Metal Magic Research (MMR) - Balmung
MMR既產品主題，同呢對耳機真係好match。
講緊既就係MMR新推出既旗艦耳機Balmung。定價，以而家既標準來講係正常，但Balmung就比起其他同級耳機，走左一條好非常規既道路。呢對耳機既整個package，充滿住實驗性、特立獨行，好有character。
GAE BOLG、HOMUNCULUS、THUMMIM，每一對MMR既耳機都代表住另一次衝擊市場眼球既機會，而係我心目中，呢種咁有style既品牌，出既野都一定有返咁上下能耐：因為佢既起步已經夠曬「任性」。
任性in a good way，就能夠成為突破。雖則只係使用傳統既動鐵單元配置，但係聲學結構上，就玩得新穎！更有住品牌超級出名既強大金工外觀，實行玩盡外與內～
今次Balmung用上12單元動鐵設計，4粒高音、4粒中高音、2粒開孔中音單元、同埋2粒開孔低音單元。所謂開孔單元，其實就來自於呢種單元特別既外殼設計：係單元既背後開出一個經計算既小型氣孔，為原本屬於密封狀態既單元，額外擁有一個回氣口，當單元工作時就可以即時提取更多空氣，實現更深、更厚、同更加靈敏既音質表現。雖然分析力會相對減弱，但就會好似加左Bass Boost咁顯住增強低音量同摧動空氣既能力，只要implement得好，就可以做到更有逼力既低音。
而係中音都用上開孔單元，就可以加強中音既延伸感，質感表現會更為厚潤，原理同低音開孔單元一樣
為左有效整合12粒單元既潛力，廠方用左相當既時間設計Balmung既內部聲學室，用來解決多單元設計帶來既相位問題。Balmung specific Acoustics Chamber (BMAC) 專用聲學室，以3D打印技術設計生產，透過調整材質密度、導管長度同角度、出音口、管道內徑，精確控制每粒單元既輸出；同時又用上Balmung 4-Way EFD 4路分音電路，將低音、中音、中高音同超高音頻段準確分配到唔同單元，令Balmung擁有順暢連貫既頻段過渡，亦解決左相位抵消既問題。更重要既就係，成對耳機既體積有效縮小。
講到體積，就點都要講下Balmung既外觀。耳機既外殼設計靈感源自於一把北歐神話中既傳奇武器「Balmung」，而實際既外觀設定，就綜合埋.hack 入面 Lord Balmung既形象設定來做既！
面板上分成兩層：頂層銀色鋁合金以CNC工法切出天使翼，複雜程度、精細度，就算以CNC來講都完全係挑戰工藝極限，不過成品既cutting係非常細緻同工整既。第二層既藍色面板同樣以CNC工法製成，不過就額外再加上電鍍工藝賦予顏色，再慢慢打磨出中間神劍既光澤紋理。最後兩者經過多雒拋光，鑲嵌整齊，成為Balmung既面板。若果以加工廠角度來講，工藝繁複，而且有多個步驟需要以人手處理，呢種面板做法真係非常「任性」…
至於佩戴感，因為經過多重打磨，實際上外殼係非常細緻，亦無明顯菱角，所以一戴上耳其實係好舒服既。不過試左幾對耳膠之後，都係發覺自己會用比平時細一個碼既耳膠，可以戴得再深啲；佩戴深淺對聲音都有影響，若果以同一型號唔同size耳膠比較既話，會發覺中低音既改變會比較明顯。睇返Balmung既導管設計，其實出音管已經有返咁上下長度，若果再用一粒大啲既耳膠，頂到對耳機離耳既話，聲音一定會有唔同。所以，roll下耳膠啦～
跟機亦跟上由Eletech設計生產既UP-OCC銅鍍銀線（香港行貨會2 Pin是4.4mm插頭）同一個皮製耳機包，用上特別設計既MMR金工件，成個設計語言更加一致。至於呢個組合配出來既音質呢？就要睇埋下面啦。
聽感
第一耳既Balmung，老實講，太過厚實，好壓抑，有一種好強烈既滯後感，好似有個無做time alignment既subwoofer好狠咁撞擊其他頻段。個一下係呆到一個點，我以為Balmung會係Gaebolg既升級版。好彩，作為一個聽左好多奇怪耳機既人來講，我隱約聽到呢對耳機既Bass，有一種好唔動鐵既低音下潛同力度，而且係一個好低既位置仲有一小浸撩下撩下既超低頻，只不過muddy左，所以聲音唔平均。
好，我煲你！
