Beat Audio Cyclone
Beat Audio（BA）既研發同產品一向新穎，線材無論用色上，到金工、材質同結構，都有著住一種屬於BA既特立獨行 – 有點實驗性，但廠方既實力就確保左呢種實驗既產物係有保證既，所以係新意同實際質素方面，佢地都表現得出色。
點樣先能夠達到呢種狀態？首先BA已經係一間非常成熟，而且擁有極豐富合作調音經驗既廠商，加上市場龐大，遠至日本、甚至日本市場既耳機，都有BA既蹤影，可以得到既經驗同市場反饋都更加多。而基於呢一堆意見所帶來既產品，認受性當然就高。
隨住耳機產品既風格同質素都越來越不同，BA都開始慢慢將過去唔同既熱門線材作出改良。而最新產品，係我手上既呢條Cyclone，就係來自前兩代既純銅線改良而成，但音質絕對係跳級之作！睇埋落去睇下有幾跳啦。
包裝既設計已經好睇得出BA既風格。一個不規則形狀，深綠色既外盒配上燙金logo，簡約得來亦有highlight，算係一個低調奢華既風格來。打開上蓋，會見到一張摺好左既硬卡，講述下品牌既背景資料；拎開埋張卡，就會見到Cyclone整齊地展現係你眼前。
外觀令人注目，深啡色線身配上內裡結構既不規則反射，有種強烈既立體感，加上鍍金接插件既配搭，好順眼，好高貴；尤其係當你知道，BA為左確保質素同控制工差，成組接插件都係由廠方自行設計同生產，就令你感覺到誠意。合理地運用成本既優勢係咩？就係成個使用體驗都好舒適，插件既尺寸真係做得剛剛好，插入耳機或者播放器既個種緊密感，又或者拎上手都唔會再怕跌左對耳機既感覺，係難得既。
除左接插件係自家設計，其實BA最為人熟知既，係佢全系列產品線都係用上自家配方既焊錫，令佢可以根據線芯既聲底同預想既方向來調配，得到更適合既表現，亦都令佢地既產品更有個性。
Cyclone既線材結構有三層：最外層既扁平純銅導體，中間層既純銅線芯，同最內層既銀合金中軸。三層結構互相合作，成為cyclone能量感充足既重點所在。
Cyclone有別於過去線材系列既做法：對比New Night，近拍之下既外層結構外觀已經有所不同。線材既外層純銅導體，以絲帶狀不等間距纏繞，特別在BA用左化學材料霧化沖洗既方式，將化學劑噴灑到導體上，令導體產生化學反應，係外層形成惰性導電物質。呢層隱形既外皮，就成為左尤如屏蔽物料效果既半導體。好處係唔需要經過拉線機熔接額外一層外皮，保持原生結構，亦都有效減少導體截面既不平均，降低對訊號傳導既任何不良影響。
颶風既中心點，當然就係最平靜既地方。BA係Cyclone線芯中軸，加上一條銀合金導體，佔總導體10%既芯數，主要輔助中高頻區域既傳輸，並且加入銀合金既微微染色，令低頻相對加強之下，仍然能夠擁有十足既中高延伸同細緻度。
Cyclone既線物質感，雖然未算係非常柔軟既一類，而且係8芯線設計，有份量既，但線身無好強既彈性，而且織工整齊，線與線之間鬆緊合適，無硬線時常出現既記憶回彈，所以都好容易收納既。加上耳掛做得夠貼耳，戴上耳機後重量係耳朵上分散得均勻，穩定而且舒適。
Cyclone熱身前後比較
解釋完Cyclone既設計，等我又講下一接手時佢既表現先。因為佢搭載住「BA對最佳純銅風格」既演繹，第一耳既時候，我既聽感都係偏向認為佢真係一條純銅線來：力量強，打得深，中高音有少少尖刺，尤其係舊時代既錄音還原上比較明顯，但中高量感亦不算好突出。反而係低音有力得來，收結得快，延伸充足，好豐滿同穩定既聽感，所以我一開始其實都已經頗收貨。係之後店員同我講返佢既設計係點，我就明白到呢條線仲有好大空間去發掘，即時入返一條，慢慢同佢相處下。呢個店員都真係幾邪惡既。
