Fender - Mix Pro
Fender通用型耳機系列，由FXA、ADL，直到現在最新推出的Producer series，都用上不斷深化進步的圈鐵混合結構，透過多年與世界上眾多的音樂製作人與歌手合作既經驗，為用家帶來熟悉且濃厚的音色風格。咁多個系列入面，最為人津津樂道既，當然就係用上13.6mm全頻動圈結構加上6顆HDBA動鐵單元組成的Thirteen 6，充滿動感、深度、強大底韻既重播表現，更一時令圈鐵耳機大行其道。
聲色俱備的分層外殼
今次收到Fender的全新MIX及MIX Pro耳機，兩者結構都參考前旗艦 Thirteen 6的三文治式分層腔體設計，特點在於其分層結構為動鐵單元提供穩固且獨立的聲學室構造，將動圈既諧震影響減到最低，發揮HDBA動鐵既高音瞬發力與結像力能力。
分層式結構亦都好有時代感。Fender以3D打印技術製作既碳黑機殼上，保留材質的原始質感，外觀非常raw，中層的動圈獨立聲學室更有種好別緻既層次感；隨住用家既使用頻率同時間，外殼將會出現有如電結他「做舊」既變化，形成如Fender custom shop guitar既「類relic」感覺，彰顯個人風格。
MIX Pro呢個紅黑配搭好好J，燈光打落去中層仲會有發光效果！
發聲單元大幅進化
新一代Fender用左訂制10.2mm HDD（High Density Dynamic Driver）動圈，擁有Fender耳機的傳奇飽滿音色，大幅改進聲學結構令推動力門檻大大降低。新單元外殼同樣採用高密度鎂合金打造而成，換上更為輕薄，剛性更高的震膜，同時提高了磁鐵的磁通量，令震膜衝程同埋運動速度都相對加強。
另一技術重點，就係MIX與MIX Pro的單元使用啦。由結構圖中所見，其中一顆HDBA動鐵單元使用top-firing設計，震膜所形成既震動可直接經由頂部出音管輸出，設計上能夠減低外殼諧震，配合反應迅速的烯土磁鐵，造就出MIX與MIX Pro極為清晰既中高頻表現。
舒適度為先的隔音機身
Producer系列既機身形狀，由數以千計的耳形數據為基礎，加以改良，以3D打印技術製造，務求消除每一對成品之間既外形誤差。配合原裝特製耳機線，用家可以得到高達-22dB的隔音能力，且貼合耳形的佩戴，讓用家不論佩戴那種軟硬度的線材，都能夠得到舒適既貼耳感，令更換線材方面既選擇更加多。
跟機超柔軟線材
4芯全黑色銅鍍銀線，非常柔軟，收納方便，分線器部份仲有Fender logo加持，成件事好一致。不得不提今代插針位置插拔更加穩固，無上一代過度緊湊既感覺，換線更加順暢！
音質部份
Mix Pro仍然擁有Fender的傳奇底韻，但就加入左好多現代耳機的調音元素。比起寬度， Mix Pro既音場前後上下既深度強左好多，亦因為咁，聽Mix Pro亦鮮有好強既「面貼面」壓逼感，對比上代易相處左好多。
來到新一代Producer系列，對我而言驚喜甚大既一點，就係廠方真係有收到各位用家既意見，Mix Pro無論係延伸定細緻位，都聽得出廠方落足功夫調整，有返一對中高階機既應有水準；確保中高音清晰度之餘，棱角分明，又唔會有刺耳感，達到一個剛剛好的位置，調音手法明顯進步。
聽Slash同Myles Kenndy live “Anatasia”既前奏同中段solo，兩支結他音色清脆俐落，力度大小控制得宜，而且動圈輔助之下結他既音色轉換、撥彈手法上既質感變化都盡收耳內。結他愛好者，僅慎試聽，因為都幾毒。
Fender上一代ADL系列，有好強烈既「大開大合」風格，爽快直白既個性對曲風既寬容度較弱。Mix Pro既性格相近，偏向直白、好動活潑的類型，但係細節同音色既還原上就有明顯進步。低音所帶動既節奏感同動感仍然強勁，但眉宇之間會發覺，控制力明顯改善，更加從容；低頻既收與放之間容納到更多變化，而且對於歌曲既低音訊號強弱非常敏感，低音凝聚得來亦都有甘願退居為襯托既時候，低音還原更加準確分明。
