呢兩年間都會遇到嘅問題：原料供應越來越唔穩定，而晶片廠亦都不得不將產能轉移去更有競爭力嘅產品之上，所以原裝黑色W2-198（下稱W2）就面對住最重要嘅零組件停止供應嘅問題，就令樂彼要諗過一個更好嘅方法去應付呢個情況了。
最終定案就係將雙CS43198換成雙CS43131，繼續行返兩粒解碼去做平衡電路。睇數字可能會以為今次算係降級，但其實，43131呢粒晶片，就只係無左耳擴功能嘅43198，實際嘅解碼支援度同硬性指標係完全一樣嘅，無存在降級呢樣野。而且實際上，W2-131係比舊代W2，做左更加多融合嘅步驟，唔單止係換粒晶片咁簡單，而係係整體設計上去得更加盡。
要係一個已經非常完滿成熟嘅設計上繼續強化落去，基本上就等於將成件產品嘅舊設計劈掉重練，然後加人一啲新嘅元素去突破框框。所以W2-131成份電路板經過樂彼由零重建，無論軟件定硬件，都己經唔同曬了。實際效果，就係令整機信噪比做到過左官方嘅理論數值，同舊版W2睇齊；更神奇嘅係，透過一粒新訂制嘅耳擴晶片，加上重新調整正作電流，令推力有所增長，但同時用電量降低左10%，呢兩個改動令W2-131有更大空間去調整聲音表現。
成個音訊電路沿用W系列嘅訂制FPGA + DAC嘅玩法，由FPGA作為大腦，負責成部機嘅訊號處理同輸入輸出等等。另外，廠方亦將原先係W2上嘅樂調音進行改良，新版本叫樂調音Plus，一樣有Tune 01同Tune 02可以揀，最主要分別就係個音色嘅轉變會比上代更加鮮明。樂彼亦都保留返個8種EQ，雖然個EQ嘅調整方向係相似嘅，但明顯地相同EQ之下W2-131會保留到多啲音樂細節，相信亦係FPGA運算加強左後嘅改變之一。
外觀上，按鍵格局維持相同，不過背蓋就由黑色碳纖維換上強化玻璃，上面仲雷雕左樂彼嘅logo上去，古銅色嘅，外殼顏色亦轉左做磨砂質感嘅普魯士藍。金工質素非常高，邊位唔𠝹手，啲縫亦做得好密合。對上一次我講過話最鐘意W2嘅陽剛氣息，見到W2-131之後，我認我係有少少鐘意呢個藍配銅色嘅效果…
USB老鼠尾有個好處，就係隨插即用。貴為樂彼新一代老鼠尾旗艦，包裝已經包曬專用Lightning同type-C連接線，因為條線係特制俾手機使用，可以確保W2-131係手機上得到正常嘅供電質素，所以表現會較市面上其他線材為好。個人建議沿用原裝線，或者好似我咁，入手返條ERUA Audio嘅連接線去用呢啲老鼠尾，音質表現上會有加成。有擔心嘅米出去試左先囉，我就覺得既然係玩得W2-131，都係想有好聲音姐，何不再去盡啲。
插落手機，基本上無需再有其他嘅設定；當然Android手機用家可以再用埋USB Audio Player Pro，咁會得到一個更加完滿嘅聲音效果，再加上佢都支援Tidal串流，方便嘅。W2-131機側分別有三個按鍵，短個粒係屏幕開關，長個粒就係較大細聲嘅。長按短個粒制，就會入到功能menu，再用長個粒制來揀唔同嘅選項。等我列返menu嘅英文代表啲咩先：
EQ：8種唔同使用場合嘅FPGA EQ
SDF：耳機專屬調音
GAIN：增益
FLT：DAC嘅數碼濾波
SPDIF：同軸功能開關
DISP：屏幕自動/手動開關切換
HIDKEY：音量調節方式
UAC：UAC 1.0係俾PS5/ Switch用嘅連接協議，2.0俾手機用。正常使用請用2.0
Tune：樂調音Plus 01，02
係呢個選單入面，其實最需要知嘅就係EQ、FLT同埋Tune呢三個選項。三者都可以同時使用嘅，例如我近排有睇開Disney+，我就會用Movie EQ + LL Fast + Tune 01去得到一個口型適中、聲音收放迅速有力、同時深度有加強嘅效果，去欣賞Marvel嘅電影，成件事會更加震撼，聲音定位亦都會有小小環迴嘅。根據你做緊咩來決定唔同嘅調音選項，就係W2-131嘅玩法所在了。
來到聲音部份，我就想用W2來比較下，比大家睇下個差距。首先兩者係底噪方面其實都控制得好好，就算落返啲敏感啲嘅耳機，你都唔會聽到有個啲sisi聲。另外一樣野就係個調音上，聲底相似，都係好精緻、音樂還原得好適中，你亦會感受到個種順暢嘅三頻過渡同聲音定位，不過，W2-131會有更加明顯嘅聲音流動嘅效果，例如聲音由場左到場右，你會聽到由左至右，由近至遠嘅過渡，係好smooth，好乾淨嘅，呢樣係我睇奇異博士嘅時候表現得最明顯嘅一個分別。
落返音樂上嘅重播，原先W2已經係市面上數一數二，重播交響樂質素最好嘅機體，但而家W2-131就登上左呢個寶座了。結像大小精準，嗰個深度嘅表現唔淨止係大細聲嘅分別，而係有一種好實在嘅效果，就算係一個定位比較後排嘅樂器，佢都俾得返個件野嘅聲音延伸你聽：好似你戴眼鏡睇近野同遠野，純粹係個件物件大細唔同左，但色彩嘅表現其實係一樣嘅咁樣。呢個效果就令W2-131係樂器重播上更加清晰同立體。
推力加大並非音壓上增強，而係聽感上有更加多聲音方面嘅變化，例如下潛嘅幅度，聲尾嘅收放，會更加有個種自然從容嘅效果。好似聽返Daft Punk ft. Weeknd嘅Starboy，原先W2係重bass嘅位置會有種拖一拖嘅感覺，係W2-131上，呢個部份係改善左嘅，個bass轟落去同收返來個一下會更加分明，鐘意聽電音嘅朋友相信會有幾大感覺。
總結
先講W2-131嘅聲音升級感，個人其實覺得就算對比嘅係W2，兩者其實都有差距，131會更加適合現今高清世代嘅愛好者，鐘意更有Hi-Fi感，更高還原效果數毛毛嘅朋友，而家反而係W2更似係一隻行濃郁感嘅老鼠尾。加上聲音平衡度高，聲音厚度拿捏得準確，W2-131比起W2，面對唔同音樂風格都可以有更加完滿嘅聽感。
兩者係音樂感同聲音流暢度方面，係市場上都真係無對手了，況且最強嘅地方，就係音質同功能性上都做得豐富，131仲要咁有誠意改良左咁多野，支持度我相信都會幾高咁囉。
至於我會唔會持有？呢樣野大可放心，我已經買定更多收納格去收藏呢堆產品，我都好期待未來老鼠尾嘅發展呀！
W2建議零售價: $2,388
W2-131建議零售價: $2,688
Sponsored by CarveLink