Acoustune HS2000MX
Acoustune作為日本動圈耳機界玩金屬玩得最出神入化既品牌，短短幾年間憑藉住過人既金工工藝，將動圈單元既表現節節拉升：直到今時今日，儲起左一班對Acoustune情有獨鐘既朋友，亦帶來左一個好大既命題 – 究竟，呢間廠仲可以玩得幾大呢？
當我以為我對CIEM 1695已經係一個終點，原來，Acoustune仲有後著。由8月AvShow見過一面，等到而家，終於！以日本傳統樂器命名既全新旗艦耳機HS2000MX「笙」，就展現於人前啦。
作為日本工藝同精神既體現，一定要先講講個包裝：你睇下，係木盒來。
過去既原裝金屬盒都會俾人一種穩定、精細既感覺，同Acoustune既金屬主題亦都非常合襯。不過來到旗艦級別，反而一打開個包裝見到呢個柏木盒，我個人係感到廠方既特別用心：唔知大家有無係日本買過清酒杯，佢地既包裝其實都係呢種樸實既木盒來，可能內容物並唔係好貴，但開箱既過程就會俾到你「WOW，好精緻呀」既觀感。簡單啲講，好似開精品咁，同Acoustune既日本風格亦更加一致，相信好多人會buy呢個效果。
開左蓋，打開和紙包覆，就會見到內容物：耳機本體、便攜盒、兩盒耳膠、同埋原裝線材，剛剛好分成四個方位，整齊企理。
內附既三款耳膠大有來頭。為首既AEX50係Acoustune全新設計既新型耳膠，用左一種叫SMP既記憶聚合物製成既ifit材質。特性係當耳膠塞入耳道後，耳膠仍然能夠保持相同形狀，配合埋獨特既雙翼設計同流線形機身，你就可以唔洗塞咁入都隔到音，達到更舒適既佩戴感同密閉效果。
另一款跟機耳膠AEX07，就係廠方使用「ST1000」計劃所得到既耳型數據，以AET07為基礎改良而成：我自己既佩戴感就係，更加深入，壓逼感小左。
最後就係用上TPE材質既AZLA XELASTEC耳膠，會隨人體溫度而軟化，材質帶小小黏性，戴上耳穩固得來，隔音都唔錯。
至於要用邊隻，就好睇你自己既聽歌風格啦。
耳機線方面，過去Acoustune每出一對新耳機，都會配條新線既，來到HS2000MX當然都唔會例外啦。呢條叫ARS100既4絞升級線，採用16芯鍍銀OFC混編純OFC線，金工件都用返Pentaconn既出品，同時鍍上同耳機一樣既靛藍色，感覺更加一致，亦感覺到荷包有啲危險：因為都真係太靚仔了。實際聽感同1695ti原裝線比較下，偏向分析力、力量型既組合，會稍稍降低中頻既綿密度，不過就加強兩端延伸。作為耳機既起步點都唔錯既。
聲學結構方面，HS2000MX係系列入面結構改動得最多既耳機。事關耳機加入左Acoustune Capsule Technology（A.C.T.）既可換式腔體設計，用家可以透過解開外框上既縲絲來更換唔同既單元模組，理論上可以帶來更多變化同玩法，不過就要睇下佢跟住落來會有幾多既單元模組推出啦
雖然係可以換，不過HS2000MX跟機呢粒模組都唔係平凡野來。採用新一代Myrinx鍍單元，震膜球頂位置加入日本製鍍金屬加強整體剛性，以Myrinx醫用高分子生物震膜製成震膜邊緣，提供更好既運動彈性，兩者協力形成自然透徹既音色。固定動圈既腔體外殼就用上名為「杜拉鋁」製作既合金腔體，係製作飛機框架同汽車外殼既重要物料之一：材質密度高，硬度高，作為導聲管輸出訊號同降低單元諧震之用。
個人感覺呢個配置既表現已經非常出色，我就更期待佢來緊出啲咩模組啦！
聲音特性
HS2000MX既聲音個性比較特別，就算擺係同樣使用鈹動圈結構既同輩旁邊，佢都有一啲位係做得特別好。
首先第一步，佢既表現係無咩位置可以挑剔既。音質夠全面，音色亦唔會有明顯既偏側，會明顯聽得出HS2000MX對於唔同音域既樂器還原都好得體既，例如圓號呢一類銅管樂器，佢可以俾得返個種沉穩、聲音厚度，聲音唔會好似扯高左咁，所以聽交響樂來講，HS2000MX比前代既耳機都更加適合；而且，其他曲風一樣好聽。