廠方係分析力與質感、厚度方面拿捏準確，無過度地將質感銳利化來谷個分析力，又或者過份濃郁而失去細節：三頻比例稍偏中低音，不過兩端音域夠闊，人聲亦無明顯突出，音場唔算埋身，空間感亦足夠表現唔同既樂器，而唔會感到非常擠逼。
Mix Pro的樂與怒
Fender耳機來來去去，都逃唔出一個「煲」字。佢既HDD動圈體積較大，仲係一粒全頻動圈，處理低音之餘亦要幫助動鐵之間既銜接，同埋修飾中高音，作用極大，對於耳機既音質表現至關重要。係寫呢篇聽感之前，手上既Mix Pro已經煲左大約100小時，音質表現已經比初入手時大大進步，比較寬鬆，整體線條亦都更加清晰。所以入手後，你要做既第一件事，就係插入個播放器，狠狠咁煲佢！
另外，Mix Pro性格非常敏感，對於前端線材既特性反應明顯，要發揮得更好，可以先更換Mix Pro的原裝線；相對而言，手上有唔同線材既朋友，會發覺Mix Pro配搭組合千變萬化，音色轉變明顯，可玩性非常高。
所以代理係推出Producer系列既時候，亦好周到地同時提供首批預訂推坑優惠：
預訂Producer系列用家，可以免費換領ORB Clear Force Light升級線 或
以優惠價$1500換購Clear Force Ultimate CL
以優惠價$2000換購Brise Audio NAOBI-LE
呢個套裝優惠相信吸引到唔少人出手，包括我。就算係唔加錢之下都有一條日本製銅線，點忍到手先，代理你壞呀你。
配搭分享
Hidizs AP80 Pro + DH80 + ERUA Audio MIRO (4.4)
DH80與MIRO的音色都係爽快型既代表，high gain之下聲音線條會比較硬朗，低音收放會更快，下潛明顯，punch既力度相若但係變化會更加多。低音量感減小加上中高音細節增多，呢個組合會比原裝更加均衡，係質素型既聲音改進。
iBasso DX300 + PLUSSOUND Tri-Hybrid
Tri-Hybrid會將高頻修得更加靚同順暢，配合埋DX300既中高頻處理，會係自然度同分析力之間攞到個平衡。High Gain之下音色會更加飽滿，包圍感更強，Fender味濃郁得多。另外Low Gain既速度感稍減，中頻既延伸會多返啲，聽acoustic類既樂器會較適合。
Cayin N8 SSB + Brise Audio Yatono Ultimate
N8 SSB與Yatono都係聲音厚潤偏暖，分析力亦非主軸，但兩者既音色變化與及自然度卻係Headfi產品中既佼佼者。呢個組合下聲音既細微變化非常多，層次豐富，稍稍修滑左聲音既邊緣，整體聽感恰巧可以同Mix Pro互補，而且仲係背景最黑既一個組合。
EarMen TR-Amp + PLUSSOUND Tri-Hybrid
本身TR-Amp聲底都偏向中性，所以係三頻走向方面變化不大，但就令Mix Pro既聲音質素大大提高。低頻反應迅速，力度加強，音場深度同立體度增加，音場亦都比較寬闊。比起DX300既組合線條感更加凌厲，中高較突出和刺激。
技術規格
單元：
10.2 mm 動圈單元 + 低音動鐵單元 x 2 + 中音動鐵單元 x 2 + 高音動鐵單元 x1
頻率響應：
18Hz - 24kHz
靈敏度：
110dB/mW
阻抗：
34 Ohms
總結
用左唔同巴組合來嘗試Mix Pro，只可以講佢既實力真係深不見底。唔單止係對前端比較敏感既特性，同時亦因為隨住使用時間拉長，經驗值越來越多既時候，能力只會越來越強：單單係煲左100小時之後既聲音變化，已經令我非常期待Mix Pro既後續表現。推動力要求上亦比上代輕鬆，試過手機接駁手指輸出，三頻表現完整，亦唔會有高低音頻寬變窄既表現。單單係呢方面已足以見到Fender對呢對耳機既重視程度。加上而家代理推出既預訂優惠，連最應該關心既換線問題都解決左，入手阻力相對更低。
建議零售價：HKD 8,800
Sponsored by Soundwave Audio