Shanling M6 Ultra
山靈嘅新野總有驚喜！離上一代M6 Pro 2021年版過左一年左右，山靈再次同中階型號來個更新，整左部全新播放器M6 Ultra，有放到旗艦機嘅電路設計，亦有硬件更新，換湯又換藥之下成部機都好有上進心，又係會忍唔住要課金嘅機來。
不知不覺，玩左佢幾日，又俾到啲唔同嘅感覺我，同大家係度分享一下先！
物料升級，內部大不同
先講一講佢硬件嘅玩法，亦係新機落地非常亮眼嘅地方，就係用左4粒AK4493SEQ搭左一套QUAD-DAC並聯架構，透過一組OPA1612 加法器（Adder）來令4粒DAC各負責左、右聲道嘅正負極。可能你會即刻諗到M3x都係QUAD-DAC，但當然設計目的同實際效果都爭天共地。可以話M6 Ultra嘅玩法就係「人多好辦事」，追求極致，雖然相對來講，成個架構用電量較高，但就可以透過呢個方式減小訊號處理嘅相互干擾，仲可以實現更加緊湊嘅全平衡輸出電路。
由M6 Ultra部份表現來睇，我會覺得係呢個架構嘅優勢來：背景好黑，聲畫俐落，定位穩定，一個好出眾嘅聲音質素。
而數碼訊號處理嘅構成，亦都包含左山靈高階機種嘅第三代FPGA技術及45Mhz/49Mhz兩粒有源晶振，強化各個組件嘅時鐘訊號一致性。因為QUAD-DAC嘅存在，對比過去咁多部機，呢個技術更顯得重要，最主要就係確保四粒DAC保持同步，亦俾到一個更加精準嘅訊號去俾DAC解碼。周邊電路亦都有加強，有兩粒OPA2211做低通，BUF634A加大輸出電流，再加埋每粒DAC旁邊各一組獨立電容，確保供電穩定；最後再加上LTA8092運算放大器，至此就組成左山靈最有名嘅OP+BUF全平衡線路。
推動功率方面，M6 Ultra有高、中、低三種增益切換，最大可以去到720mW@32Ohm，推自家對MG800好，定還是普遍嘅圈鐵混合，化學反應都非常良好，尤其係聲音動態上，強橫得來，細節都keep到。
若果對M6 Ultra線路圖有興趣的話，其實部機張原始wallpaper就可以略看一二。
unibody設計與Android系統，feel得到的順滑
M6 Ultra行返新一代unibody設計，成個機身都係由一塊過鋁合金CNC而成，所以你揸機上手嘅時候會feel到部機好結實，手感好實在。外觀設計方面，用左近期比較熱門嘅錄色（千山翠）同黑色（靈眸黑），機身形狀繼承至同廠M8，就唔係M7或M9咁有波浪設計，外型相對地比較規整。機側做左個孤位，再由CNC係手指擺放嘅位置做左內凹面切割，加強返握持嘅穩定度。機身做左磨砂，光影反射睇上來滑一滑，亦係個人覺得山靈最突顯到身價嘅地方。
值得一提嘅係，機身背面，機頂同機底都係額外用左一片強化玻璃鑲住，除左令外觀有更多變化，亦係山靈一個貼心嘅地方來：插耳機線時最怕插唔正，對左落個機身度搞到花左，而M6 Ultra係呢個位就用上強化玻璃，用家就唔洗驚整花機身影響觀感啦。
另外，M6 Ultra用左M7同M9嘅懸淨浮屏設計，亦係一個觀感上一個大進步，同埋配MON貼方面都輕鬆啲。
個種順，唔止係外殼設計上體驗得到，系統上都得架。CPU用左比較快嘅snapdragon 665，配埋山靈自己寫底層數據嘅Android 10系統，界面開App使用上都非常流暢，係呢個咁急速嘅社會來講絕對係加分位。至於追求最好音質嘅用家來講，M6 Ultra亦提供左純音模式比大家，關閉曬大部份額外功能，換來更突出嘅音效表現。
最後，作為現役最先進嘅播放器之一，M6 Ultra解碼支援度，最高可以去埋16x MQA呢。Tidal用家又可以盡情享受啦。