結像非常實在，主要係體現係佢邊緣位置既成像方面，佢會有一種特別既圈邊效果，唔係硬度上令佢既結像表現得清楚，而係好似有陣銀光將聲音圈起來，聽感上就表現出瞬間既結像、聲音形態非常強非常明顯，並且呢種光亮表現出慢慢向外擴散既效果；因為呢種質感會隨住聲音既大小而變濃或淡，所以當首歌去到聲音密集既段落時，你仍然可以輕鬆pickup任何一段既樂器形態，並且帶有明顯既場前場後距離，唔會混和，亦有恰當既分離度。
細節表現有強弱深淺，那怕係演唱會入面入左mic既觀眾交談，或者鼓手輕放鼓棍既微弱迴響，HS2000MX都會俾埋你聽；不過呢種細節既出現有時會顯得突兀，因為表現得太清楚，會搶走主軸，影響音樂既流暢度。幸運既係，原裝耳膠可以減小呢種情況出現。
對於主角同背景音樂既展現方式，HS2000MX既轉換係非常靈敏既：例如Tony Bennett & Lady GAGA既新碟Love For Sale，當中有好多背景樂器同人聲同時響起協奏既地方。大部份耳機係呢個album入面都可以重播出良好既效果，但HS2000MX就能夠額外提供更加明顯既人聲穩定性、密度同中低到中高音既順暢過渡。因為背景既樂隊演奏，容易令中頻失衡，令人聲顯得朦朧、走樣；然而係HS2000MX上並無呢種情況，當人聲響起時會令你立即投入到歌者之上，並且維持住佢主角既位置。
對比前幾代既Myrinx單元，呢款新單元無疑改變左前代個種清新活潑，堅持中性既態度。今代明顯更注重音色表達同變化既效果，簡單講句就係「更加HIFI」，動聽，泛用度更高。
HS2000MX對於更換線材所帶來既提升亦都非常明顯。實際測試直接換上一條Brise Audio Yatono Ultimate來提一提神，你就會發覺原裝線係限制左中高部份既表現。一來Yatono補完左HS2000MX中高頻過渡區間既能量感，樂器同音場表現得更加順暢；二來結像力仍然高企，但起伏會更加明顯同有動感，帶起更強既節奏同動態，呢樣係原裝線比較缺乏既地方，實在係太平淡了。最後，就係低音質素既提升，彈性更好，線條梳理得更緊密，帶點肉感同延伸，不至於太過平面。
咁播放器方面既選擇又係點呢？測試左幾部播放器，各種類型都有：但走向偏暖，音色比較寬鬆既播放器效果最好，互補不足，加強音樂感。雖然過去Acoustune耳機都係易處理既，不過係HS2000MX上就最好有一部單獨既播放器去配合，老鼠尾既表現可能有疲軟既感覺。
總結
HS2000MX整體聽感都維持住一絲Acoustune既個人風格，但就顯著增強監賞音樂所需要既起伏、動態同質感表現，而且音質基礎穩定。對線材前端頗敏感，加上可換模組結構，以整體角度評斷，佢係一對平均分十分高既耳機。
之但係，我更欣賞呢個產品背後所帶來既心思同意念。當你真係用心去完一年事、一件產品，最後收到呢件野既用家係會感受到既；觀乎包裝既整潔齊備，耳機設計，到聲音上既追求同對自身house sound既突破，我覺得係值得長期持有既，仲可以有排玩添。
HS2000MX 規格
單元：10 mm日本鈹薄膜圓頂 Myrinx Composite 動圈單元
頻率響應：10Hz – 30KHz
輸入靈敏度 (dB/mW)：110dB（@1KHz / 1mW）
阻抗：24Ω @1kHz
插座制式： Pentaconn Ear
配件： ARS100 系列耳機線、便攜盒、AEX07 耳膠、AEX50 耳膠、AET02 記憶耳棉和AZLA SednaEarfit XELASTEC耳膠
建議零售價：$13, 800
Sponsored by Soundwave Audio