Panther Audio - DAWN

July 29, 2022 WEM Media

而家相對成熟嘅Head-Fi市場，新手要去選擇人生第一對Head-Fi耳機嘅難度已經大大降低，加上網上資源夠多，又有唔同嘅group可以問意見，相對當年，真係一個唔小心就會墮入陷阱嘅日子，真係好遙遠嘅事了。

而資訊流通嘅好處，就係令到市場有越來越多設計者嘗試加入呢個Head-Fi大家庭，為大家帶來更多優質、或者高性價比嘅耳機。

所以今日就要講到一隻，都叫新晉嘅本地品牌，因為係最近一次嘅AvShow佢地先算係正式係大眾面前亮相，產品亦都有唔錯嘅競爭力，所以show後都聽到唔小人講佢地 – 就係:

Panther Audio

今次要講嘅，係Panther Audio (下稱: PA) 一對準備推出市面嘅1單元耳機DAWN！個人就覺得幾得意，就係度推介下俾大家啦。

Panther Audio其實早係2018年成立，咁岩就係Head-Fi市場最熱烈嘅時候。係呢幾年時間，PA都一直去擴展佢地嘅產品強度同深度，先後推出左幾對唔同價位嘅入耳式耳機，好似行圈靜鐵嘅Amethyst 132、可以調音嘅DX4等等，主打功能性同優良品質，加上PA嘅訂制耳機的確比市面上普遍耳機品牌為平，所以亦都有為數唔小嘅朋友去嘗試，眼見佢地Facebook都有唔小成品相可以睇下。

來到今次主角DAWN，只係用左一粒全頻動鐵，極之簡單，亦都無需加上甚麼超多階嘅分頻電路；但見微就知著，所以我都有問下PA，究竟呢對耳機係設計上有咩特別之處。原來DAWN，由品牌開始生產耳機至今，一直都係處於開發嘅階段，係內部選用嘅單元型號同佢嘅擺位，都經過多次修改，到最後係AvShow前夕終於落實設計。

與同類型產品最大嘅一個分別，就係DAWN係導管方面作出左唔同嘅嘗試，由唔同導管粗幼，到佢嘅材質、密度，甚至係安裝方式，都歷經數個版本修改，並且配合聲學阻尼令聲音過渡更加平順。另外，PA亦特別將DAWN調較成比較易推嘅類型，16Ohm阻抗、116dB靈敏度，實際測試由手機到巨力M17都能夠應付，又唔會過推，所以係易相處嘅。話開兩頭，係呢一方面，係睇得出PA係想做好件事嘅。

DAWN嘅內部係比較空曠，不過亦都睇到佢嘅導管設計係點嘅玩法：係單元前半同導管嘅周圍，有一浸厚身凝膠包圍住，多餘嘅諧震就係由呢啲物料吸收，所以tunning上呢對耳機係行得全面啲嘅，亦都無阻高音壓下嘅輸出表現。

佩戴感舒適，因為外殼設計其實非常成熟，形狀貼合耳窩，而且因為單單元嘅關係，耳機非常輕身，戴上耳壓力不大。耳膠方面，唔同品牌嘅耳膠，尤其係管道長度嘅不同，都會令聲音有小小改變，實際使用上，能夠更貼近耳道嘅耳膠，耳機嘅中高音會相對多返啲同闊小小，同理，耳膠管道形狀亦會改變聲音，係DAWN身上呢個改變係明顯嘅，所以，有排玩，有排試。我就settle左係原裝跟俾我嘅耳膠度。

至於可唔可以做custom made，其實我個人覺得，若果你係afford到嘅，做CM佢嘅表現會更好，事關聲波傳遞更加直接，低音衰減更小，表現會更加全面。

咁換線差距大唔大呢？呢個，就留待你自行發掘了。

聽感分享

單動鐵一向俾人感覺低音會比較軟同無咩延伸，而事實上DAWN係呢方面係最俾到我「咦，唔似單動鐵喎」嘅感覺，原因係佢嘅低音係實在嘅，鐵聲唔明顯，做得返一個鼓點嘅震盪，而且聽到低音嘅延伸，雖然未至於好出色，但確係令到DAWN聽上去更加耐聽同豐富嘅。我試嘅第一首歌就已經係Prince嘅Purple Rain（係呀唔係Pink Floyd啦），複雜嘅段落有、結他音色嘅還原亦都需要，原本以為呢對耳機會腳軟，聽落又唔會有唔上唔落嘅感覺，而且人聲係有聚焦嘅效果，證明DAWN係結像力方面亦都不錯。

聲音走向均衡，所以去返Pop呢一類型嘅音樂，就係DAWN嘅專長，聽感上因為能量較集中係中高音，所以音場同空間效果係合格嘅，亦有適度嘅開揚感令聽歌唔會有種好埋身嘅感覺，情形就似係返酒吧聽live band嘅效果。

整體重播效果係清晰得來交待到細節位，音色偏冷但亦有不錯嘅質感表現，維持住一個中性無咩花巧野嘅調音，我就覺得以呢個音質其實入門朋友值得一試。

總結

所以PA性價比高嗎？係DAWN身上，我覺得係高嘅，事關以單動鐵耳機來講，就算係手機推動都有好完整嘅表現，無咩花巧設定，但聲音就好均衡，亦因為低音著實不錯，表現係全面得來亦都耐聽。

比起係一個入門產品，DAWN更令我覺得係PA調音實力嘅一個體現，加上睇返佢其他型號嘅介紹，其實佢地最注重嘅另一樣野，就係對耳機究竟係手機上推唔推到。所以想用手機做一個進入Head-Fi大門嘅朋友，DAWN係一個可以考慮嘅項目來架。