大約用左50小時左右，開始進入狀態。Cyclone骨子裹有部份既BA風格，擁有中高穿透力會加強既效果，同埋一個三頻均衡提升既反應。但呢條線更特別係，低音質感同力度同時加強，而且打擊既範圍深得來，向住場後同場邊擴散，明顯地刻劃出音場既邊緣位，配合上面所講既中高音處理，形成一個非常別致健康既偏圓形音場。
場左右比較寬，樂器收結有力迅速，分離度高，樂器之間有返咁上下距離，擺放得整齊，齊既程度係，你可以好容易pickup到聲音既方向，大聲與細聲對比度大，加上微細節出現得精緻、清晰，空間內既資訊都豐富。
而呢種豐富，影響音樂感。唔好誤會，呢個係一個好影響來，聲音有肉地、實在，節奏感流暢，而且無純銅線既怠惰感同渾厚既音色，音樂還原得爽朗，線條感強烈，光澤感有少少既修圓修潤，所以亦無壓逼感，完全就係一條興奮而且精神既線材來，加上BA對音色效果表現既準確度，聲音趣味性十足，好吸引你繼續去聽。
配搭玩法
Cyclone既線芯配搭好適合時下多單元耳機既配置。圈鐵耳機就特別適合，因為頻寬夠大，其實對動圈既表現都係有幫助既。
Cyclone + AAW x Custom Art 4+2 (NORM filter)
第一個組合係用左Cyclone去夾4+2，原因係呢對動圈發揮既程度高低，會直接影響到成個聽感既，所以呢啲比較棘手既位置，交俾Cyclone處理就最好了。
低音格局更加緊緻有力，質感既還原更加精準清晰，可以清楚聽到bass結他既彈力同attack，而且量感亦保持到，更加爽勁。中高音延伸加強，無原裝咁乾身，音場既寬度無話改變得太多，但因為延伸幅度大左，所以深度係有明顯進步，更有空間感。
Cyclone + 64 Audio DUO
DUO加上Cyclone係出色得來好有特色既組知。因為開放式既關係，就算低音有加強，力度更充足之下，都唔會有轟頭既效果，反而會令成個低音域表現得更完整：超低清晰，低音中段有彈跳感，中高過渡順暢而且能量俾得返，下潛既幅度更大且可聞，加上力度紮實，整個低音段提升都極大。而係中高音方面，聲音線條收得靚，加上每件樂器都有更豐富既延伸變化，原先已經表現得好好既結像，更加實在凝聚，樂器多樣的情況下都能交待清楚，係一個好適合既配搭來呀！
Cyclone + Unique Melody Mest HK Special+
MEST 加 Cyclone，竟然唔小心又解鎖左個最佳拍檔。MEST HK Special+ 原裝既調音屬於均衡寬鬆向，換上Cyclone 三頻收放緊緻左，成個低音層豐滿得來，亦有更加明顯既超低音出現，由中低至超低既垂直下潛非常有力且迅速，回彈亦都非常出色。因為中高音線條利左，結像力亦有相當提升，不過最主要都係成個音樂既質感更加適合，軟硬都更加適中！
總結
Cyclone既音質提升可以話係近期線材中比較標清既存在。因為比起味道上既提升，呢條線既素質進步會更加明顯，而且係活力十足既同時，確保到聽感唔會因此而拉薄。整體既均衡表現，令Cyclone係唔同耳機既配搭中都能夠帶來滿意既提升。
百搭嗎？我覺得都要睇你聽歌既取態來配合，但若果只談提升，而唔係要睇味道夾唔夾你既話，咁Cyclone係做得非常出色，係近期必入之作來既。若果想睇埋味道，或者就要觀察下BA再上級啲既線啦～
Beat Audio Cyclone售價：$11,800
Sponsored by Beat Audio