單端4.4 - HUM MA-1S
呢一年間都可能會有網友留意到我有時會影到一部「藍色MA-1B」，大家仲好踴躍咁問小弟呢隻新色幾時先有。不過，呢部機其實唔係換咗個顏色咁簡單，而係一部全新概念既新機。如果大家熟HUM，都知佢地一向出產品都我行我素，唔跟規矩，而今次一樣去到盡—— 就係棄用3.5 / 2.5，而用一個4.4mm 插頭統一「平衡」同「單端」大業。
咁第一個問題先：呢部係咩機？同綠色的MA-1B有咩分別？
其實呢部藍色機係叫「MA-1S」，MA-1係型號，「S」係指single-end 單端系統，相對地MA-1B 的「B」係指 Balance 平衡系統。不過，呢部唔係傳統大家見慣既3.5mm 單端，而係用4.4mm 插座做的單端系統。
點解4.4mm 插頭會整到單端㗎？
其實同咩插頭無關㗎，只係接法問題，咩插頭只要夠3個極都可以做單端，夠4個極就可以做平衡，4.4mm有5個極自然做單端做平衡都無問題啦。HUM的做法大家可以參考下以下張圖：
小弟就有幸係呢一年間，見證着呢部AMP的誕生過程 (雖然我都成日見證不同產品的誕生，但係得HUM先要咁耐，有時真係皇帝唔急太監急)，同大家一樣都對呢部機產生過好多唔同的問題，所以想藉呢個機會好好咁整理，同大家分享下成個產品開發的idea同HUM的品牌理念。
咪住，聽緊平衡咪幾好，做咩無啦啦開倒車，用番單端，又要用4.4mm插頭咁奇特呢。呢個當初我聽到都R晒頭，但經HUM方面詳細講解後就明白咁樣做唔單止唔係多餘，而且係必需（至少對HUM既末來產品藍圖黎講）。
呢件事就要由點解要分「單端」同「平衡」開始說起。
單端亦即大家熟識的傳統分開左右聲道，再加接地回路傳送訊號。咁平衡又係咩一回事？因為係長距離傳送訊號時，訊號會隨距離衰減，如果距離太長，能量就會衰減到未必足夠系統使用。
所以人們就發明一種新方法克服長距離傳送的問題 -「平衡傳送」：將左右聲道(L+ R+)各自複製並反轉成負訊號(L- R-)，然後四極傳送(L+ R+ L- R-)；到咗終點，就將負訊號(L- R-)反轉多次，變返正訊號(L+ R+)，呢個時時候連同原本的L+ R+加埋一齊，就有(L+ R+) x 2，亦即點解話平衡訊號power大一倍。
咁樣做係物理上主要有三個好處。
訊號的能量就會大咗一倍 - 因為有兩個一樣的訊號合埋咗一齊，能量就係原本的兩倍，咁就減低咗長距離傳輸唔夠力的問題。
減少干擾雜訊 - 其實訊號係傳送過程中會受到不同大氣電波的干擾，而係平衡訊號合二為一的時候，正負兩極訊號中的雜訊就會互相抵銷，得好乾淨的訊號啦！
左右聲道分離度高 - 因為左右道各自獨立傳送，沒有經共地回路，所以左右聲道分離度會加強。
呢個原本只係打算解決技術問題的方案，慢慢變成大家追求好聲音的手段。在隨身市場中，由AK的2.5mm 到Sony 的4.4mm 標準，市場的重心慢慢轉向以平衡系統。
你可能會諗：係囉係囉，平衡咁鬼正，咁多人用，做咩無啦啦走番去搞單端？係HUM慢慢分析平衡的利弊後，我就慢慢咁了解成個產品的設計邏輯。我地當中傾過好多野，係呢到摘錄咗最重要的部分出來同大家說明。
HUM認為係隨身聽層面(DAP/DAC/AMP)，使用平衡係弊多於利。
無必要以平衡增大power
首先關於平衡power增大既優勢 - 係隨身聽系統裏面並無長距離傳送而導致訊號衰減問題。基本上power要幾大就做幾大，無需借助平衡增加，再者HUM 認為power大小同音質沒有必然關係。大家諗下手上最好聲既機係咪就係最大power果部先？
平衡後分離度是否過高？
再黎係左右聲道分離度高既「優勢」 - 原來耳機對比喇叭有超高左右分離度其實一直都引起好多爭議。耳機係左右聲道獨立傳送到耳內，而喇叭則左右耳都接收到左右喇叭既聲，所以耳機比起喇叭，唔使用平衡已經有好強既左右分離度。
而為左處理呢個(耳機)音場過闊既問題，仲曾經出現過crosstalk技術去混合返左右聲道，模擬返聽喇叭嘅效果。當然，並唔係話係隨身系統上要刻意做低個分離度，而係只要設計合理就好了。
(究竟耳機定喇叭嘅分離度先係「正常」中涉及好多因素，長到可以開一個主題探討了。例如製作團隊用耳機定係喇叭做監聽呢？)
體積和耗電犧牲了音質
體積和耗電對音質的影響 - 平衡需要比單端多一倍既線路同零件，底版體積增加一倍之餘耗電亦大增。試諗下如果做部旗艦DAP/DAC，”DAC + I/V轉換 + LPF + 放大”本身體積+耗電已經好嚇人，做埋平衡仲要用多一倍空間和用電，已經不是磚頭化就可以解決到既事。當磚頭化都唔能夠滿足續航力時，就迫住斬頭斬尾，變左妥協下既產物。當初為左音質去做平衡，但最後反而比平衡限制左音質。
訊號出現變化
最後係不論隨身定家用系統都遇到既問題，就係平衡後訊號起變化既問題 - copy出黎既訊號係複製，轉換，傳送，放大的過程都會有唔同程度既變化，同原始訊號對照已經唔再係完美的鏡像，而將兩個唔同的訊號合番埋一齊，就會偏離左原始訊號了。打個比喻，好似你墊張紙係幅圖上面照畫，就算張圖再簡單，都無可能畫到一模一樣，然後再要將你畫既圖同原圖結合成一張，無錯張圖係深色左，但仲係咪你想要既原圖呢？或者再出貓，出動影印機代替你手畫，結果係咪就夠一致呢？
Q&A
Q1. 咁4.4mm 單端係咪啫係我又要買條新耳機線？
A: 唔使，突登整到通用方便大家㗎，照插啦。
不過大家留意番，最好唔好見係 4.4插頭就用呢部機去接駁平衡的LO，因為部amp 唔係咁用㗎，有可能會損害到你部DAP/DAC 或者部AMP，大家要乖乖地用番單端就一定冇死，真係好鐘意平衡嘅買番MA-1B就冇問題啦！
Q2. 咁到底MA-1S同MA-1B邊部好聲啲？
A: 受好多因素影響，其中最大的因素係每部DAP的單端同平衡輸出的質素都好唔同。有啲DAP個單端會好啲，有啲就平衡好啲，咁會令兩部AMP係唔同DAP表現上都唔同，唔會話有一部會一定好過另一部，所以大家耳聽為實啦。
Q3. 點解見到連HUM條對錄線(3.5->4.4)都有兩款，一款係3.5果邊寫GND，另一款係4.4mm果邊寫GND既?
A: HUM做單端屏蔽對錄線既做法係單邊接地，即係3.5或4.4其中一邊落地。經測試唔同DAP配唔同接地線有唔同效果，有d好大分別，有d無咩分別，建議購買時可以實際對比。