以質來講，聲音同價位頂曬班
唔係講笑，M6 Ultra嘅實際表現，係令人眼前一亮，一部中階機俾到呢個質素你，係物超所值。
咁究竟係點嘅一回事呢？首先講一講推力先面，手上有一兩對耳機，係正常情況下都要用高增益先做得到一個明顯嘅起伏感同力度，而係M6 Ultra上，竟然只需要用中增益。音量較到30，就可以有正常嘅音壓，健康嘅三頻表現，節奏動感有力，再加上明顯有一浸超低到中低音嘅托底，營造左個好完整嘅場面俾你。
低頻有強弱，有打擊感，量夠可以托到場面，擊鼓後嘅聲尾收放自如，有潮水拍岸回流嘅感覺，但又唔會影響到音樂嘅節奏，呢一點完全係高階機必備原素之一。樂器定位，準到一個點，更因為線條銳度足夠，動態夠大，個音場嘅立體感會令你有個感覺，就係你可以指得出件野係由邊個方位發聲，擺位距離係點。呢一點，聽下久石讓，感受最大。
中高音嘅延伸有質素，俾到個種自然感你，唔需要用力就能夠聽到個堆細節、起伏，好順暢，有山靈個種工整嘅風格，同埋好令人滿足，當然仲包括埋良好嘅分離度。音場畫面撐得幾開下，但聲音成像都係銳利嘅，包圍感就足夠啦，都呈到個靚仔嘅橢圓形嘅。
質感方面，厚度適中，但整體感覺就比較似想係素質同聽感上攞返個平衡，唔會話過份濃味，算係清新輕巧型，呢種聽感亦比較易夾唔同曲風，都係一個多面向嘅調音來。
配搭耳機方面，竟然又俾我撞到兩樣野同時係手，實際聽後我覺得係一個互補不足嘅組合，而家先行劇透，好快就會有佢嘅分享文出來架啦，呢對耳機就係Lime Ears嘅最新旗艦Anima：一部音樂基礎表現極強嘅播放器，遇上以遠場監聽做開發基礎嘅耳機，會擦出啲咩野嘅火花？敬請期待！
總結
山靈實力係強嘅，你點會諗到一部中階機可以上到呢個音質水平？雖然M6 Ultra推出日期稍稍較後，但論能力佢係好突出。若果你係睇緊幾時升級播放器，咁呢個時間點就非常之好，因為市面上已經有一批岩岩新出同時賣點不同嘅機可以試到，再加埋M6 Ultra加入戰場，可以慢慢聽慢慢揀。
M6 Ultra係呢批機入面，應該係綜合能力比較出色嘅機來，易配搭，最重要係成部機由內到外，再去返內，都俾到紮實嘅感覺你，完成度非常之高。講到最尾，強烈建議大家去試一試，攞上手玩下。
M6 Ultra規格：
尺寸 – 127 x 77 x 18 mm
重量 – 263g
顯示屏幕 – 5-Inch 1920 * 1080
作業系統 – Open Android 10
CPU – Qualcomm Snapdragon 665
記憶體容量 – Ram 4GB, ROM 64GB
解碼支援 – 32/768 & DSD512 & MQA 16X
藍牙規格 – Bluetooth 5.0, 發射編碼支援：LDAC, aptX HD, aptX, SBC // 接收編碼支援：LDAC, SBC
Wi-Fi – 2.4G/5G, 支援DLNA, Airplay
DAC – 4x AKM AK4493SEQ
模擬線路結構 – OPA1612 + OPA2211 + LTA8092 + BUF634A
輸出功率 – Single-ended 240 mW@32Ohm // 720mW@32Ohm Balanced
輸出插口 – 3.5mm 單端 及 4.4mm 平衡
輸出阻抗（3.5mm/4.4mm） - <1 Ohm
電池 – 5650 mAh, 支援 18W QC3.0
使用時間 – 單端輸出最長13.5小時，平衡輸出最長9小時
建議零售價：$6,980
Sponsored by DIGIBRAVE