我記得係第三日既清晨（大約50個鐘），電腦岩岩好loop到鼓動心弦既第一首 - 赤壁戰鼓，當下再入返耳既時候，無左一開始既朦朧感，寬鬆左，終於唔係好似排山倒海咁將D野撞埋來。我諗最大既影響，係來自分頻電路同條原裝線，兩者都需要咁上下時間進入狀態。至於之後50小時後有無改變，就留待各位用家自行發掘了。
Balmung既重播效果好集中係顏色上既表現，但就唔似重染色既耳機咁樣係表現得saturated、或者好濃厚，過度推高光暗對比；以執相既slider來比喻，Balmung既顏色主要係透過推高Vibrance來加寬整體色域，呢個調整方式亦係呢對耳機最強既地方。
實際操作上，你會發現到耳機既中音、低音既著墨比較多：首先，低音有好明顯滲左一浸落去中頻度，令聲音包圍感更加強，亦有更多空間容納到動鐵小有既超低音層，就係我上面所講既個浸撩下撩下既底。加上質感相對同級耳機更為深厚，對於低音大提琴一類，重質感同超低延伸既樂器，係染得非常可口既，陽剛味極重：對比其他相同走向既耳機，就好似The Rock Johnson，同jason statham既分別。
MMR亦刻意係中高頻頻段加上一啲spike，令低音既滲透唔會令中音表現得過份濃厚朦朧，係一個好要求調音經驗既做法，但效果上就令Balmung有一種圈鐵耳機既感覺，但又能夠有動鐵個種凌厲同速度感。
試得最開心既一首歌，係Stevie Ray Vanghan 既 ”Life without you”。近來聽返一眾我個時代既Jazz同Blues，你會發覺SRV既結他聲音係特別吸引。除左佢支signature係一支Strat之外，佢用既弦線線徑比正常粗（0.13，sustain更強）、Hight action（更多弦線共振空間）、佢本人既pick attack亦都非常aggresive（所以雖然係粗線但聲音既切入感一樣咁強），造就到佢既聲音有種好圓潤，好有張力感，同埋特別ear catching既音色。要表現呢種豐滿自然，之前我可能會更傾向選擇動圈耳機，一來SRV會玩曬成段fret board，極之要求音色、頻段上既連貫，亦因為佢結他既音色同headroom，都係動圈還原會有優勢。
不過Balmung既表現，為首歌帶來左一種好特別既變化。能量感既爆發會令你一震，而且你會慢慢推高音量，渴求更多：因為Vibrance拉得高，光位、力度位、attack等等都特別有衝勁，同時，因為低音既可動與可靜，低能量既interval段亦表現得好圓滑，好悠閒，變相整首歌既表現好容易就牽動到你既情緒。延伸衰減算快，但又能夠有空間俾呢段聲音延展開去，所以你唔會有一絲緊湊感（係開聲之後咋）。
Balmung既高音比較內儉，並未有靜電單元既精緻，不過密度仍然出色，所以重播鈸、saxophone等等金屬樂器，應有既body都係有既，唔會刺耳或者有壓逼感，無水花。功課交足，未算係主軸。言而，中高音既Spike重播電結他既時候，會特別有撩下撩下既感覺，個個位其實就係好多人鐘意聽電結他既上癮點：ASMR呀！
若果你係想搵一對technical表現優勝既耳機，可能就唔係Balmung既專場；但若果你搵既，係一對確保有足夠technical，但音樂感豐富而且有自已特性既耳機，咁Balmung就好中你了。而對於有多對耳機係手既朋友，再持有Balmung都唔會重疊。
後記
任性呢樣野，唔係話有就有，因為你都要有相應既技術力同資源，先可以做到。Balmung作為品牌既代表作，佢其實就代表左工藝上、聲音走各上既突破同革新，有時候，亦真係需要多一啲好似MMR既品牌，市場先會有唔同既品味同變化。
喜見MMR肯踏出呢一步，成年事出到來又係work既，個人覺得，除左係要過某啲心理關口之外，呢對野係好好玩，亦係一對極有潛力既耳機來。只要你有時間，又想搵到旗艦機，不如俾個機會自己，突破下自己某啲框框。
Balmung 詳細規格
單元：動鐵單元x12
靈敏度：105-108dB SPL/mW
頻率響應：18Hz - 48KHz
阻抗：13Ω
降噪：18dB
耳機線：Eletech特供 26AWG UP-OCC 4芯銅鍍銀線
建議零售價：$21,998
Sponsored by Thinking Group